¹ Ak ye kingo siirtoi Jeiso, kogeer chito ne ki korat kong'ete ko kagisich. ² Ak kitebe inendet alamalyennyi koleji, "Rabii, ng'o ne kiyai tengekto, chichi anan sikikyi, si kesich ko korat?" ³ Kowol Jeiso koleji, "kimayai chichi tengekto, nda sikikyi, ago si kobit kotook boisionikab Jehovah eng' inendet. ⁴ Kanyol ayai boisionikab inendet ne kiiyokwo ko ta kobeet. Amu nyoni kemout ne ma komuchi chi kobois. ⁵ Kote ko to mi ng'weny ko a lapkeiyet ab ng'weny." ⁶ Ye kingo kagomwa ko u noto, kong'utyi nyung'unyek ak kotangwar ak koiile konyekyi nyung'unyechoto. ⁷ Ak kolenji inendet, "ui iunde eng' tamboiyot ab Siloam" (ye kiweech kele "kiyokto"). kiwa anyun koun ak kowechge kokagogerto. ⁸ Kimwa anyun bikab kokwet ak biko che kigageer eng' tai ko korat ak kole "tos ma inendet ni ne kicham kotebye ak kosomse?" ⁹ Kole alak, "inendet". Kole alage, "achicha ago kerge ak inendet." Ago kile chichoto "a i inendet." ¹⁰ Kolenji anyun iche inendet, "kogiyatita ano konyekuk?" ¹¹ Kowol kole, "kotangwar nyung'unyek chi ne kegure Jeiso ak koilie konyekyu ak kolejo 'ui Siloam ak iunde .' Aawe anyun aun ak ageerte." ¹² Kileji, "mi ano inendet?" kowolji koleji, "mongen." ¹³ Kiimut anyun iche chichoto ki korat eng' tai kwo ole mi Parisaik. ¹⁴ Ak sabato betu noto kitangwari Jeiso nyung'unyek si koyaate konyekab chichoto. ¹⁵ Kotebe Parisaik kogeny kole katebto ano si igeerte, kowolji icheget koleji, "kaiile konyekyu nyung'unyek chi katangwar, ak kaun, ak agerte." ¹⁶ Kole alak che bo Parisaik anyun, "mabunu Jehovah chichi amu mariibe Sabato." kole alage, "imuktoi ano chi kipteng'ekyo koyai kaborunoik chi u chu?" Ak kibiit toiyet eng' kwenung'wai. ¹⁷ Kigileji kogeny chito ne korat , "imwoe nee agobo inendet, amu kayaat konyekuk?" Ak kiwol kole, "maotio." ¹⁸ Ma iyan anyun Yahudik agobo inendet kole kogorat ago kagogeerto agoi koguur sigiikab chichoto. ¹⁹ Ak kotebe koleji, "tos wering'wong' ni ne omwoe ole kigisich ko korat? Ko katebto ano si kogeertoi ng'uno?" ²⁰ Kowol sigikyi kole, "werinyo nito ak king'et kele kigisich ko korat. ²¹ Ago making'et ole katepto si kogeerto nguno ak making'et chito ne kayote konyekyi, oteebe amu kagoeet inendet, ng'omwa inegei." ²² Kimwa ngalechu sigikyi amu kiiywei Yahudik. Kigagosib kochamnyeji Yahudik kole ngong'aany chi age tugul kole inendet ko Kristo, kibeetoi eng' sunagogit. ²³ Amu eng' nito anyun, komwa sigikyi kole, "otebe amu kagoet." ²⁴ Kiguur ne bo aeng' bichoto, chichoto ki korat ak koleji, "igochi Jehovah kalasunet, amu king'et kele kipteng'ekyo chichi." ²⁵ Kowol anyun inendet kole, "ng'o kipteng'ekyo chichoto ko mangen, kit agenge ne angen ko kia korat ago ageertoi nguno." ²⁶ Koleji anyun iche inendet, "kayaun nee? Kayatita ano konyekuk?" ²⁷ Kowolji inendet icheget koleji, "kamwawok ama ogas, kalya si omache ogas kogeny? Omache oegu ak akwe alamalyennyi, tos?" ²⁸ Kong'emji kut iche inendet koleji "i alamalyennyi, ago kii ache alamalyetab Musa. ²⁹ Kingen kele king'ololji Jehovah Musa ago magingen ole bo chichi." ³⁰ Kowolji chichoto icheget koleji, "kwongut nito anyun amu mongen ole bunu ano, ago kagoyaat konyekyu." ³¹ Kingen kele magose Jehovah kipteng'eginik, ago ng'olosu chi age tugul Jehovah, ak koyae magenyi kogase inendet. ³² Kong'ete ng'etoi ng'weny ko ma kigas kele kiyat chi konyekab chi ne kigisich kogorat. ³³ Nda ma bunu Jehovah chichi ko magoi imuch koyai kiy. ³⁴ Kowolji inendet koleji, "kigisikten iman teng'ekwogik ak iyaege inetech?" Ak kitoorta inendet kwo sang'. ³⁵ Kigas Jeiso kole kagetorta inendet kwo sang', ak ye kingo nyor inendet koleji, " tos iyoni weritab Jehovah?" ³⁶ Ak kiwol kole "ngo noto Kiptaiyandani, si kobit ayan inendet?" ³⁷ Koleji Jeiso "kaigeer inendet, ago inendet ni ng'ololi ak inye ." ³⁸ Ak kile, "Kiptaiyandani, ayoni," ak kigutungji kolos inendet. ³⁹ Ak kile Jeiso, "kianyo ng'wenyuni amu kiruoget si kobiit kogeerto che magertoi ak kogorio che keertoi." ⁴⁰ Kigas tuguchuto alak che bo Parisaik che kimi koboto inendet ak koleji, "kigoryotin agiche?" ⁴¹ Koleji Jeiso, "nda kiogoryotin akwe, nda motinye tengek, ago amu nguno omwoe ole kigeertoi, kotebye anyun tengektong'wong'."