¹ Amogochi mugulelwekwok koimgei. Oyoni Jehovah; oyono agane. ² Mi gorik che chang' gotab Babanyu, nda kima kou noto, ta kiamwowok, awendi achobwok koret. ³ Ak ye awe achobwok koret, anyoni kogeny amutok, si ole ami omite ak akwe. ⁴ Ak ole awendi onget oret." ⁵ Koleji Tomas, "Kiptayandani, maging'et ole iwendi, kinoitoi ano anyun oret?" ⁶ Koleji Jeiso, "A i oret ak iman ak sobondo; Manyonjini chi Kwanda ama eng' ane. ⁷ Nda kionaa, nda kionai Baba agine. Ak kaonai inendet anyun kong'ete raa ak kaogeer inendet." ⁸ Koleji Pilipu, "Kiptaiyandani, iboruech Kwanda, ago si koemech noto." ⁹ Koleji Jeiso, "kigetebi tugul ak akwe betusiek che chang' ako tomo inaa wee Pilipu? Inendet ne kigoroa, kogakoro Kwanda. Amunee anyun asimwa ile, 'iborwech Kwanda'? ¹⁰ Tos meyoni ile ami eng' Kwanda ak Kwanda eng' ane? Ng'alek che amwowok ko mamwoe anege, ago Kwanda ne menyo ne yaei boisionikyi. ¹¹ Iyana amu ami eng' Kwanda ak Kwanda eng' ane, nda oyana agobo boisionik icheget. ¹² Amwowok, Iman, iman, ale, inendet ne iyono, koyaei agine boisionik che ayae ak koyae boisionik che eechen che sirei chuto amu awendi ole mi Kwanda. ¹³ Ak kito age tugul ne osome eng' kainenyu, ayae si kegonyit Kwanda eng' Werit. ¹⁴ Ng'ot osom kiy age tugul eng' kainenyu, ayae kioto. ¹⁵ Ng'ot ochomo, oribe ng'atutikyu, ¹⁶ Ak osome Kwanda , ak kogonok kagaigainet age si kotebi kobotok koigeny, ¹⁷ Noto Tamirmiriet ne bo imanda ne maimuchi ng'weny kotaach amu mageere inendet. Ago onget akwe inendet amu tebye kobotok ak tun tebye eng' oriting'wong'. ¹⁸ Mabagaktook kou kibananok; ago anyonjinok kogeny. ¹⁹ Ta komi ng'atigin si ma kogeero ng'weny, ago ogeero akwe, amu asobe, osabsoti ak akwe. ²⁰ Eng' betunoto, onai ole ami eng' Babanyu, ak akwe eng' ane, ak ane eng' akwe. ²¹ Inendet ne tinyei ng'atutikyu ak koribe, ko noto ne chomo, ak inendet ne chomo, ko chamat eng' Babanyu, ak achome inendet ak ang'ong'jinige inendet." ²² Koleji Judas (ma Skariot) "Kiptayandani, kalya si ing'ongwechge ama ing'ong'jige ng'weny?" ²³ Kowolji Jeiso koleji, ng'o chama chi, korib ng'olyondenyu. Ak kocham Babanyu inendet, kebwonjini ak kemeny koboto inendet. ²⁴ Inendet ne machomo ko maribe ng'alekyu ak manenyu ng'olyot ne ogose ago bo Kwanda ne kiiyokwo. ²⁵ Kaamwowok tuguchu, kota ami kobotok. ²⁶ Ago inetook tuguk tugul kagaigaindet, Tamirmiriet ne Tilil ne iyogu Kwanda eng' kainenyu ak kobwotwok tugul che kamwawok. ²⁷ Abogokwok kalyet; agonok kalyenyu. Magonok kou ye konu ng'weny. Amokany koimge mugulelwekwok anan koiyweis. ²⁸ Kaogas ko u ye kaamwowok ale "awendi ak anyoni ole omi'. Ng'ot ochama, ko oboiboitu amu awendi ole mi Kwanda amu o Kwanda eng' ane. ²⁹ Ak kamwowok nguno kotom koaak si ye kagoaak oyan. ³⁰ Makotong'ololwok che chang' mising', amu nyoni ne bounindetab ng'weny, ama tinye kiy eng' ane, ³¹ ago si konai ng'weny kole achome Kwanda, ak ko u ye kigono Kwanda ng'atutiet, ayae ko u noto. Ong'eetye kebe."