¹ Kingobata tuguchuto tugul , kolewen kiptaiyat biko alak tamanwokik tisab ak koyokto aeng aeng kole, kondoe inendet koba kokwet age tugul ak komosta age tugul ole bunoti. ² Ago kileji icheket, o kesisiet. ago ng'ering kesick nyoto anyun osom kiptaiyat nebo kesisiet asi komuch koyokchi kesiik kesisienyi. ³ Oba ortinwekwok , ogeer anyun, kayoktok kou arekab kechirek eng kwenutab suik. ⁴ Amoib lolet, nda chepkondok, nda ko kweonik, amokat chi eng oret. ⁵ Ak got age tugul ne omongjini, omwa ole ingo tebi kalyet eng koii. ⁶ Ak ngo mite werikab kalyet yoto, kotebe kalyeng'wong inendet, ak ngoto mami, koweekchinoge akwee. ⁷ Ak otebe goyoto anyun ak tuguk che konok oam ak oee amu nyoljini kiboitiot melektonyi, amoitote gorik. ⁸ Ak kokwet age tugul ne omongjiniak kotaachak oam tuguk che kakindeno taing'wong ⁹ ak osoob che miandos eng oloto, ak oleji icheget kagorikchok bounatetab Jehovah. ¹⁰ Ago kokwet age tugul ne omongjini amataachak omande obe ortinwekchi ak omwa ole, ¹¹ kagibukchok temburiek che bo kokweng'wong che kanam kelyekcho, ago onai ni ole kagorik bounatetab Jehovah. ¹² Ak amwawok ale tun keigeitu sodom eng betunoto kosiir kokwonoto. ¹³ Aya we Korasin! Aya we Betsaida! amu nda kiga kiyai eng Turo ak sidon boisionik chebo kamuktaet ko u che kogiyai eng akwee nda kiga kosikkeny, ak kotebe aronik ak kolachi kuniok. ¹⁴ Ago tun keigeitu Turo ak Sidon eng kiruoget kosiirok. ¹⁵ Ak inye Kapernaum, tos tun kitororin iwe kipsengwet? Kiwirjinin nwenykoto iit ole mi che kigobek. ¹⁶ Inendet ne kosok kogkagokasa agane, ak inendt ne took kagotaa agane, ak inendet ne taa kotoe inendet ne kiiyokwo. ¹⁷ Kiweechge anyun bichoto tamanwogik tisabu eng boiboiyet, ak komwa kole kiptaiyandani mbo chesawilok kogaseech iit eng kaineng'ung. ¹⁸ Ak kileji kiageer cheswlyet kororoku eng kipsengwet ko u kalyelet. ¹⁹ Ogeero kaagonok kamuget si omuch otiech erenok ak melmelwek ak oterter kimnatet tugul ne bo bunyot, ak mami kiy ne imuchu kong'emak. ²⁰ Ago amoboiboitu amu ng'olyondoni, amu kasok iit chesawilok, ago oboiboitu amu sirotin kainaikwok eng kipsengwet. ²¹ Eng kasarato, kobaibait Jeiso eng tamirmiriet ne tilil ak kole , aweegun kongoi, we kwanda, kiptaiyat nebo kipsengwetak ngweny , amu kiung'e tuguchu che ng'omen ak che ingenak kiborji chererok, we kwandanyo, amu kichamak ko u nyoto eng taing'ung ²² Kigogono tuguk tugul kwanda, ak mami chi ne inget werit kobate Kwanda, ama nai chi Kwanda kole ng'o, kobate werit ak chi age tugul ne chame werit koborchi. ²³ Ak kiweekchige koger kayoktoik, ak koleji eng ung'ot, iberurotin konyek che keere tuguk che ogere. ²⁴ Amu amwawok ale kimache maotik che chang ak laitorinik kogeer tuguk che ogeere , ago kima geer ak kimache kogas tuguk che ogase ago kima kas. ²⁵ Ak ogeero, kitonon ng'omotiot age ne bo ng'atutik kotiem inendet kole kanetindeni, ayae ne si tun anyoru sobondab koigeny? ²⁶ Ak kileji , kigisir ne eng ng'atutik, isomandoi ano? ²⁷ ak kiwolji inendet koleji, cham kiptayat Jehovah nyeng'ung eng muguleldang'ung komugul, ak eng sobondang'ung komugul ak eng kimnateng'ung komugul, ak eng ng'omnateng'ung komugul, ak icham chitab kokweng'ung ko u yo ichamegee. ²⁸ Ak kileji, kewolu komie, yai kou nyoto si isob. ²⁹ Ago amu kimache kokararan ge koleji Jeiso, ngo chitab kokwenyu? ³⁰ Kowolji Jeiso koleji, kirekto chito age Jerusalem agoi Jeriko, ak kituiyo ak chorik che kisare ngoroik ak kobir ak koba, kobagakta kolegit kome. ³¹ Ak kirekto tisiindet age oranato, ak kingogeer inendet korob taban. ³² ak ye kingoit lawindet yoto, ak kogeer korob taban agine ko u nyoto. ³³ Ago ye kita kowendi samarindet ageeng bandanyi, koit ole mi chichoto, ak ye kingogeer inendet korire. ³⁴ Kwo ole mi inendet koratyi ole kagibir ak kosochinot mwaita ak divaik ak kikelepchi chichoto sigiryenyi ak komut kwo gotab toek, ak korib inendet. ³⁵ ak mutai, koneem denarisiek aeng kogachi chitab kobo kot ak koleji rib inendet ak tuguk alak tugul che kotesakis, ko tun kawechge anyo ayaagun. ³⁶ Eng chuto tugul ko somok ibeere ng'o ne kiek chitab kokwenyi eng chichoto kituye chorik? ³⁷ ak kile inendet ne kirire chichoto. Ak kileji Jeiso wui, iyai ko u nyoto. ³⁸ Ak ye kito komi bandang'wai komogji anyun kokwet age ak kitaach eng gonnyi chepyoso age ne keguure Marta. ³⁹ Ak kitinye cheptong'wai ne kiguure Maria ne kitebche eng ole bo kelyekab Kiptaiyat kogase ng'olkyondennyi. ⁴⁰ Ago kingortot Marta agobo boisionik che chang, ak konyonji inendet ak koleji, kiptaiyandani memake kiy ak kameto tupchennyu abois kityo? Mwachi so konyo kotoreto. ⁴¹ Ak kiwolji kiptaiyat Jeiso koleji Marta, Marta igereri met ak iimige agobo tuguk che chang, ⁴² ago kito agenge ne kamache , amu kagolewen Marta kebeberta ne kararan ne ma kisore.