¹ Ak kigur kayoktoikchi tugul taman ak aeng kogachi icheket kimnatet ak bounatet koboi chesawilok tugul ak kossob che miandos. ² Ak kiyokto koamda bounatetab Jehovah ak kosoob che miandos. ³ koleji amoib kiy ne bo bandang'wong' mbo kirokto nda lolet, nda makatiat, nda ko chepkondok, amoibote sumbotik oeng. ⁴ Ak kot age tugul ne ko mongji, otebee oloto agoi obe. ⁵ Ak alak tugul che mataachok , ye omande eng kokwonoto olelekte temburiek eng keelyekwok si koek baornatet agobo icheket. ⁶ Koba anyun kobunot kokwatunwek koamdoi logoiwek che kororon, ak kosoobot eng ole tugul. ⁷ Ak kigas anyun kirwogindet Herodtuguk tugul che kigoyaak. kiimge mising amu kimwae alak kole, kagong'eet johana eng che kimeiyo, ⁸ ak kibere alak , kagotook Elija, ak kobere alak , kong'eet age eng maotik cho ki bo keny. ⁹ Ak kile Herod, kiatil metitab Johana , ago ngo anyun chichi ne agase tuguk che u choto agobo inendet? Ak kicheng kogeer inendet. ¹⁰ Ak kingoweek che kiyoktoi, komwachi inendet tuguk che kagoyai. Ak kimut icheget koba taban ichege agoi kokwet ne kiguure Betsaida. ¹¹ Ago kingonai tuiyosiek korub, ak kitaach icheget a kong'alalchi agobo bounatetab Jehovah, ak kiisob icheget che kimache kisoob. ¹² ak yo kimache koimen, kobka anyun tamanu ak aeng koleji inendet, oonde tuiyet koba si koit kokwotunwek ak emet , si konyor ole rutos ak amitwogik, amu kimi tumoo kwen. ¹³ Ago kileji icheget, ogochi akwee amitwogik, ak kile magitinye kiy kobate makatinik mut ak njirenik aeng , kobate kebe kealji amitwogik bichu tugul. ¹⁴ Amu ki oloo bo elfusiek mut murenik. ak kileji kayoktoik, ochob kobebee ng'weny ak ingobeate konom. ¹⁵ Ak kiyai anyun kou nyoto, ak kichob tugul kotebe ng'weny. ¹⁶ Kinam makatinichoto mut ak njirenichoto aeng ak konyaal barak kipsengwet, ak koberur ak kimurmur ak kogachi kayoktoik kogochi tuiyet. ¹⁷ Ak kiamis kot kobiyong'io tugul ak kigium murmuranik che kingeet eng kerebonik taman ak aeng. ¹⁸ Ak yo kisae inege, ko kimi kayoktoik koboto inendet ak kitebe icheget koleji, mwae tuiyosiek kole aii ng'o? ¹⁹ kiwolji icheket koleji, len johana kabatisanindet, kobere alak Elija, kobere alak kagong'eet maotiot eng che kibo keny. ²⁰ n Ak kileji icheket, ago obere akwe aii ng'o? Ak kiwol Petero kole , ii Kristo ne bo Jehovah. ²¹ Ago kitigon icheket , ak kung'at kolechi amomwachi chi ng'olyononito, ²² kole kanyolji weritab chi konyalil eng tuguk che chang ak kotai boisiek inendet ak tisiik che eechen ak sirik ak kebar ak king'eet eng betutab somok. ²³ Kimwochi icheket tugul , ngo mache chi age tugul korubwa, ko taigee ak koib kimurtoiyondennyi betut age tugul ak koruba. ²⁴ Amu age tugul ne mache kosor sobondannyi kobeti, ak age tugul ne ibeeti sobondannyi agobo ane, ko nyoto ne soru. ²⁵ Tos keljin nee ne nyoru chi koboi ingweny komugul ak kobet sobondannyi? ²⁶ Amu age tugul ne jistoenogee ak ng'alekchu kotun ajistoege agine weritab chi chichoto tun nyoni eng torornatetenyi, ak ne bo kwand, ak nebo malaikaisiek che tililen. ²⁷ Ak amwowok iman ale mito alak eng che tonondos eng yu che magere meiya kotomo kogeer bounatetab Jehovah. ²⁸ Ak kingobek betusiek alo bo sisit kong'etee ngomwa ng'alechoto , komut Petero ak Johana ak Jakobo kolanda tulwet koba kosa. ²⁹ ak yo kito kosae, kowalak itondab togenyi ak kolelagitu ngoroikchi koto lil bich. ³⁰ Ak ogeer ak king'ololyo ak inendet biko aengu, che ki Musa ak Elija, ³¹ kingoto eng lilindo ak kiga ng'alal agobo meenyi ne kimache kosulda eng Jerusalem. ³² Ak kia kobirto met Petero koboto icheget che kimi ak inendet, ago kingokos, kogeer lilindannyi ak bichoto aeng che kitonondos koboto inendet. ³³ Ak kingomache kobesio ak inendet koleji Petero Jeiso, kanetindeni, kararan amu kimi yuto , si keteech keriosiek somok, neng'ung, age kobo Musa, age kobo Elija. komwaoe ama nai kito ne mwae. ³⁴ Ak yo kita komwae tuguchuto, konyo boldet ak kotuch icheget ak kiiyweis ye kingochut boldet. ³⁵ Ak kimong tuget eng boldet ak kole , ni ko werinnyu ne kialewen ogas inendet. ³⁶ Ak yo kingobata kutinoto, kotook Jeiso inegee ak kosisyo anyun ama mwachi chi eng betusiechotokito age tugul ne kiga kogeer. ³⁷ Ak betut ne kirube betunoto yo kingoregu eng tulwet , kotuyo ak inendet tuiyet ne o. ³⁸ Ak keer anyun , kowaach chito age eng tuiyet kole kanetindeni, asain ale rire werinyu amu kiasiich inegee. ³⁹ Ak keer anyun , name inendet tamirmiriyet ak kowaach , ak kobiabirtage, kotobun bugaat kutinyi, konyalil mising ama chame kobagakta. ⁴⁰ Ak kiasaisai kayoktoikuk ale koonda ago ma imuch. ⁴¹ Ak kiwolji Jeiso koleji, wei, ibini matinye kayanet ak kogunur, atebche kobotok ak amuitoi agobo akwe agoi au? Imutu wering'ung konyo yu. ⁴² Ak kingota konyoni, kowirji ngwony chesawilyet inendet ak kobirabirtage mising. ago kiger kong Jeiso tamirmiriet ne ya ak kosoob lakwet, ak koweekchi kwandanyi. ⁴³ ak kikwong'io tugul agobo kimnatet ne o nebo Jehovah. Ago kingoto kokwongtos tugul agobo tuguk che kayai Jeiso koleji kayaktoikchi, ⁴⁴ ingochut ng'alechu itikwok amu tun kigoitoi weritab chi, kwo eunekab biko. ⁴⁵ Ago ma iguiyo icheket mwaenoto kiung'ak si manai ak kiiywei kotebe inendet agobo mwaonoto. ⁴⁶ Kotoi anyun kotebege ichegee eng ichegee kole anonoo eng ache ne egu ne o? ⁴⁷ Ak kingonai Jeiso kabwatutikab mugulelwekwai konam lakwet ne mining ak konde ole legit inendet ⁴⁸ ak kileji icheget , chi age tugul ne taache lakwani mining eng kainenyu ko kataacha, ak chi age tugul ne taacho ko kataach inendet ne kiyokwo. Amu age tugul ne mining eng akwe tugul , ko ne o. ⁴⁹ Ak kiwolji Johana koleji kanetindeni kigeer chi koone chesawilok eng kaineng'ung ak kigitae amu magi bendoti tugul. ⁵⁰ Ago kileji Jeiso inendet amotae inendet, amu inendet ne magertook ko neng'wong. ⁵¹ Ak ye kilegit mising koit betusiek che kitache inendet eng barak, kogiljige kotokchi togenyi ak kwo Jerusalem. ⁵² Koyokto che ibe ng'alek koba kondoe inendet, koba anyun komandae kokwet age nebo Samarik ak kochopchi ole tebe. ⁵³ Ak ma taach inendet , amu kiga kotokchi togenyi kwo Jerusalem. ⁵⁴ Ak yo kingogeer kayaktoik Jakobo ak Johana koleji, kiptayandani tos imache keng'at kweir mat ne bunu kipsengwet si kotar icheget ko u ye kiyai Elija? ⁵⁵ Ago kwekchjige kogeer icheget, ak koger kong, ⁵⁶ amu kimanyo weritab chi si kobar sobonwek, ago si kosor, ak koba anyun nganaset age. ⁵⁷ Ak kingota kobendi eng oret, koleji chito age arubin oloo tugul iwendote. ⁵⁸ Koleji Jeiso inendet, tinye lelwek kebenonik, ago tinye taritik che bo barak keswenikwai ago matinye weritab che ole indenoi metinyi. ⁵⁹ Ak kileji age rubwa, ago kileji chichoto kiptaiyandani, chmwo awo korok atub kwandanyu. ⁶⁰ Ak kilji mete che meiytos kotub chekwai, ago wui inye ak iamdate ng'alekab bounatetab Jehovah. ⁶¹ Kole age, agine arubin kiptaiyat , chomwo korok awo amwachi bikab gonnyu saisere. ⁶² Ago kileji Jeiso inendet mami chi ne name magombetab eik, ak kogus koger let, ne nyoljini bounatetab Jehovah.