¹ Ak kingota komi betusiek lo si koit Paska, konyo Jeiso Betania ole kimi Lasaro ne kiging'eeti komong' eng' che kibek. ² Kichopchi iche inendet eng' oloto amitwogik che bo koskoleng', koboisiechi Marta, ago kimi Lasaro koboto iche che kiamisie. ³ Kinem anyun Maria mwaita ne bo kamanutiet neo ne kibo ratilit agenge ak koile kelyekab Jeiso ak kobuge sumeekyi kelyekyi ak kinyi got nyamdutiet ne bo mwaita. ⁴ Ago kile Judas Skariot ne ki agenge ne bo alamalyennyi ne kimoche kongwekta inendet. ⁵ "Ko amu nee si ma kialdae mwai denarisiek bogol somok si kigochi kibananok?" ⁶ Kimwa ni anyun ma amu kirire kibananok ago amu ki chorin ago kitinyei lolet ak koibe tuguk che mi orit. ⁷ Kole Jeiso, "Obagakte kogonorji betutab tubenyu. ⁸ Amu mi kibananok kobotok kotugul ago mami ane ak akwe kotugul." ⁹ Kinai anyun biko che chang' che bo Yahudik kole mi oloto, ak kibwa ma agobo Jeiso inege ago si kobiit kogeer Lasaro agine ne kiga kong'eet inendet eng' che kibek. ¹⁰ Ago kiruoch tisiik che eechen kole kobar Lasaro agine; ¹¹ Amu kiitabang'e che chang' che bo Yahudik koba koyan Jeiso amu inendet. ¹² Ak eng' betut ne kirube noto, kogas tuiyet ne o ne bo biko che kigabwa igorta kole nyoni Jeiso Jerusalem, ¹³ Konam temenik che bo sosik ak koba kotorokta inendet ak komwa eng' kutit ne o kole Hosana! iberurot inendet ne nyoni eng' kainetab kiptaiyat noto Laitoriatab Israel." ¹⁴ Ak ye kingo kagonyor Jeiso moitab Sigiriet; kolany ko u ye kigisir kele, ¹⁵ "A meiywei inyee cheptab Sion; keer o, nyoni Laitoriandeng'ung' kobunu moitab Sigiriet." ¹⁶ Kima iguiyo alamalyennyi eng' tai tuguchuto ago kingo kagitoror Jeiso, kobwat anyun iche kole kigisir tuguchuto agobo inendet ak kiga keyachi inendet tuguchuto. ¹⁷ Kibaorian anyun tuiyet ne kimi koboto inendet ye kiguure Lasaro eng' kererit ye king'eeti inendet eng' che kibek. ¹⁸ Kiba anyun tuiyet kotorokta inendet amu noto kigagogas kole kiyai kaborunouni. ¹⁹ Kimwochige anyun Parisaik ichege kole, "ogeero, ma oterter amu; ogeero, kagorub inendet biko tugul che bo ng'weny." ²⁰ Ak kimi Yunanik alage eng' che kiba kotogosta koba kosa eng' igorta. ²¹ Kibwa bichoto anyun ole mi Pilipu ne bo Betsaida ne bo Galili ak kotebe inendet kole, "Kiptaiyandani, kimoche kegeer Jeiso." ²² Kinyo Pilipu komwochi Andrea ak kobwa tuwai Pilipu ak Andrea komwochi Jeiso. ²³ Ak kiwolji Jeiso koleji, "kait sait ne kitorore weritab chi. ²⁴ Amwowok Iman, iman ale, ng'o ma me baywat ne ibutyini nyung'uny'ek, kotebche inegei; ago ng'ome, koiyie logoek che chang'. ²⁵ Inendet ne chome sobondonyi kobeeti ak inendet ne sose sobondanyi eng' ng'wenyuni koribe kot koit sobondab koigeny. ²⁶ Ngo boisiewo chi age tugul, ko nyolu korubata ak si ole ami komi oloto agine kiboitiondenyu. Ng'oboisiewo chi, koteegisi inendet Kwanda. ²⁷ Nyolili nguno sobondanyu ago amwoe nee anyun? Baba, soruo eng' saini'? Ago kianyonji saini amu ng'olyondonito. ²⁸ Baba itoror kaineng'ung', kimong' anyun tuget eng' Kipseng'wet kole, kiatoror ak ta atorori kogeny." ²⁹ Kimwa anyun tuiyet ne kitononi eng' oloto kogose kole katul, kole alak "kangololji malaikayat." ³⁰ Kowolji Jeiso koleji, "kama nyo kutini agobo ane, agobo akwe. ³¹ Kabiit nguno kiruogetab ng'wenyuni: Ak kagitoorta anyun nguno ne o ne bo ng'weny komanda. ³² Ak ye kiuito eng' ng'weny, amutyige biko tugul." ³³ Ago kimwa ni kobortoi meet ole meitoi. ³⁴ Ak kiwolji anyun tuiyet inendet koleji, "kigegas eng' ng'atutik kele tebyei Kristo koig'eny. Teptoi ano anyun si imwa ile kanyol keuto Weritab chi? Ng'o weroto bo chi?" ³⁵ Koleji Jeiso anyun, "ta komi lapkeiyet eng' kwenung'wong' eng' betusiek che matia. Obendote eng' lapkeiyet ye ta otinye lapkeiyet si manamak tuinto. Ak inendet ne wendoti eng' tuinto ko manoei ole wendi. ³⁶ Ye ta otinye lapkeiyet, oyan lapkeiyet si kobiit oegu werikab labkeiyet." Kimwa Jeiso tuguchu ak kwo kounyege icheket. ³⁷ Ago ng'a kiga koyai kaborunoik che chang' che te cho eng' taingwai, koma iyan iche inendet. ³⁸ Si kobiit kosulda ng'olyotab maotiot Isaia ne kimwa kole, "Kiptayandani, kiiyan ng'o ng'alekyo? Ak kigeng'onji ng'o eutab Kiptaiyat?" ³⁹ Ma imuchi anyun koyan amu ng'olyondonito amu kimwa Isaia kogeny kole, ⁴⁰ "Kigotich inendet konyekwai ak kogochi mugulelwekwai kouegitu si me keere konyekwai nda konai eng' mugulelwekwai ak kowechge ak asoob icheget." ⁴¹ Kimwa tuguchu Isaia amu kigeer torornatenyi ak kingalal agobo inendet. ⁴² Ago kiiyan inendet che chang' agot eng' bounik ago ma ng'any inendet si ma oon icheget Parisaik eng' sunagogit. ⁴³ Amu kichome kalosunetab biko kosir kalosunetab Jehovah. ⁴⁴ Ago kimwa Jeiso eng' kutit ne o kole, "inendet ne iyono koma iyono ane ago kaiyan inendet ne kiyokwo, ⁴⁵ Ak inendet ne keero, kogeere inendet kiiyokwo. ⁴⁶ Kianyo aegu lapkeiyet eng' ng'weny, si ma kotebye eng' tuinto chi age tugul ne iyono. ⁴⁷ Ak ng'o kas chi age tugul ng'alekyu, ama rib komoruokyini inendet amu kima nyo aruokyi ng'weny ago kianyo asoru ng'weny. ⁴⁸ Inendet ne toyo ama tooche ng'alekyu, kotinyei ne iruokyini. Ng'olyot ne kiamwa ko noto ne iruokyini inendet eng' betutab let. ⁴⁹ Amu kima mwoe anege, kigono Kwanda ne kiiyokwo ng'atutiet ne kanyol aamda. ⁵⁰ Ak ang'et ale sobondab koig'eny ng'atutienyi, tuguk che amwoe anyun, ko u ye kimwowo Kwanda amwoe kou noto.