¹ Kinyo Kererit Maria Magdalene Karon ko kairir emet, eng betut he bo tai he bo wigit ak kogeer koita ko kageisto eng kererit. ² Kolabat kot ole mi Simon Petero ak noto age ne bo alamalyet ne kichamei Jeiso ak koleji ichek, "Kageib Kiptaiyat eng kererit ama kingen ole kaginde." ³ Koba anyun Petero ak noto age ne bo alamalyet kotokyige kererit. ⁴ Kiruai tuwai kibagenge ak kilabat nin age ne bo alamalyet kondoe Petero ak korub koit kererit. ⁵ Kinguruk kogeer orit ak koro ngoroik ab katanit ko itootin ago mawo orit. ⁶ Konyo anyun Simon Petero agine korubu inendet ak kwo kererit orit. Ak koro ngoroik che bo katanit ko itootin ⁷ ak anget ne kimi metinyi, ko kima komi koboto ngoroik che bo katanit, ago kimamanat inege eng olda age. ⁸ Kiwo orit agine noto age bo alamalyet ne kiga Sib koit kererit ak kigeer ak koyan. ⁹ Amu kitomo konai sirutiet ne kiile, "ngeete kogeny eng chekibek. ¹⁰ Kowektage Koba gaa anyun kogeny, choto bo alamalyet. ¹¹ Ago kitononi Maria eng eng sang ne bo kererit ako rirei. Ago kingotakorirei, konguruk koiit kererit. ¹² Ak kigeer Malaikaisiek aeng che kilochi ngoroik che lelach, kotebyei ngweny , age eng ole bo metit ak age eng ole bo kelyek eng ole kimi bortab Jeiso. ¹³ Ak kileji, "chepyosoni, kalya si irir?" Koleji, "amu kageib Kiptaiyandenyu, amanget ole kaginde inendet." ¹⁴ Ak Kongo kagomwa ko u noto, kowechge ak kogeer Jeiso kotononi, amanai mole Jeiso noto. ¹⁵ Koleji Jeiso, "chepyosoni, kalya si irir? ichenge ngo?" Kiibwati kolen abere inendet ko ribindetab mbaret, ak kole, "Kiptaiyandani, ngo keiib inendet, imwawo ole kende si aib." ¹⁶ Koguur Jeiso koleji, "Maria." Kowechge ak koleji eng kutitab Hebranic, "Rabboni" nge weech kele, "konetindoni". ¹⁷ Koleji Jeiso, " ametinyoo, amu tomo atogosyi oldab Kwanda, ago ui ole mi tupchosiekyu ak ileji, atogosyini oldab Baba, ago Baba nengwong, Jehovah nenyu ago Jehovah nengwong." ¹⁸ Konyo Maria Magdalene koleji alamalyet, "Kaageer Kiptaiyat" ak kagomwachi tuguchu inendet ¹⁹ Ak ye kingoek lagat, eng betunoto bo tai ne bo wigit, ye kiga keger kurgotik eng ole kimi alamalyet amu kiiywei Yahudik , Konyo Jeiso kotonone kwenungwai ak koleji, "ingoteb kalyet eng akwe." ²⁰ Ak ye kingo kagomwa nito, koborji eunekyi ak karastanyi. Koboiboitu anyun alamalyet ye kingogeer Kiptaiyat. ²¹ Koleji Jeiso anyun kogeny, "ingoteb kalyet eng akwe. Kou ye kiiyokwo Kwanda, ayoktook ak akwe ko u noto." ²² Ak ye kingo kagomwa nito, kobusyi ak koleji, "otaach Tamirmiriet ne Tilil. ²³ Biko alak tugul che onyojini kaat tengekwogikwai, kenyojini kaat; Ak alak tugul che oeisioi onyochi kaat, keesioi kenyochi kaat ." ²⁴ Ago kima komi Tomas ne kigiguure Didumo, ne ki age eng Raman ak aeng koboto icheket ye kinyoni Jeiso. ²⁵ Koleji inendet anyun chun alak che bo alamalyet, Kageger Kiptaiyat." Ago koleji Tomas icheget, "ngot ko mageer eng eunekyi berutik che bo kipchumarisiek, ak ande mornenyu berutik ab kipchumarisiek ak ande eunyu karastanyi, komayani." ²⁶ Ak kingo bata betusiek sisiitu, ko kimi go' alamalyet kogeny, ako kimi Tomas koboto icheget. Konyo anyun Jeiso ko kerotin kurgotik, ak kotonon eng kwenungwai ak komwa kole, "ingoteb kalyet eng akwe." ²⁷ Ak koleji Tomas, "iyogou mornengung ak inde karastanyu. Ameegu ne matinye kayanet, ago iyan." ²⁸ Kowolji Tomas koleji, "Kiptaiyandenyu, ago Jehovah nenyu. ²⁹ Koleji Jeiso inendet, " kaiyan amu kaigeero, iberurotin ichek che iyani ama geer." ³⁰ Kiyai Jeiso kaborunoik alak che Chang eng taitab alamalyet che ma sirotin eng bukuini, ³¹ Ago kigisir chu so kobiit oyan ole Jeiso ko Kristo, weritab Jehovah, ak si kobiit ye oyani, onyoru sobondo eng kainennyi.