¹ Ak king'eetio tuiyet komugul ak komutchi inendet Pilato. ² Kitoi anyun komwaitae ngaal kole, kiginyoru chichi komaasi bororienyo ak koete kegochi aisurut kaisari inendet, ak kolen ai Kristo , laitoriat. ³ Ak kitebee Pilato, kole, ii laitoriatab Yahudik? Kiwolji kole kaimwa. ⁴ Ak kileji Pilato tisiik che eechen ak tuiyosiek manyorji lelut chichi. ⁵ Ago kititirjimising kole kiibei biko, konetoti eng Judea komugul, kotoune Galili agoi koit olito. ⁶ Ago kingogas Pilato ngolyondonoto, kotebee kole ngot ko tos Galilindet chichi. ⁷ Ak kingonai kolebo bounatetab Herod , koyokto kemututa Jeiso kwo ne kimi inendet agine Jerusalem betusiechoto ⁸ Ak kingogeer Herod Jeiso, kobaibait mising, amu kimache kong'etee keny kogeer inendet, amu kia ko kas tuguk che chang agobo inendet ak kimache nda keer kwong'utk koyaak eng inendet. ⁹ Kiteepse inendet eng ngalek che chang ago ma wol kiy. ¹⁰ Ak kitonondos tisiik che eechen ak siriik, kititirji inendet eng kimnatet. ¹¹ Kiimining inendet Herod ak askarikchi ak kochoosinendetak kolakchi ngoriet ne kararan mising ak kowekta ole mi Pilato kogeny. ¹² Ak kiek chorondok pilato ak Herod eng betunoto, amu kita kosastos icheget eng tai. ¹³ Ak kiguur Pilato tisiik che eechen ak bounik koboto biko kobwa tugul ¹⁴ ak koleji icheket, komutwa chichi ak komwa ole imoosi biko, ak ogeero kaatebee anendet eng taing'wongak manyorji chichi lelu eng ng'alechoto omwaitae inendet. ¹⁵ Ololo, mbo Herod agine , amu kawekkwech inendet ak ogeero, ma yai kiy inendet ne nyoljini meet! ¹⁶ Noto anyun , abire inendet asi atiakta. ¹⁷ Amu ki ng'atutiet kotiakchi agenge eng betutab tumdo. ¹⁸ Ak kibolyo tugul, kole iste chichi ak itiakwech Barabas. ¹⁹ Barabas ko chi nekiga ketoorji korgoret akobo wasetab biko eng nganaset ak borisiet. ²⁰ Ak king'ololji Pilato icheket kogeny komache kotiach Jeiso. ²¹ Ako kibolyo icheket kole igartat eng kimurtoiyot, igartat inendet. ²² Ak kimwachi icheket nebo somok koleji, kayai nee ne ya chichi? Manyorji ngolyo inendet ne nyoljini kome. Noto anyun abire inendet asi atiach. ²³ Ak kitees kobolyo mising ,komache kole kigartat. Ak kiyai kutuswekwai koyan Pilato. ²⁴ Ak kitilanyun Pilato kiruoget koyaak ko u ye kimache icheket. ²⁵ Ak kitiakchi inendet ne kiga ketoorji korgoret agobo wasetab biko ak borisiet ne kigo soom icheket. Ago kiigoito inendet Jeiso asi koyachi ko u ole moktoi. ²⁶ Ak kingo ta komuti inendet kogiich Simon kurenindet, ne kibunu koret age, ak kikilapchi kimurtaoiyot asi koib korube Jeiso. ²⁷ Ak kirub tuiyet neo ne bo biko koboto chepyosok che kiwaktos ak korirjinoti inendet. ²⁸ Ago kigushikong Jeiso icheket, koleji tibichu bo Jerusalem, matorirye agobo ane , ago orirjige ak legukwok. ²⁹ Amu ogeero , bwoni betusiek che tun len icheket iberurotin sononik ak mootinwek che iiyo ak kinaik che ma kichuchun. ³⁰ Ngoiyo kotoi icheket kongalalji tulonok olulchech, ak koleji tulonok che mengechen kotuch. ³¹ Amu ngotko yai tuguchu eng keti ne nyalil, koteptoi ano anyun eng ne yaamat. ³² Ak kimi kiptengekinik aengu che kigimuti koboto inendet asi ba kobar. ³³ Akkingoi yo kiguure calvary, ko yoto ole kigigartate inendet ak kiptengekinichoto age eng komostab tai ak age eng komostab katam. ³⁴ Ak kile Jeiso, Aboo, nyochi kaat icheket amu ma nai kito ne yaei. Ak kipchechige ngoroikji eng wirtoisietab barbarek. ³⁵ Ak kitononyo biko kogeere, ak kirorichi inendet bounik, kole kisoru alak. Ingosoge kira ngo Kristo nyito, ne lewnot ne bo Jehovah. ³⁶ Ak kichurachur agiche askarik inendet kobwani ole mi me inendet, kogochi maiyek che midililen, ³⁷ kolen , ngiti ii laitoriatab Yahudik isoruge. ³⁸ Ak kimi sirutik eng barakutab metinnyi che mwae kolen, NI KO LAITORIAT NEBO YAHUDIK. ³⁹ Ak kichuachur inendet ageneg eng kiptengeginichoto kiga kigartat kole tos ma ii Kristo inye? Soruge ak isorwech agache. ⁴⁰ Ago kiwol age ak koger kong kole meiweii Jehovah mbo inye ak imi kiruoget agenge ak inendet? ⁴¹ Ago bo iman nyinyo amu kagigonech kou boisionikcho, ago mayai chichi kiy ne ma nyolunot. ⁴² Ak kileji Jeiso, inaana yo tun inyoni eng bounateng'ung. ⁴³ Ak kileji Jeiso inendet, amwaun iman ale, kitebche tuwai rani eng paradiso ^{45 44} Ak olo bo sait lo, kobiit tuindo eng emet komugul agoi sait sogol, ak kimato kokwengtoi asista, ak kigereerak kwenutab anget ne kigo kiito eng ole tilil nebo ekalut kobun aeng. ⁴⁶ Ak king'alal Jeiso eng kutit ne o , kole Aboo, kaande tamirmiriennyu euneguk, ak kingo ka komwa nyitokogoito tamirmiriet. ⁴⁷ Ak ingogeer kiptaiyatab bogol tuguk che kayaagis kolos Jehovah, kole ngagaa kibo iman chichi. ⁴⁸ Ak kingogeer tuguk che kiyaagis tuiyosiechoto tugul che kigaruruchge asi korat setio, kowektage, kowektagei kolugoti tegetik. ⁴⁹ Ak kitonondos eng ole loo tugul che kiingen ge ak chepyosok che kirubu inende kobunu Galili kole asi kogeer tuguchoto. ⁵⁰ Ak ogeero, kimi chi anun ne kigiguure Joseph, ne ki chitab kapkirwok chi ne kaminen ak ki chi ne kirube imanda. ⁵¹ Ak kima cham chichoto kiruogeng'wai ak boisionikwai. Ki bo Arimatea, koretab Yahudik , ne kigonye agine bounatetab Jehovah. ⁵² Kiwo chichoto ole mi pilato ak kosom bortab Jeiso. ⁵³ Kiwolune kocho ngweny ak komaise nget ne nyigiis ak momogoon eng kererit ne kikabalchi koita, ole kitomo ketupchi chi age. ⁵⁴ Ak betut ne kigichobekee ak kika korik sabato. ⁵⁵ Ak kirubu chepyosok che kigabwa koboto inendet kobunu Galili ak kogeer kererit ak ole kigakimogonda bortanyi. ⁵⁶ Ak kiwektage koba asi kocob nyamdutik ak mwanik ak komuny eng betutab sabato komungyo ko u ng'atutiet.