¹ Ak kileji Jeiso kayoktoichi, imuchi ko memukakse, age anyun ko bwani kaimutik ne matiny, mutyo eng inye ne bunun! ² Kita keigei eng inendet keratyi koitab bai katinyi ak kewirji ainet neo , kosir kotaachtach che mengechen kobutyo. ³ Oripge akweket , ingoto lelun ne otupche ikergong, ak ngoto siik inyochigaat. ⁴ Ak ngoto lelun konyiil tisap eng betut agenge ak kowechke konyiil tisap ak kole kaasiku, inyochi kaat. ⁵ Ak kileji che kiyoktoi, kiptayandani, tesweech kayanenyo. ⁶ Ak kile kiptaiyat, ngot ko itinye kayanet ne kerke ak kesuekab karandila, imuchi imwoji mogoiywoni ile ketutun imang'une tikitik ak keminjin ainet ne o, ak kogasak iit. ⁷ Ago mi ngo eng akwe ne tinye otwogindet ne ibatisiei nda kobae tuga, ne leji yo kait kobunu mbar, nyo itebi ngweny ak iamisie? ⁸ Tos maleji inendet, keigei ichobwa tuguk che aame ak igona, ngo kaamisie ak aeise asi ngaitie, imuchi iamisie ak ieise aginye? ⁹ Tos wekji kongoi otwogindennyi amu kayai tuguk che kakearorji? ¹⁰ Ara u nyoto eng akwe , ngaoyai tuguk tugul che kaororwok, omwa ole kii otwogik che matilei kiy, kagiyai kityo tuguk che kikakiororwech keyai. ¹¹ Ak kingo mi oret kowendi Jerusalem, kobunu kwenutab Samaria ak Galili. ¹² Ak kingo it suktet age kotuyo ak murenik taman che kiame kerenganik, kinondos eng ole loo ¹³ ak kigurso eng kimnatet neo, kole Jeiso kiptaiyat rirenech. ¹⁴ Ak kingogeer icheget koleji oba bonyoru tisiik, ak kingobendi kotililitu. ¹⁵ Ak kingogeer agenge eng icheket kole kagosob, kowektage ak kotienot eng kutiit ne o kolosunoti Jehovah. ¹⁶ Ak kibutyi kelyekab Jeiso komwachini kongoi. Ak ki samarindet chichoto. ¹⁷ Ak kimwa Jeiso , kole , tos ma ka taman che kakisoob? miano chigei alak sogolu? ¹⁸ Tos mi mbo alak che kawechke kolos Jehovah nda kipsirtoyondoni kityo. ¹⁹ Ak kileji inendet ngeet ak iwechike kagonyain kayaneng'ung. ²⁰ Ak kingo teebe parisaek koleji tos choni au bounatetab Jehovah, kiwolji icheget koleji, machoni kegeronu. ²¹ Ama kimwoei kele geero mitei oli, nda komi olin! ogeero mito bounatetab Jehovah kwenung'wong. ²² Ak kimwoji kayoktoikchi koleji tatun bwani betusiek che omache ogeer betut agenge ne bo weritab chi, ago maomuchi ogeer. ²³ Ak tun kelejinok ogeer mi yu, nda ogeermi yun amat obe , nda oub icheket. ²⁴ Amu kerge ak kaweket ne ilyelune kebeberta age eng kipsengwet ak kokwenyi agoi komoswek alak chebo kipsengwet, tun u nyoto weritab chi agine eng betunyi ²⁵ Ago iite konyalil inendet eng tuguk che chang ak kesaas eng ibini. ²⁶ Ak ko u ye ki u eng betusiekab Noa, ko u nyoto agine eng betusiekab weritab chi. ²⁷ Kiamis, koeiso ak kiib chepyosok che chang, kigoito ketun, agoi betut ne kichu Noa maingenyi ak kinyo chemurwambei ak kibar icheket tugul. ²⁸ Kerge ak betusiek che kibo lot, kiamisie , kieise, kialisie, kiodoi, kigolso ak kitekso. ²⁹ Ago betut ne kimanda Lot eng Sodom ak kirobon maat ak koik che laldoskobun kipsengwet ak kobar icheket tugul. ³⁰ Ko u nyoto anyun , ngoit betut ne kiboru weritab chi. ³¹ Eng betunoto, chi age tugul ni mi got barak matiwalu chisut tugukuk che mi got oriit, ko u nyoto matiwechke mbo inyo ne imite mbar koto mewechke. ³² Onaan chepyosetab Lot. ³³ Age tugul ne tieme kosor sobondannyi kobeeti, ak age tugul ne ibeti sobondannyi kesoru ³⁴ Amwawok ale eng kembounoto, kenyoru bik aeng eng kitogut ageneg, kimuti agenge kemeto age. ³⁵ Tun ng'oisei chepyosok aengu kibagenge, kimuti age kemeeto age. ³⁶ Tun mi biko aengu mbar, kimuti age kemeto age. ³⁷ Ak kitebe inendet koleji, ano kiptayandani. ak kileji ole mi musyot, korurukchinige oloto motongwek agiche.