¹ Ak kingota kosae eng orit age , ak kingotar koleji age eng kayoktoikchi, kipatayandani, inetech kesa, ko u yo kineti Johana kayoktoikchi. ² Ak kileji icheket yo osae, omwa ole, kwandannyo ne mi kipsengwet, ingotililit kaineng'ung, ingonyo bounateng'ung , ingoyaak megengun'ung eng ng'weny ko u eng kipsengwet. ³ Koneech amitwogikcho eng betut age tugul. ⁴ Ak inyoiwech kaat tengekwogikcho, ko u ye kinyochini kaat besenikcho, amemutech ole mi tiemisiet. ⁵ Ak kileji , ngo eng akwe ne tinye chorweny ak kwo ole mi kemoi kwen, ak koleji choruenyu toreto makatinik somok abesen, ⁶ amu kagoi choruennyune bunu rutoi, amatinye kiy ne agochini. ⁷ Kowolji ne mi go koleji, amate iima, kaager kurget ak kageruiye ak agokchu, ma muchi ang'eet akonin. ⁸ Amwawok ale , mbo ngo mang'eet kogochi amu chorwenyi, ko amu somenyi ko ne igochini kong'eet kogochi kiy tugul ne mache. ⁹ Ak amwowok agine ale osom si kekonok, ocheng si onyoru, ogonygony si keyotwok. ¹⁰ Amu age tugul ne some kegochini, ak age tugul ne cheng'e konyoru, inendet ne igonygonyi keyotchini. ¹¹ Ng'o eng akwe kwanda, ne ngosom werinyi makatiat kogochi koita? nda tos ngosom njiriot kogachi erenet? ¹² Nda ngosom koitab ingokchet, ko tos igochi melmeldo? ¹³ Ngong'eet akwe che oyaachen ogochi lagokwok tuguk che kororon, siire anyun ne tia kagoitoet ne igochini kwandang'wong ne mi kipsengwet, Tamirmiriet ne Tilil icheket che some inendet? ¹⁴ Ak kingo onda chesawilyet eng ne namat kut, ak yo kingo kago manda chesawilyet, kong'alal anyun ne ki namat kut, kikwong'io tuyosiek. ¹⁵ Ago kimwa alak kole ondoi chesawilok komanda eng Beelsabul,laitoriat ne bo chesawilok. ¹⁶ Ak kitiem alak, inendet komage kaborunet ne bunu kipsengwet. ¹⁷ ago kinai kabwatutikwai, koleji bororiet age tugul ne pcheege ko ng'emakse, ak kot age tugul ne pcheegei kolule. ¹⁸ Ak ngo besioge agine chesawil kotonondoi ano bororienyi? Amu omwae ole aone chesawilok eng Beelzebul. ¹⁹ Ngotko aone cheswilok eng beelzebul kooone weri kwok eng ngo? nyoto anyun ne igochini icheget koek kirwogikwok. ²⁰ Ago ngoto aone chesawilok eng mornetab Jehovah, ko kakochonchok anyun bounatetab Jehovah. ²¹ Ak chi ne tinye kimnatet ak kotinye karikchi che ribe gonyi, koteche tugukchi eng kalyet, ²² Ak yo kanyo chito ne kim kosiir inendet ak koterter kosare anyun inendet karikchi tugul che cham kowalege, ak kopcheita sakanikchi. ²³ inendet ne magimi tuwai kogirindo, ak inendet ne magiyumi tuwai kosertoi. ²⁴ Yo kago manda tamirmiriet ne ya eng chito kosiir ole mami beko, kocheng'ote ole imung'e ak yo mata konyor, komwa anyun kole kawektege gonyu ole kiabunuu. ²⁵ Ak yo kaiit, konyor kobugot ak ko chobot. ²⁶ Kwo anyun komut tamirmirik tisab alak che yaachen kosiir inendet, kochiut anyun orit ak komeny oloto, ak yaitu atebetab chichoto kosiir ne bo tai. ^{28 27} Ak yo kita komwae ng'alechu, komwa chepyoso age eng tuiyet kole, iberurot moet ne kisichin, ak kinaik che kichuchun. Ago kile inendet iberurotin kosiir che kase ng'olyotab Jehovah ak korib. ²⁹ Ak yo kingorurukchige inendet tuiyosiek kotoi komwa kole, ibini ko ibindo ne kunuur , cheng'e koborunet, ago magikochini kaborunet kobate kaborunetab Jona ne ki maotiot. ³⁰ Amu kiek Jona kaborunet eng bikab Ninebe, ko u noto weritab chi eng ibini. ³¹ Tun ng'ete laitoriat ne chepyoso nebo murot tai eng kiruoget koboto bikab ibini ak koruokchi icheket, amu kibunu tabanwekab emet konyo kogas ng'omnatetab Solomon, ak ogeero mito yu ne o kosiir Solomon. ³² Tun tonondos bikab Ninebe ak ibini eng kiruoget ak kiruokchi, amu kisik icheget eng amdaetab Jona ak ogeero, mi yu ne o kosir Jonah. ³³ Mami chi ne ngo kagonaam tait konde ole ung'at nda kitonget orit anan ko kurere, ago indeno kito ne tononi si komuch kogeer lapkeiyet che bendi kot. ³⁴ Taitab bortang'ung kondang'ung, ingo kararan kondang'ung ko nyiitat bortang'ung komugul lapkeiyet, ago ngo ya kondang'ung konyiitat bortang'ung agine tuindo. ³⁵ Keer anyun ngo lapkeiyet ne mi oriting'ung nda ko tuindo. ³⁶ Ngo nyiitaat bortang'ung komugul lapkeiyet amatinye ole tui, kolapkeitu anyun bortang'ung tugul, ko u ye konin lapkeiyet tait ne ikwengtoi komie. ³⁷ Ak yo kita kong'alali, koguur parisaindet age kwo koamis tuwai, ak kiwo go ak kotebingeny koamis. ³⁸ Ak kingogeer parisaindet kokwong, amu kiamis ama iun eut korok. ³⁹ koleji kiptaiyatakwe parisaik ouni barak tageito ak ketubet, ago nyiitat oriting'wong suiyondit ak yaitiet. ⁴⁰ Akwe oberberen , inendet ne kyae sang ko ma ne kiyae orit agine? ⁴¹ Ogoite kagochinoik che bo tuguk che mi orit ak ogeero, tililitu tuguk tugul eng akwee. ⁴² Ago mutyo akwe parisaik! ogoitoi kebebertab taman ne bo ketik che mengech che nguu, ak che bo sage alak tugul, ak ometoi kiruoget ak chamyetab Jehovah, ago kita muchini oyai chuto amomete chun alak. ⁴³ Mutyo akwe parisaik! amu ochame ng'echerok che tororen eng kapkorosusiek ak kagatisiet ne kigatok eng orisiekab oldoisiet. ⁴⁴ Mutyo akwe siriik ak parisaik! Okerge ak keringonik che matoogu, ama nae biko che bunoti barak. ⁴⁵ Ak kiwolji ng'omotiot age nebo ng'atutik koleji, kanetindoni, ngoto imwa ko u nyoto ko ketewerech agache. ⁴⁶ Ak kole mutyo akwe ng'omotikab ng'atutik! amu okelepchini biko milotik che nyigiseneng laiset, ago akwe ko motwae milotichoto mbo eng mornet agenge. ⁴⁷ Mutyo akwe! amu oteeche kererisiekab maotik ago kibare kwanisiekwok. ⁴⁸ Kioegu anyun baorinik ak ochamnyechi boisionikab kwanisiekwok, amu icheget che kibare ak oteeche akwe kererisiekwai. ⁴⁹ Kile anyun ng'omnatetab Jehovah , amu nyoto tun aokchini maotik ak che kiyokjtoi, ak kobar alak eng icheket ak konyalil alak. ⁵⁰ Si komuch koruokyi ibini karotikab maotik tugul che kigitumda kongete ko kakilumda ngweny, ⁵¹ Kongetee korotikab Abel agoi korotikab Sakaria ne kime eng kwenutab kaptisisiet ak gotab Jehovah. Wei amwawok ak tun ketebe ibini. ⁵² Mutyo akwe ng'omotikab bg'atutik! amu kiosut yateiwot ne bo ng'omnatet ama obe orit akweget ak kiogerte che kita chute orit. ⁵³ Ak yo kingomong eng oloto kotoi sirik ak parisaik korikchi inendet mising ak kochikchi, si komuch komwa ng'alek che chang, ⁵⁴ koribe kole ndamangab konyor ng'olyo ne mang'une kutinye asi koratee inendet.