¹ Ak ye king'otomo koit igortab Paska, Konai Jeiso kole kagoit sainyi ne wendi eng' ng'weny kwo ole mi kwanda. Ko kagocham chechi che mi ng'weny, kocham anyun agoi betutab let. ² Ak eng' saitab amitwogikab kiskoleng' , kogagonde oindet ng'wektaet muguleltab Judas Iskariot ne bo kap Simon. ³ Koganai Jeiso kole kagonde tuguk tugul eunekyi ak kole kibunu Jehovah ak kowendi ole mi Jehovah. ⁴ Kong'eet eng' amitwogik ak konde taban ng'oroikyi. Ak konam ang'et ne kibugege kotaege. ⁵ Ak korongji beko sanit ak kotoi koun kelyekab alamalyet ak kobuche anganato kiga taege. ⁶ Konyo ole mi Simon Petero, ago kileji Petero, "Kiptaiyandani, tos iuni inye kelyekyu?" ⁷ Kowolji Jeiso inendet koleji, "kito ne ayae ko meng'et nguno, ago tatun inae." ⁸ Koleji Petero, "magoi iun kelyekyu." Kowolji Jeiso koleji, "ng'o maunin, komagiting'ege kiy." ⁹ Koleji Simon Petero inendet, "Kiptayandani, ma kelyekyu kityo, ago eunekyu ak metinyu." ¹⁰ Koleji Jeiso inendet, "ne kagoung'e ko ma komoche koung'e kogeny kobate kelyekyi amu iunot inne; ounotin akwe ago ma akwe tugul." ¹¹ (Amu kiing'et ne kimoche kongwekta inendet ak kimwa amu noto kole "maounotin tugul.") ¹² Ak ye kingo kagoun anyun kelyekwai ak konem ng'oroikyi ak kotebi ng'weny kogeny, koleji icheget, "tos ongen ne kaiyaiwok? ¹³ Ogureno 'konetindet' ak 'Kiptaiyat', ak omwoe anyun komie, amu a i inendet. ¹⁴ Ng'o ane anyun ne a Kiptaiyat ak Konetindet, ne kaun kelyekwok, ko kanyoljok ak akwe ounjige kelyek. ¹⁵ Amu kaboruok si oyai ak akwe kou ne kayaiwok. ¹⁶ Amwowok Iman, iman, ale, ma o otwogindet kosir Kiptaiyandenyi; Ama o inendet ne kigiyok kosiir inendet ne kiiyoku. ¹⁷ Ng'onai tuguchuto ko oboiboien ng'oyai. ¹⁸ Ma mwoe agobo akwe tugul, ang'et che kialewen ago si kobiit kosulda sirutiet ne kile inendet: 'Ne ame magatiandenyu ko kagong'et kwariandenyi koyaiwo ne ya.' ¹⁹ Kasib amwowok kong'ete nguno kotomo kosulda si ng'osulda oyan ole A l inendet. ²⁰ Amwowok, Iman, iman, akwe ale, inendet ne tooche age tugul ne ayogu, ko kataacha, ak inendet ne toocho ko kataach inendet ne kiiyokwo." ²¹ Kingo kagomwa Jeiso kou noto, konyor nyalilda eng' tamirmiryenyi ak kobaorian kole, "amwowok Iman, iman, ale, ng'wegto age eng' akwe." ²² Kotobeng'ee anyun alamalyet ama nai kole ng'o, mwoe agobo ngo. ²³ Ak kimi meset agenge ne bo alamalyet ne kitiegei tegetab Jeiso ne ki chamat eng' Jeiso. ²⁴ Kong'wech Simon Petero inendet ak kolechi, "tebe ilechi, tos mwoe agobo ngo?" ²⁵ Koleji anyun noto kitiege tegetab Jeiso, "Kiptaiyandani, ng'o noto?" ²⁶ Kowolji Jeiso anyun kole, "inendet ne agochini kererutiet ye kaaburburte, ak ye king'o kagoburburto kererutiet, kogochi Judas ne bo kap Simon Skariot. ²⁷ Ak ye king'o kagotaach kererutiet kochut chesawiliet inendet, koleji Jeiso anyun, "yai chokji ne imoche iyai." ²⁸ Kimanai chi eng' che kimi amisiet kole kamwochi inendet agobo nee. ²⁹ Amu kilen alak eng' icheget, kaleji Jeiso ial tuguk che kimoche eng' igorta amu kiting'oti Judas lolet, anan ko kaleji igochi kiy kibananok. ³⁰ Kingo kagotaach anyun inendet kererutiet, komanda ngunoto. Ki kemoi. ³¹ Ye kingo kagomanda sang', komwa Jeiso kole, "kagitoror ng'uno weritab chi, ak kagitoror Jehova eng' inendet. ³² Ak tun itorori Jehovah inendet eng' orinyi ak kotorori inendet eng' sainato. ³³ Leguchu mengechen, ta atebye kobotok ne matia. Tun ocheng'o ak ko u ye kiamwachi Yahudik aleji, 'ole awendi, komomuchi obga.' amwowok nguno ak akwe kou noto. ³⁴ Agonok ng'atutiet ne leel, ale ochamye ak akwe. ³⁵ Eng' nito anyun, konae biko kole, oi alamalyennyu ngochamsoti." ³⁶ Kileji anyun Simon Petero, "Kiptayandani, iwendi ano?" Kowolji Jeiso koleji, "ole awendi, komemuchi irupga nguno, ago tatun irupgo." ³⁷ Koleji Petero, "Kiptayandani, kalya si mamuchi arubun mbo raa? Agoitoi sobondanyu agobo inye." ³⁸ Kowolji Jeiso koleji, "igoitoi sobondang'ung' agobo ane? Amwaun iman, Iman, ale, kotom kochei kipsoiywet, itoyo konyil somok."