¹ Kimian chito age ne keguure Lasaro ne bo Betania Ng'anaset ne bo Maria ak chepto ne tupcho ak Marta. ² Nito ko Maria ne kiil Kiptayat ak kouuse kelyekyi sumeekyi ne kimioni tupchenyi Lasaro. ³ Kiiyokyi tipichoto tupcho inendet ng'olyot koleji, "Kiptayandani, keero, imioni inendet ne ichome." ⁴ Ago kingogas Jeiso nito, komwa kole, "ma bo meet mionito ago bo torornatetab Jehovah ak kilosune noto weritab Jehovah." ⁵ Ak anyun kichome Jeiso Marta koboto Maria ne tupcho tuwai ak Lasaro. ⁶ Kingogas kole mioni kota kotebi betusiek aeng' eng' ole kimi. ⁷ Kingobata nito, koleji alamaliennyi, "ongebe anyun Judea kogeny." ⁸ Koleji alamalyet, "Rabbi, kocheng'e Yahudik kowirin eng' koik ak iwendi olindo kogeny?" ⁹ Kowolji Jeiso koleji, tos momi saisiek tamanu ak aeng' eng' betut? Ng'o wendot chi eng' bet ko makinachi amu keerei lapkeiyetab ng'wenyuni. ¹⁰ Ago ng'o wendot chi kemoi, kinachi amu momi lapkeiyet eng' inendet." ¹¹ Komwa tuguchu ak ye king'obata koleji icheket, "inuchi chorwenyo Lasaro, ago awendi ang'eeti inendet eng' ruondo." ¹² Koleji anyun alamalyennyi inendet, Kiptaiyandani, ng'ot konuuchi ko ka ga tokosobe." ¹³ Ago kimwoe Jeiso agobo meenyi, nga kilen iche alen mwoe agobo ruondo ne kagonuuch. ¹⁴ Kimwochi anyun Jeiso iche komie koleji, "kagome Lasaro. ¹⁵ Ago abaibai agobo akwe amu kimomi olindo si kobit oyan. Ago ongebe ole mi inendet." ¹⁶ Koleji anyun Tomas ne keguure Didumo alamalyet chun alak, "ongebe ak ache si kobit kebegu ak inendet." ¹⁷ Ye king'oit Jeiso anyun, konyor kole kiga kotebe kererit betusiek angwan. ¹⁸ Betania ko kilegite Jerusalem, ki olo bo mailisiek aeng'. ¹⁹ Ak kigabwa che chang' che bo Yahudik kogaigai Marta ak Maria agobo weringwai. ²⁰ Kingogas anyun Marta kole nyoni Jeiso, kwo kotorokta inendet ago kita kotebi Maria eng' got. ²¹ Koleji Marta anyun Jeiso, "Kiptaiyandani, nda kiimi yu ta kima komee werit ne ketupche. ²² Ago ang'et mbo raa ale, kito age tugul ne isome Jehovah kogonin Jehovah." ²³ Koleji Jeiso inendet, "ta kong'eete tupcheng'ung'." ²⁴ Koleji Marta inendet, "ang'et ale ng'eete eng' ng'eetyet ne bo betutab let." ²⁵ koleji Jeiso, "A ng'eetyet ak sobondo; inendet ne iyono agot ng'ome, ko ta kosobe; ²⁶ Ak chi age tugul ne sobe agoyono, ko ma mee matiny. Tos iyoni inye nito?" ²⁷ Koleji "wei, Kiptaiyandani, ayoni ale i Kristo weritab Jehovah ne nyoni ng'weny." ²⁸ Ak ye kingo kagomwa nito chepoto, kwo koguur Maria chepto ne tupcho eng' ung'ot koleji, "mi yu konetindet ago kuurin." ²⁹ Ak ye king'ogas nito, kong'eet kochakta kwo ole mi inendet. ³⁰ Ago kitomo koit Jeiso nganaset ago ki kitogomi ole kigatuiyo ak Marta. ³¹ Kiirub anyun Yahudik, chepoto che kimi tugul eng' go kogoigoi, ye king'ogeer kong'eet Maria kochakta komanda sang', kolen wendi kererit korire eng' oloto. ³² King'oit anyun Maria ole mi Jeiso ak kogeer inendet, kobutyi kelyekyi ak koleji, "Kiptaiyandani, nda kiimi yu nda kimakomee werit ne ketupche." ³³ King'ogeer Jeiso anyun inendet korire, ak korirtos agiche Yahudik che kigabwa koboto inendet, kogas kongwan mising' eng' Tamirmiriet ak kochol; ³⁴ Kole, "kionde ano?" Koleji, " Kiptaiyandani nyo keer." ³⁵ Korir Jeiso. ³⁶ Kole anyun Yahudik, "ogeer anyun o, ole kiichamdoi inendet Lazaro." ³⁷ Ago kile alak eng' iche, kigatemene nee chichi ne kiyote konyekab chito ne ki korat koger,ago ka koyai chichi mame ?" ³⁸ Kogas anyun Jeiso kong'wan kogeny eng' orinyi, konyoni kererit. Ki kebenet ne kiga kigere koita kurget. ³⁹ Kole Jeiso, "oiste koita." Koleji Maria chepto ne tupcho ak Lazaro, "Kiptaiyandani, kogosamisit amu kong'etege ng'ome, ko betusiek angwan. ⁴⁰ Koleji Jeiso inendet, "kama mwoun ale ng'iyoni, igeere torornatetab Jehovah?" ⁴¹ Koisto anyun koita ak king'et met Jeiso ak kole, "Baba, amwoun kongoi ale kaigasa. ⁴² Ak kaanai ale igoso eng' ui tugul ago kaamwa ni amu tuiyoni tononi eng' yuto si kobiit koyan kole kiiyokwo." ⁴³ Ak ye kingo kagomwa ko u noto, komwa eng' ne o kole, "Lazaro, mongu!" ⁴⁴ Komong' anyun inendet ne kiga kome ko rototin eunek ak kelyek eng' ngoroik che bo kererit, ak kigakirate togenyi anget. koleji anyun Jeiso bichoto, "otiach ak ounde kwo." ⁴⁵ Kiyan anyun inendet che chang' che bo Yahudik che kigabwa ole mi Maria ak kogeer tuguk che kiyai Jeiso. ⁴⁶ Ago kiba alak ole mi Parisaik ak komwochi iche tuguk che kagoyai Jeiso. ⁴⁷ Kiguur anyun kiruoget tisiik che eechen ak Pharisaik ak kole "kiyai nee? Amu yae chichi kaborunoik che chang'. ⁴⁸ Ng'ot kebagakte inendet ko u ni koyoni inendet biko tugul asi kobwa Romanik kosarenech emenyo ak bororyenyo." ⁴⁹ Ak age eng' icheget ne kigiguure Kaiapa ne ki tisiindet ne o kenyinoto koleji, "monget akwe kiy age tugul. ⁵⁰ Monget ole kororonitu eng' akwe ngomechi chito agenge biko si ma bet bororiet komugul." ⁵¹ Kima komwoe inegei nito. Ago kimaoten amu ki tisiindet neo inendet eng' kenyinoto, kole kanyol komechi Jeiso bororiet; ⁵² Ma agobo bororiet nito inege, ago si kobiit koum legukab Jehovah che yestootin si kobiit koek agenge. ⁵³ Kong'etege betunoto anyun ak kwo tai, koruogot agobo ole bortoi inendet. ⁵⁴ Mata kowendot Jeiso anyun eng' ole toogu eng' Yahudik ago kiwo eng' oloto agoi emet ne legite surkwen eng' nganaset ne kiguure Epraim ak kitebi eng' oloto koboto alamalyennyi. ⁵⁵ Kigarik Paska ne bo Yahudik ak kiba che chang' eng' emet kolangta Jerusalem kotomo koit Paska koba koanyinyige. ⁵⁶ Ak kichenge anyun icheget Jeiso, ago ng'alalchinige ichegei eng' ichegei kotononsot eng' hekalut ago len, "obwati nee akwe? Tos olen manyoni inendet igorta?" ⁵⁷ Kiga ng'at tisiik che eechen ak Parisaik kole ng'onai chi age tugul ole mi inendet, komwoi si kobiit konam icheget inendet.