¹ Ak kingobata, nyoto ne matia kowendote kokwatunwek cheechen ak che mengechen, ak koborjini ak komwaitati logoiwek che kororon che bo bounatetab Jehovah, ak kimi tamanu ak aeng koboto inendet, ² ak chepyosok alak che kiga kosoob eng tamirmirik che yaachen ak miianwek , Maria ne kiguure Magdalena ne kimandae chesawilok tisabu; ³ ak Joana kwondab chusa kiboitiotab Herode, ak Susana ak aak che chang , che kiboisiechini inendet eng tugukwai. ⁴ Ak kingo tuyoge tuiyet ne o , ak kobwanji inendet che kibunu kokwert age tugul , kong'alal eng kalewenet kole: ⁵ kiwo kolindet koiss kesuuek chi, ak yo kita koletoi kobutyi alak oret taban, ak kigitiekgatak koam taritik che bo barak. ⁶ Ak kibutyi alak atiet ak kingoruut koyamio, amu manyor beko. ⁷ Ak kibutyi alak kwenutab katok, ak kitor katok koboto kesueechoto ak kogiich. ⁸ Ak kibutyi alak nyung'unyek che kororon, ak kiruut ak koi age tugul bogol. Ak ye kita komwae tuguchu, komwa eng kutit ne o, kole inendet ne tinye itik che kostoe, kogas. ⁹ Ak kiteebe kayoktoikchi ole teptoi kalewenoni . ¹⁰ Ak kile kagigonok akwe onai ung'otik che bo bounatetab Jehovah, ago kimwachini alak eng kalewenoik asi yo keertoi ko mageere kiy, asi yo kase ko manae. ¹¹ Kalewenonoto ko ni kesuek ko ng'olyotab Jehova. ¹² Ak choto mi oret taban ko icheget che kigogas nda ityo konyo chesawilyet, ak koisto ng'olyot eng mugulelwekwai si manyor kayanet ak kesor. ¹³ ak icheget che mi atiet barak ko yo kagas ngalek koyan eng boiboiyet ak matinye tigitik , iyani kitigin, ak kochuchuch ge eng betutab tiemutik. ¹⁴ ak che kibutyi katok ko icheget che kigas ak ye kakoba kotitir kereretab met ak magornondit ak boiboiyetab tugukab soboni, ama iiyo logoek che nyiitotin. ¹⁵ ak che mi nyung'unyek che kororon ko icheget che yo kagogas ng'olyot konam komie eng mugulelwek che bo muitaet ak ko kararonen , ak koiiyo logoek eng kagiiletabge. ¹⁶ Mami chi ne yo kagonaam tait kotuche kiy nda konde kureretab kitogut, ago indenoi kito ne tonone tait si komuch kogeer lapkeiyet biko. ¹⁷ Amu mami kiy ne ung'at ne matun koboruge, mami kiy ne keunye ne matun naakse eng ole lapkei. ¹⁸ ogaste komie amu age tugul ne tinye ko tun kigochini ak inendet ne matinye , ko tun kesare mbo ne len tinye. ¹⁹ Ak kibwa konyor inendet kamet ak che tupcho ago maimuch korikchi amu chang'indab biko. ²⁰ Ak kigimwachi lkeleji tonondos komet ak che otupche eng sang mache kogeerin. ²¹ ago kiwolji koleji , kamenyu ak tupchosiekchu ko chu kase ng'olyotab Jehovah ak koyai. ²² Kilany moingetab beko eng betut age ak koyoktoik ak koleji , ongelandae araraita kebe bitoni, kotoi anyun koba tai. ²³ Ak kingo to kobendi koru ak konuch Jeiso, kowasokis beko eng araraita, kotumtum ak komache konyi beko moinget orit ak kichonji ng'oyondit. ²⁴ Ak kibwa ole mi inendet , ak kong'eet , koleji kanetindoni, kanetindoni, legit kemeiye! kong'eet anyun ak koger kong katumtumet ak wasetab ge nebo beko , kosis anyun araraita komung'io. ²⁵ Ak kileji icheket , mi anao kayaneng'wong? kiyweis ak kokwong'io , kolejige ichege ng'o chichi anyun ne itononi mbo beekab araraita che kawasakis kot kogas iit inendet. ²⁶ Kiit anyun emetab Gerasenik ne legityini Galili. ²⁷ Ak yokingonyo tabandab araraita kotuiyo ak inendet chito age ne kibunu kokwet ne kitinye chesawil, ak kima kolaachi ngoroi kongete betusiek che chang, ak kima komenye go, ago kitebe kererisiek. ²⁸ Ak kingo geer Jeiso , kowaach ak kobutyi tainyi ak komwa eng kutit ne o kole , atingenin ne Jeiso weritab Jehovah ne toror mising? kasomin ale amenyalila. ²⁹ Amu kingat tamirmiriet ne ya komong eng chichoto, amu kiga nam betusiek che chang, ak kigiribe missing, ak kiga korate irimwek ak mugurek, ak king'etye tuguk che kirate ak kione chesawilyetbinendet kwo tumoo kwen. ³⁰ Ak kitebe Jeiso koleji, kigurenen ngo? Ak kile che chang, amu kiga chut chesawilok che chang inendet. ³¹ Ak kisom kole, si ma ng'at koba kebenet ne matinye ole bekchini. ³² Ak kimi oloto torok che chang che kiagetos eng tulwetak isom icheget missing kole kochamji kochut torochoto, koyanji anyun. ³³ Ak kimonganyun chesawilok eng chichto ak kochut torok , ak kirwai torochoto chang ko chortage chemgasut koba araraita ak komeiyo. ³⁴ Ak kingo geer mestewek tugul che kibiit korweiyo koba komwaita eng kokwatunwek che eechen eng emet agobo nyoto. ³⁵ Kiba kogeer kito ne kogoyaak , ak kibwa ole mi Jeiso , konyor chichoto kigamandae chesawilok kotebche eng kelyekab Jeiso kolagaat ak kotinye ng'omnatennyi ak kiiywei. ³⁶ ak kimwachi icheget che kageere tuguk che kabiit ole kagisopto chito ne kitinye chesawilok. ³⁷ Ak kisom anyun biko tugul che ole legite emetab Gerasenik kole, kwo kobagakta icheget , amu kichut icheget kayweisiet ne o, ak kilany moingetab beko ak koweektage. ³⁸ Ak kisom inendet chito ne kimandae chesawlyet kole kotebi tuwai, ago kimwachi , koleji wechigei, ³⁹ iwektege gong'ung ak imwaite tuguk che eechen che kagoyaun Jehovah, ak kiwo anyun komwaitat eng kokwet ne okomugul tuguk che eechn che kagoyachi Jeiso. ⁴⁰ Ak yo kiweekse Jeiso kotach tuiyet amu kiganye biko tugul inendet. ⁴¹ Ak geer anyun, kinyo chito age ne kigiguree Jairo ne ki agenge eng kandoikab kapkorosutak kobutyi kelyekab Jeiso ak kosaisai inendet kole, konyo gonyi, ⁴² amu kitinye cheptonyi ne ki inege ne kibo olo bo kenyisiek taman ak aeng ak kilegit kome. Ago kirurukchigee tuiyosiek inendet kowendi. ⁴³ Ak kimi chepyoso age ne kimondoe korotik kenyisiek taaman ak aeng ne kiga koboisiei tugukchi tugul eng chepkerichinik, ama imuch kosoob inendet age tugul eng icheget. ⁴⁴ kinyo anyun kobun let eng inendet ak kotwa tabandab ngoriennyi ak kasarata kosisyo korotik. ⁴⁵ Ak kile jeiso ng'o ne katinyo? Ak kiingo tiiyo chitugul, koleji Petero konetindoni, karichkin biko che chang ak kagegichin. ⁴⁶ Ago kile Jeiso kagotinyo chi, amu kaanai ale kagomanda kimnatennyu. ⁴⁷ Ak kingogeer chepyosonoto kole ma imuch koung'ak konyo tai kobotananu, ak kobutyi ngweny eng tainnyi ak komwaita eng taitab biko tugul kito ne kayai kotiiny inendet ak ole kagisoopto inendet eng kasarata. ⁴⁸ Ak kileji chebi, kagosoobin kayaneng'ung , wui eng kalyet. ⁴⁹ Ak yo kita kong'alali kocho chi ne kibunu kotab baunindetab sinakogit, kole kagome cheptang'ung ama tata iim kanetindet. ⁵⁰ Ako kogas Jeiso, kowolji koleji, matiywei iyan kityo si kisob. ⁵¹ Ak ye kingo kagoit got koma chamji che age tugul kwo got koboto inendet, kobate Petero ak Johana ak Jacobo ak kwanitab cheboto ak kamet. ⁵² Ak kirirtos biko tugul ak kowaaktos agobo inendet ago kile , morirtosi, amu ma me inendet ago inuchi. ⁵³ Ak kirorichi inendet anyun kochwees , amu kingen kole kagome. ⁵⁴ Ago kinam inendet eutab cheboto ak koguur kole ng'eet! ⁵⁵ koweechge anyun tamirmirienyi, ak kong'eet kasarata ak king'at kole kigochi kiy ne ame. ⁵⁶ Koleji amomwachi chi age tugul kito ne kagoyaak.