¹ Ak kingo neti biko eng betut age eng Kapkorosut, ak koamdoi logoiywek che miach, kobwa tisiik che eechen ak sirik konyor inendet ak kitesonu boisiek. ² Ak kimwochi inendet koleji mwawech, iyae tuguchu tugul eng kimnatetab ngo? nda ko ngo ne kigonin kimnatoni. ³ Ak kiwolji koleji ateebenok agine ngolyo ak owolwo. ⁴ Kabatisanetab Johana ko kibunu kipsengwet nda kibunu biko? ⁵ Ak kingololjige ichege , kole ngot kemwa kele kibunu kipsengwet, komwa kole koine asi moyan inendet? ⁶ Nda kimwa kele kibunu biko, kowirech biko tugul eng koik amu kiyoni icheket kole ki maotio Johana. ⁷ Ak kiwol kole , kimaimuch komwa ole kibunu. ⁸ Ak kileji Jeiso icheket, mbo ane ko mamwowokkimnatet ne ayae tuguchu. ⁹ Ak kitoi komwachi biko kalewenoni, kole kikol chi sabibuk eng mbar ak ko bokokchi bich alak k kwo emet age ne loo eng betusiek che chang. ¹⁰ Ak kingoit betut koyokchi otwogindet bichoto asi kogochi icheket inendet logoekab mbaranoto, ago kibir bichoto inendet ak koon kwo buch. ¹¹ Ak kiyokto kogeny otwogindet age ak kigibir noto agine ak ketewer ak koon kwo buch. ¹² Ak kiyokto kogeny ne bo somok , kebir aine ak kowirji sang. ¹³ Ak kile chitab kobo mbaret, atyaene anyun? Ayakti werinnyu ne achame nda mangab kogonyit. ¹⁴ Ak kingogeer bichoto inendet kong'alaljige ichegei kole nyiito ne tun bunchi tuguk , ngebar inendet nda ma tun kendie tuguk. ¹⁵ Ak kitoorta komanda eng mbaretab sabibuk ak kobar. Ara itoi nee anyun chitab kobo mbaret bichoto? ¹⁶ Nyoni anyun inendet ak kobar bichoto tugul ak kogochi biko alak mbaretab sabibuk. Ak kingogas icheket, komwa kole ololo matkoek nyoto! ¹⁷ Ak kichiilji kong icheket ak kole , nee anyun ne kigisir: koita ne kisas tegik ko nyoto ne ka koek toloitab lugta? ¹⁸ Ak chi age tugul ne ibutchin koita koile konyaknyakani ak inendet ne ibutchini koita kong'ae koek bumbus. ¹⁹ Ak kicheng sirik ak tisiik che eechen konam inendet banata , ak kiiywei icheket biko amu kinai kole mwae kalewenoni agobo icheket. ²⁰ Ak kiribot icheket inendet ak koyokto segeik che kiyaegei koek che bo iman asi koname inendet ngalekchi asi kogoito inendet kwo tai ne bo bounatet ak kimnatetab bounindet. ²¹ Ak kitebee inendet kole kanetindoni kinget kele imwae ak inetisiei eng iman ago metitii chi ak ineti iman oretab Jehovah. ²² Tos chame ng'atutik kegochi aisurut kaisari nda olo? ²³ Ago kinai kenisiengwai, ak kileji icheket, ²⁴ obaruo tongiloyot, bo ng'o itondo ak sinitik che tinye. Ak kile bo Kaisari. ²⁵ Ak kileji icheket ogochi kaisari tuguk che bo kaisari ak ogochi Jehovah tuguk che bo Jehovah. ²⁶ Ak kima imuch koname ngalechoto eng taitab biko ak kikwongio eng wolunennyo ak kisisyo. ²⁷ Ak kibwa alak eng sadukaik, konyor inendet icheget che mwae kole mamito ngeetyet ak kiteebe inendet, ²⁸ kole kanetindoni kisirwech Musa kole ngo ne werit ne otupche , ago tinye chepyoset ne tomo kosich lekwa kondi ne otupche chepyosonoto asi kolalji mat kesendannyi. ²⁹ Kimi anyun werik tisabu che kitupcho ak kitunii ne bo tai ak kime ko masich lekwa, ³⁰ ak kiindi ne bo aeng. ³¹ Ak ko u noto nebo somok ak kiek ko u nyoto tugul ko tisab kibek komasich lekwa. ³² Ak kingobata kome agine chepyosonata. ³³ Ara anyun tun koegu chepyosetab ng'o eng icheget? Ago kitun icheket tugul ko tisab. ³⁴ Ak kiwolji Jeiso icheket kole, werikab turgui kotunisie ak keildoi alak ketun. ³⁵ Ago che kiityini kele nyoljinikonyor betusiechoto bwani ak ng;etyet eng che kikobek, ko ma tun itunisie ama kigoitoi ketun. ³⁶ Amu ma komuchi kobek kogeny, amu kergeitu ak malaikaisiek ak icheket ko werikab Jehovah amu werikab ng'eetiet. ³⁷ Ago ng'etoos che kigobek, kiibor Musa agine eng ole kigisir agobo kertit , ole kiguure kiptaiyat , Jehova ne bo Abram ak Jehovah ne bo Isak ak Jehovah ne bo Jakobo. ³⁸ Inendet ko ma Jehovah ne bo che kigobek, ago bo che saptos, amu saptos tugul eng inendet. ³⁹ Ak kiwolji sirik alak koleji kanetindoni, kaimwa komie . ⁴⁰ Amu kimata kogany icheket koteebe inendet teebut age tugul kogeny. ⁴¹ Ak kileji icheket, oteptoi ano asi komwae icheket kole Kristo ko weritab Daudi? ⁴² Amu kimwa Daudi inendet eng bukuitab tienwogikab kolosunet kole, kileji kiptaiyat kiptaiyandennyu tebe eunnyu ne bo tai, ⁴³ agoi tun ayai buniguk koek ngecheretab kelyeguk. ⁴⁴ Kuure anyun Daudi inendet kiptaiyat, ara egundoi ano anyun werinnyi? ⁴⁵ Ak kimwachi kayoktikchi kogasei biko tugul koleji, ⁴⁶ oripge eng sirichu che chame kobendoti kolaachi ngoroik che koen ak kochamei kakatisiet eng siroisiekab oldoisiet ak ngecherok che bo tai eng igorwek. ⁴⁷ Ak kosare mosogik gorikwaiak kosae sautik che koen, kogenisie. Ta tun nyoru biko che u chuto kiruoget ne o mising.