¹ Amwowok Iman , iman ale, chorin ak ko rebin inendet ne mabunu kurget ak kochut biutab kechirek, ago sire kerwa. ² Ago mestowotab kechirek inendet ne bune kurget. ³ Yotyini inendet ribindetab kurget ago kose kechirek kutinyi ak koguur kechirekyi eng' kainaikwai ak kondoe iche. ⁴ Ye kagomanda tugul koba sang', kondoe ak korub kechirek inendet amu ingen kutinyi. ⁵ Ak marube toondet ago mwee, amu manoe kutitab toek. ⁶ Ak kimwochi Jeiso iche kalewenoni ago maiguiyo iche kole nee tuguchoto kiga mwochi. ⁷ Koleji anyun Jeiso iche kogeny, "amwawok Iman, iman ale, a i kurgetab kechirek. ⁸ Chorik ago rebik tugul che kindouneno ago ma kas kechirek ichee. ⁹ A i kurget.Ngwo chi age tugul go ne buno ane, kesoru ak kwo ak komanda sang' ak konyor ole kiyage. ¹⁰ Nyoni chorindet si kochor ak kobar ak kong'em. Kianyo si kobit konyor sobondo ak kotebto sobondo inne. ¹¹ A i mestowot ne kararan, igoitoi mestowot ne kararan sobondanyi agobo kechirekyi. ¹² Ago inendet ne otwogin ne ma mestowot ama chitab kobo kechirek kogere konyoni kimaget, kobokoktoi kechirek ak komwei ak konyo kimagetiet ak konam iche ak koyesta. ¹³ Komwee inendet amu otwogin ak mamoge kiy kechirek. ¹⁴ A i mestowot ne kararan ak anget kechirekyu ak kong'eno chechu. ¹⁵ Kou ye ing'eno Kwanda ak angen Kwanda ak agoitoi sobondanyu agobo kechirek. ¹⁶ Ak atinye kechirek alak che ma bo biuni, kanyol aget choto agiche si kogas kutinyu ak koek akwet agenge ak mestowot agenge. ¹⁷ Chomo anyun Kwanda amu noto, amu agoitoi sobondanyu si kobit anam kogeny ¹⁸ Masoreno chi ago agoitoi anege, atinye kimnotet agoito ak atinye kimnatet anam kogeny, kiataach ng'atutioni eng' Babanyu." ¹⁹ Ak kibiit toiyet kogeny eng' Yahudik agobo ng'alechuto. ²⁰ Ak kile che chang' eng' iche, "tinyei oindet ago ame iywek, kalya si ogas inendet?" ²¹ Kole alage, "ma bo ng'alechu chi ne tinyei oindet. Tos imuchi oindet koyat konyekab chito ne korat?" ²² Ak kimi igortab katabanet eng' Jerusalem ak ki betusek ab kaititindo, ²³ Ak kiwendot Jeiso eng' hekalut eng' keterut ne bo solomon. ²⁴ Kibwa anyun Yahudik komut inendet ak koleji "igonech ketebi eng' saget kot kotianit? Ng'ot i Kristo imwoiwech komie." ²⁵ Kowolji Jeiso koleji, "kiamwowok amoyoni boisiosiek che ayae eng' kainetab Babanyu ko choto che baoryianjino. ²⁶ Ago moyoni amu mo bo kechirekyu ²⁷ Kase kutinyu kechirekyu ak angen iche ak korubwo. ²⁸ Ak agochini iche sobondab koigeny ak magoi lusyo amasareno chi eng' eunyu. ²⁹ O Babanyu ne kigono iche kosiir tugul ama mi chi ne imuchi kosar iche eng' eutab Baba. ³⁰ Ane ak Kwanda ko ki agenge. ³¹ Konam anyun Yahudik koik kogeny kolen kowir inendet. ³² Kowolji Jeiso koleji, "kaborwok boisiosiek che chang' che kororon che bunu Kwanda, owiro agobo boisio nee eng' choto? ³³ Kowolji Yahudik inendet koleji, "makiwirin amu boisiet ne kararan ago amu mulset, inye ne i chi iyaege iegu Jehovah." ³⁴ Kowolji Jeiso bichoto koleji, "tos ma sirat eng' ng'atutieng'wong' kele kiamwa ale o i cheptailelisiek? ³⁵ Ng'o kigoguure inendet iche cheptailelisiek, icheket che kinyonji ng'olyotab Jehovah, (ako ma imukogse kebut ngatutiet), ³⁶ Tos omwoe agobo inendet ne kitabaan Kwanda ak koyokto kwo ng'weny olejini 'imulsei amu kiole a i Weritab Jehovah'? ³⁷ Ng'ot ko mayai boisiosiekab Kwandanyu, ko mat oyana. ³⁸ Ago ng'ot ko kiayai, ko agot ng'o moyana, oyan boisiosiek si kobit onai ak oyan ole mi Kwanda eng' ane ak ane eng' Kwanda." ³⁹ Kicheng' anyun kogeny konam inendet ago kichilile eng' eunekwai. ⁴⁰ Ak kiwo kogeny Jordan komosin ole kibotisionisie Joana eng' tai ak kitebi eng' oloto. ⁴¹ Ak kibwonji inendet che chang' ak komwa kole "kima yai Joana kaborunet ago tuguk alak tugul che kimwa Joana agobo chichi ko bo iman." ⁴² Ak kiiyan inendet che chang' eng' oloto.