¹ Ye kingonai Kiptaiyat kole kigogas Parisaik kole kiyai Jeiso bik koek alamaliet ak kobatisani chesire che kibatisan Johana, ² (Ngaanda ma Jeiso inendet ne kibatisanisiei ago alamalienyi). ³ Kongeet eng Judea, kwo kogeny Galili. ⁴ Ak ki kanyol kobun samaria. ⁵ Kiit anyun Nganaset ne bo samaria, ne kiguure sukar, ne legite koret ne kiigochi Jacobo werinyi Joseph. ⁶ Ak kimi oloto keringetab beek ne bo Jakobo. Kitebyei anyun Jeiso eng ole legite keringetab beeko amu ng'etatetab bandanyi, ki olobo sait lo. ⁷ Kinyo kobogorio ne bo Samaria kosiil beek, kolenji Jeiso 'inaga beek aee". ⁸ (Amu kigaba alamalyenyi nganaset koal amitwogik). ⁹ Kileji anyun kobogoriot ne bo samaria inendet, "katebto ano si isoma beek iee, ako inye ko i Yahudiot ak ane ko ai kabogoriotab samaria?" Amu manamege Yahudik ak Samarik. ¹⁰ Kowolji Jeiso koleji, "nda kenget konunetab Jehovah ak inendet ne kalenjin 'inaga beek aee,' nda kesome inendet si kogonin beekab sobon." ¹¹ Koleji kobogorionoto, "Kiptayandani, metinye kiit ne isiile beek ago loo keringet, inyorjini ano anyun beechoto bo sobon? ¹² Tos i o inye eng Kwandanyo Jakobo ne kigonech keringet ne kiee inendet ak lagokyi ak tukyi?" ¹³ Kowolji Jeiso koleji, "age tugul ne eei beechu kota koamei melelda kogeny. ¹⁴ Ago age tugul ne eei beek che agochini, ko ma koame melel agoi, ago egu beek che agochini kondab beek eng inendet che kutu agoi sobondab koigeny." ¹⁵ Koleji kabogoriondonoto, ''Kiptayandani, inaga beechoto si ma koama melel ama a nyoni asile beechu." ¹⁶ Koleji Jeiso kobogoriondonoto, ''ui, ak iguur boiyondengung ak obwa yuto." ¹⁷ Kowolji kobogorindonoto koleji, ''matinye boiyot'', koleji Jeiso, "kaimwa komie ile metinye boiyot ¹⁸ Amu ki otebi ak boisiek mut, ak inendet ne omi tuwai nguno ko ma boiyondengung, kaimwa iman. eng nito." ¹⁹ Koleji kobogoriondonoto, Kiptaiyandani, kaageer ale i maotio. ²⁰ Kisae kwanisiekyo eng tulwoni ak olen akwe Jerusalem ole kanyol kosae biik. ²¹ Koleji Jeiso, kobogoriondani, iyana, nyone sait ne ma osae Kwanda eng tulwoni, nda ko eng Jerusalem. ²² Osae ne monget, kisae ache ne kinget, amu bunu yetunet Yahudik. ²³ Ago nyoni sait, ako kagoit nguno, ye saei Kwanda che saei ne bo iman, eng Tamirmiriet ak amanit, amu chenge Kwanda che u choto koek che sae inendet. ²⁴ Jehovah ko Tamirmiriet, ak kanyol kosa inendet eng Tamirmiriet ak iman che saei inendet. ²⁵ Koleji kabogoriot, "anget ale nyonei Mesia (ne keguure Kristo), ng'o nyo inendet, komwawech tuguk tugul." ²⁶ Koleji Jeiso inendet, ane ni, ne angalalun." ²⁷ Kibwa anyun alamalyenyi ak kikwongio amu kingalaali ak kobogoriondonoto ago mamwochi chi koleji "ichenge nee?",anan "kalya si ongalal ak inendet?" ²⁸ Kibagakta anyun kobogoriondonoto terenyi bo bei ak kwo nganaset, ak komwachi bik koleji, ²⁹ "Obwa ogeer chito ne kagomwawa tuguk tugul che kiayai atkinye kora, tos Kristo nito?" ³⁰ Kimong anyun nganaset kobwa ole mi inendet. ³¹ Kingota kobwanei, kosom alamalyenyi inendet kole, Rabbi, amisie. ³² Ago kileji ichek, "atinye amitwogik che aame che mongen.'' ³³ Kolejigei anyun alamalyenyi, "tos kagoipchi chi kiy ne amei?" ³⁴ Koleji Jeiso,amitwokikyu ko ayai magetab inendet ne kiyokwo ak agesu boisyenyi. ³⁵ Momwae akwe ole takomi arawek angwanu si koit kesisiet? Ogeero amwawok ale, onget met, ak ogeer mbarenik,ole kagolelagitu, kagoem keges. ³⁶ Inendet ne kesei kotaachei melekto, ak koyumi logoek che bo sobondab koigeny, si koboiboitu tuwai ne kolei ak ne kesei. ³⁷ Amu bo iman mwaoni, kole age ko kesei age. ³⁸ Kiayoktok oges che kimonyalilji, kinyalilji alage ako kaonam akwe uuindab boisyengwai." ³⁹ Kiiyan anyun inendet Samarik che chang' che bo nganasanato amu ng'olyotab kobogoriot, ne kibaorian kole, "kamwawa tuguk tugul che kiayai atkinye kora." ⁴⁰ Noto anyun ye kingobwanji inendet samarik, kosom kole kotebi koboto ichek, ak kibeni oloto betusiek aeng. ⁴¹ Ak kiiyan che chang amu ngolyondenyi. ⁴² Koleji kobogoriot, "kiiyani raa, ma amu nga'lalengung, ago amu kagegasyige ak kingen kele nito ko yetindetab ng'weny." ⁴³ Ak king'obata betusiechoto aengu, kongeet eng oloto kwo Galili. ⁴⁴ Amu kibaorian Jeiso inendet kole, matinye maotiondo tegisto eng emenyi. ⁴⁵ Ak kingonyo anyun Galili kotaach inendet Galilik ko kagogeer tuguk tugul che kiyai eng igorta ne kimi Jerusalem, amu kigaba agiche igorta. ⁴⁶ Kinyo anyun Jeiso kogeny Kana ne bo Galili ole kigayae beek koek divaik, ak kimi kiboitiot age ne bo kaplaitoriat ne kimiani werinyi eng Kapernaum. ⁴⁷ Ye kingogas kole kagomong Jeiso eng Judea konyo Galili, kwo ole mi inendet, ak kosom kochorgei kosob werinyi amu ki legit kome. ⁴⁸ Koleji anyun Jeiso inendet, "ngot ko mogeer kabarunoik ak kwong'utik ko magoi oyan matiny." ⁴⁹ Koleji kiboityondonoto, "Kiptaiyandani, choruge kotom kome lakwenyu." ⁵⁰ Koleji Jeiso ui inye, sobei weringung, koyan anyun chichoto ng'olyot ne kimwachi Jeiso ak kwo. ⁵¹ Ak ye kita kochortaige kotuiyo ak otwogikyi ak komwochi koleji sobei weringung. ⁵² Kotebe anyun kole, "kogaigaitu kotia?" koleji anyun bichoto inendet, "kobaga kobagakta eset eset inendet amut sait tisab." ⁵³ Konai any'un Kwanda kole ko sainoto ne komwachini Jeiso koleji "sobe weringung." Ak kiiyan inendet ak konyi komugul. ⁵⁴ Nito kaborunet ne bo aeng ne kiyai Jeiso koboch ng'omong eng Judea konyo Galili.