¹ Ak kilji kayoktoikchi, kimi chi ne kimokorio ne kitinyei ribindetab konyi ne kiging'ololen kele kinyernyere tugukab mogorionyi. ² Ak kiguur inendet ak koleji nee ngalechu aagase akobo inye, iboru kira boisietab ripseng'ung, amu ageere ale imuchi maiegu ribindetab konyu kogeny. ³ Ak kimwa ribindonoto eng muguleldonnyi kole, ngo sayai nee anyun? Amu kigoistoo kiptayandennyu eng boisiet amatinnye kimnatet abatis, ale asomso ko katewerge. ⁴ Kaanai kito ne ayae, asi ngo kageona eng boisiet, komuchi kotaacha eng gorikwai. ⁵ Ara kiguur icheket tugul che tinyei besendab kiptayandennyi ak koleji nebo tai, itinye inye besenwokik che tia chebo kiptayandennyu? ⁶ Ak kileji, terenik bogol chebo mwanik, ak kileji nam balalieng'ung ak isir konom. ⁷ Koleji age kibesen inye ata? Kole terenik bogol chebo nganuk, ak koleji nam balalieng'ung ak isir tamanwogik sisiit. ⁸ Ak kiloos kiptaiyat otwogindonoto ima kobo iman, amu kayai eng ngomnotetamu ngomen werikab ngwenyuni eng ibindagwai kosiir werikab labkeiyet. ⁹ Ak amwawok ale ochengchige chorondok eng oretab magornondi asi tun ngog, ndama tun ngogesgei ,, ndama tun kotaachak eng gorikab koigeny. ¹⁰ Inendet ne kiyani eng che ng'ering, kiyani agine eng che chang, ak inendet ni makiyani eng che ng'ering ko makiyani eng ole mi che chang. ¹¹ Ngoto ki maiegu nebo iman eng magornatet ne ma bo imanda , ko ngo ne imuchi koyanin eng magornatosiekuk che bo iman? ¹² Ak ngoto kimata iegu ne kiyani eng tugukab chito age ko tos ngo anyun ne konok tuguk chekwok? ¹³ Mami otwogindet ne imuchi koboisiechi kiptainik aeng, amu akoi konyernyere age, ak kocham age, nda konamgei ak age ak kosaas age. Momuchi oboisiechi Kiptaiyat ak magornotet. ¹⁴ Ak anyun Parisaik che kichame silingisiek ko kigas tuguchoto tugul ak kororichi inendet. ¹⁵ Ak kileji, akweget che okararanige eng taitab bik, ago inget kiptaiyat mugulelwogikwok, amu age tugul ne iloosubik ko machamdaat eng taitab kiptaiyat. ¹⁶ Kitebi ng'atutik ak maotik agoi koit Johana . Kong'eete betunoto keamdoi logoiwek che tililen che bo bounatetab kiptaiyat, ak mangjini chi age tugul eng kimnatet. ¹⁷ Ago wisiis kosiirto kipsengwet ak ng'weny, kosiir kebut sirutiet agenge ne bo ng'atutik. ¹⁸ Age tugul ne oone chepyosenyi ak kotun age kobaegei, ak chito ne ituni inendet ne kiagoon sandennyi ko chebaigeiya. ¹⁹ Kimi chi anyun ne kimagorio ak kiloji ngoroik che kiga kimarmare che arusen ne birir ago ki nyikisen, ago ki kiptaguria ne kiamisie komie betut age tugul. ²⁰ Ak kimi kibanania ne kisome ne kigiguree Lasaru, ne kigakimogon eng kurgenyi, ago kitinye mook eng bortannyi tugul, ²¹ ak kimache inendet kebae tuguk che irarau eng mesetab mogoriandeni ago kibwa seseni ak komeel mookab chichoto. ²² Ak kisiirto kibananianoto etut age, ak kimutyi malaikaisiek inendet konde tegetab Abram, ak kime agine magoriondonoto ak kigitub, ²³ ak kingo mi oritab che kigobek konyal barak komi nyalida neo, koger abram komi ole loo komi Lasaru tegennyi. ²⁴ Ak kite ak kole , Aboo abram rirena ak ikoji Lasaru kotiny beko eng walitab mornennyi , si kotiswo ng'elieptannyu amu ami ngw'anindo eng mai lalei mising. ²⁵ Ago kile Abram, weri inaan ile kingo isobe ko kiinyoru tugukuk che kororon, ko u nyoto Lasaru kinyoor agine tuguk che yaachen, ago ra kibaibai inendet eng yu, ago inye imi ng'wanindo ne o. ²⁶ Ak tabanutab tuguchu tugul, ak eng kwenunnyo komi kererut ne o ne ibesiech ache ak akwe asi che mache kolong oloo omi ko maimuchi, ak che mache kolong oli kimi ko maimuchi. ²⁷ Ak kile asaisain anyun baba ale iyokte inendt kwo gotab kwandannyu- ²⁸ amu atinye tupchosiekchu mut, kwo koteechi icheket asi mabwa ole mi nyalilda ne o. ²⁹ Ak kileji Abram, tinye Musa ak maotik, ngogas icheket. ³⁰ Ak kileji ololo Aboo abram, ago ngoto wo chi ole miicheget ne bunu oritab che kikomeiyo ko sigu. ³¹ Ak kileji inendet ngoto magas chebo Musa ak maotik, kotoe koyan mbo chito ne ng'ete eng che kikomeiyo.