¹ Ak kingota kochikchini tuiyet inedet ak kogase ng'olyotab Jehovah , kotonon inendet eng tabandab araraita ne bo Genesaret. ² Ak kigeer moingonik aeng che bo beko ko teleldos eg tabandab araraita ago kima komi namikab njirenik, kiba koun netisiekwai che kinamee njirenik. ³ Ak kilany moinget age ne kibo simion kosom koole konaktae kwo ainet orit kitigin. Ak kitebee ngweny anyun ak konet tuiyosiek eng barakutab moinget. ⁴ Ak ye kinga kotar konetishee , koleji simion kweri moinget ta konakta orit ole chang beko , ak orekte netisiekwok konamis. ⁵ Ak kiwolji simion koleji inendet Kiptayandani kogiboisie kemoi koech ama kinyoru kiy, ago amu ng'olyondeng'ung arekti netit. ⁶ Ak kingo yai choto tugul ko kinam njirenik che chang ak kegerer netingwai . ⁷ Ak kiguur choronokwai che kimi moingonik alak asi kotort, kobwa anyun ak konyiit maingonik tuwai, kot kotoi moingonik koba kebeber. ⁸ Ago kingogeer simion petero , kobutyi kutung'oikab Jeiso ak kole weechige eng yub amu aii kiptengekchoo eeh kiptayandani. ⁹ Amu kikwong'io , ak tugul che kimi ako inendet agobo njirenik che kiga konam. ¹⁰ Ak kiwong'io aiche Jakobo ak johana werikab Sebedi che kiboisie tugul eng kibagenge ak Simion . Ak kileji Jeiso simion , ameiyweisie kong'eete nguno iegu ne irame biko. ¹¹ Ak yo kingo kagokweri moingonikwai kobwa tabandab araraita , kobgakta tuguk tugul ak korub inendet. ¹² Ak kingo ta komi kokwet age , kogimi chi ne kinyitat konjoriosiek , ak yo kingo geer bindendet Jeiso , kobut kosyeb mo , ak ko saisai kole kiptayandani , ngicham imuchi inyaa. ¹³ Ak kiogoito anyun eunyi kotiny inendet ak kole amuchi anyain . Ak kasarata koistoke konjoriok eng inendet ¹⁴ Ak king'at anyun koleji koto memwoji chi ago weui ak iborjige tisindet ak igoite chebo kanyaet, ko u yo king'at Musa koek baornatet eng icheget. ¹⁵ ago kiletage koem bororiosiek che chang che loen agobo inendet , ak kibwa tuiyosiek konyo kogas tugul ak asi konya icheget tugul agobo mianwekwai. ¹⁶ Ago kiistoke kwo tumoo kwen bo kosa. ¹⁷ ak kingo to konetisie eng betut age ko mui Parisaik ak kanetikab ng'atutik koteptos eng oloto , xhe kibunu kokwotunwek tugul chebo Galili ak judea ak Jerusalem ak kimi kamuktaetab kiptaiyat ak inendet si nkonya icheket. ¹⁸ Ak keer anyun kigimut chi age komi eng kitogunyi ne kimakong'ete , ak kicheng oret ne imuchi komut inendet agoi tait ab Jeiso. ¹⁹ ak kingo mata konyor oret amu chang'indab biko , kolany Kipkesiekut ab kot ak kochorta inendet komi kitogunyi agoi kwenut eng taitab Jeiso. ²⁰ kingo geeer Jeiso kayaneng'wai koleji chichi, kagenyoun kaat tengekwogiguk. ²¹ Ak kitoi sirik ak paresaik, kobwat agobo logoiyondonoto kole, ng'o nyito mwae ng'alechu yaachen? ng'o ne imuchi konyochi chi kaat ne ma jehovah inege? ²² Ago yo kingo nai Jeiso kabwatutikwai , kowolji koleji, obwati nee eng mukulelwekwok? ²³ Nee ne keigei, ngele kiginyoun kaat tengekwogiguk, nda ngele , ng'eet ak iwechigei? ²⁴ Ako si onai ole tinye kimnatet weritab chi eng ngweny konyochi kaat biko tengekwagik ( koleji chito ne kimeat borta) Amwaun ale ng'eet kesen kitogung'ung ak iwechigei kong'ung. ²⁵ Ak king'et kasarata anyun eng taingwai ak kiib kitokunyi ak kwo konyi kolosunoti Jehovah. ²⁶ Ak kikwong'io icheket ak kilos Jehovah ak kicholyo mising kolen , kagegeer kwong'utik che chang rani. ²⁷ Ak kingobata tuguchoto tugul kwo tai konyor taagikab aisurut ne kigiguure Lawi kotebche gweny eng ole kitaage aisurut ak koleji rubaa. ²⁸ ak kibagakta tuguk tugul ak korub inendet. ²⁹ Ak kigkwongji Lawi eng koinyi ak kimi taagikab aisurut che chang ak biko alak che kiteptos ngweny tugul koamistos ak inendet. ³⁰ ak king'ung'ungji parisaik ak sirikwai kayaktoik, kole kaine asi oamisiei ak oeisei ak taagikab aisuru ak kiptengekinik? ³¹ ak kiwolji Jeiso koleji mamage kiy chepkerichot biko che chamege , kobate che miandos. ³² Kima nyo aguur che bo iman ago kiptengeginik si kosiik. ³³ Ak kileji inendet, irugutige konyil che chang kayoktoikab johana ak kosaa ak yae ko u noto agiche che bo parisaik a koamisie cheguket ak koeise. ³⁴ ak kileji Jeiso icheket tos omuchi orugut che kagiguurji katunisiet koto komi sandet ak icheget? ³⁵ Ago bwanii betisiek che tun istoege icheget sandet , korugutgei anyun eng betusiechoto. ³⁶ Ak kimwochi icheget kalewenet kogeny koleji mami chi ne kereri kebeberta ne bo ngoriet ne leel ak konapchi ngoriet ne os , amu ngo yai ko u noto ko palei nyoto leel ak kogeny ko manamege kebeberta ne leel ak ne os. ³⁷ Ama mi chi ne rongjini divaik che lelach lolotinwek che osen, ngo yai ko u noto ko kereri divaik lolotinwek ak kotumda ge ak kong'emogis lolotinwek. ³⁸ Ago muchini kendeno divai che leelach lolotinwek che leelachen . ³⁹ Ama mi chi ne ngo kagoe divaik chebo keny koto komache che leelach, amu mwae kole anyinyen che bo keny.