¹ ak kibune mbarenikab bek eng betutab sabato ne bo aeng , ak kibutotkayaktoikchi mesisekab bek kobore ak konyei. ² Ak kimwa alak chebo parisaik kole , amu nee so yai eng betutab sabato ago ma chamdaat eng ng'atutik. ³ Ak kiwolji Jeiso koleji, tomo osoman mbo ngolyondoni , ne kiyai Daudi yo kingo am rubet koboto che kimito ak inendet? ⁴ Ak kiwo gotab Jehovah ak kocher makatinik che bo kabartaet koam ak kogochi che kimi koboto inendet agiche, che ki ma chamdaat eng ng'atutik koam chi age kobate tisiik ichege . ⁵ Ak kiwolji icheket koleji mbo weritab chi ko Kiptayatab sabato. ⁶ Ak kiwo kapkorosut eng sabato age ak konet biko, ak kimi chi ne kimeat eunnyi nebo tai. ⁷ Ak kitopeni siriik ak parisaik , ngoto tos konya chi eng betutab sabato, nda ma ra konyor oret ne itamee. ⁸ Ago kinai kabwatutikwai ak koleji chichoto kia kome eunnyi, ng'eet , tonon eng kwen akking'eet ak kotonon. ⁹ Ak kileji Jeiso icheket, atebenok ale tos chamdaat eng ng'atutik keyai ne kararan eng sabato, nds keyai ne ya? kesor sobon nda kebar? ¹⁰ Ak kigeerot Jeiso biko tugul ak koleji chichoto, chuul eung'ung ak kiyai kou nyoto ak kisoob eunnyi. ¹¹ Ak kinerekcho ak koruruchge tugul ak kotet kito ne imuchi koita Jeiso. ¹² Kiwo Jeiso anyun eng betusichoto tulwet kosa , ak kisa Jehovah kembout komugul. ¹³ Kingoech , koguur kayoktoikchi, ak kilewen eng choto taman ak aeng che kiguure kainengwai che kiyoktoi. ¹⁴ Simion ne kiguure kainenyi ne bo aeng Petero, ak Andrea ne tupcho ak Jakobo, ak johana ak Pilipu, ak Bartolomayo, ¹⁵ ak Matayo ak Tomas ak Jakobo, weritab Alpayo ak Simion ne kiguure selote, ¹⁶ ak Juda weritab Jakobo, ak Judas iskariot ne ki ng'wektaindet. ¹⁷ Ak kibwa koreek ak inendet ak kotonone ye ribrib koboto tuiyet ne o nebo kayaktoi ak bikoche chang che kibunu Judea komugul ak Jerusalem ak tabandab nyanjet ole bo komostab Turo ak sidon kibwoni kogase inendet ak kisoobcho eng mianwekwai, ¹⁸ ak kigisoob icheget he kiinyalili tamirmirik che yaachen. ¹⁹ Ak kicheng tuiyet komugul kotiiny inendet amu kibunu inendet kamuktaet, ak kisobcho icheget tugul. ²⁰ Ak kitoben koyoktoikchi ak kole, oberurotin akwee che oi bonon , amu neng'wong bounatetab Jehovah. ²¹ Oberurotin akwe che amok rubet nguno, amu tun obiyongtosi, oberurotin akwe che orirtosi nguno amu tun orortosi. ²² Oberurotin akwe che sosok biko ak kotabanak ak kochurok ak kemwaita kainengwong kole ya, agobo weritab chi. ²³ Oboiboitu eng betunoto ako sokorye eng boiboindo amu oger anyun , O melektang'wong eng kipsengwet , amu kiyochi kwanisiekwok maotik ko u nyoto. ²⁴ Ako mutyo akwe che oi magore ! amu kiotaach kagaigaeng'wong. ²⁵ Mutyo akwe che obiyongyotin nguno amu tatuun koamok rubet. Mutyo eng akwe che ororitosi nguno! amu tatun otei ak orirtosi! ²⁶ Mutyo akwe yo mwoe biko tugul che kororon agobo akwe! amu kigoyachiko u nyoto kwanisiekwai maotik che bo lembech. ²⁷ Ago amwowok akwe che ogase ale ocham bunikwok , oyachi che kororon icheget che sosook. ²⁸ Oberur icheket che chubok ak osachi icheket che matinye kong ne kerenok. ²⁹ Ak inendet ne irabachin togilgiliet age, igochi togilgiliet age ak inendet ne sarenin ngorieng'ung ko me-ete mbo sambung'ung. ³⁰ Igochi age tugul ne some ak inendet ne sarenen tukuguk ko mata ta iwekune kogeny. ³¹ Ak kou yo omache koyaiwok biko , oyachi ak akwe kou noto. ³² Ngocham anyun icheget che chamok, otinye melekto nee? amu mbo kiptengeginik kochame agiche icheget che chame. ³³ Ak ngo yachi che kororon icheget che yaiywok che kororon , otiny kongoi omu mbo kiptengeginik koyae kou noto. ³⁴ Ak ngibesendochi biko che ibwotii ile tun wegu, otinye kongoi nee? amu mbo kiptengekinik ko besendochini kiptengekinik alak asi konyor che teno chegichet. ³⁵ Ago ocham bunikwok , ak oyai ne kararan , ak obesende , amogany onyoru kogeny si koeet melektang'wong , ak oegu werikab inendet ne toror mising ,. amutalaa inendet eng icheget che matinye kongoi ak che aachen. ³⁶ Oegu che tinye rirge amu ko u kwandang'ong ne tinye rirenetab ge. ³⁷ A moruokchi , asi makirwokwok , amos, uschi chi asi tun koma kisuschok, otiach asi tun kitiachak , ³⁸ ogoite asi tun kegonok, okere ne kararan ne kigi nyit, ne kisachasach koto korara, choto che tun indoi biko tegetikwok. Amu kereiwekwok ne ogeree ko nyoto ne tun kigerurenok ak akwe. ³⁹ Ak kimwoji alewenet koleji , imuchi kipkoratiat kondochi kipkoratiat? Tos mororokchi tuwai kebenet? ⁴⁰ Masiire kayoktoik kanetindetago inendet ne kigonetak kogergeitu ak kanetindennyi. ⁴¹ Amu nee si geere betbetiat ne mite kondab werit ne otupche, ago mebwati musukyet ne mi kondang'ung inendet? ⁴² Nda imuktoi ano ileji lemeng'ung tupchenyu , inganemun betbetiet ne mito kondang'ngung ago mebkat musukyet ne mi kondang'ung inyendet? wei chombilindoni inemu korok musukyet ne mi kondang'ung inyendet si yo kaigeerte komie , imuch anyun inemu betbetiat ne mi kondab tupcheng'ung. ⁴³ Amu mami ketit ne kararan ne iye logoek che yachen , ama mi ketit ne ya ne iye logoek che kororon. ⁴⁴ Amu naat ketit age tugul eng logoek che iye, amu mabute biko logoekab mogoonik eng katok ak abute biko logoekab sabibu eng ketitab katok. ⁴⁵ Inemu chito ne kararan kito ne kararan kobun konoruet ne kararan ne mi muguleldannyi, ak i nemu chito ne ya kito ne ya kobunu konorwennyi ne ya ne mi muguleldannyi, amu che mwae kutinyi ko che nyiitat muguleldo. ⁴⁶ Amu nee si oguurena kiptaiyat amoyae tuguk che amwae? ⁴⁷ Chi age tugul ne nyonjino ak kogas ngalekchu ak koyai , aboruok kit ne kerge. ⁴⁸ Kerge inendet ak chito ne teche got ne kibaal kwo ngweny missing ak konde tiik atyet ak ye kingo changit beek korus beekab kutyat ama imuch kotumtum, amu kig kiteech komie. ⁴⁹ Ago inendet ne kase ama yaei ko kerge ak chito ne kiteech goy eng nyung'unyek ama lumji ngweny tiik , kirus beekab kutyat ak kilul kasarata ak kieet luletab koyoto.