¹ "A ketit ne bo iman, ne bo sabibuk ak semberindet Babanyu. ² Tilei temenet age tugul ne mi eng' ane ne maiyi logoek ak kotilili temenet age tugul ne iyie logoek si koi logoek alak. ³ O tililen raa amu ngalek che kaamwowok. ⁴ Omenya, ak amenyok, ko u ye maimuchi temet koi logoek inegei ng'ot go mamenye ketit, ko momuchi ak akwe ng'ot ko momenyo. ⁵ Aii ketitab sabibuk, ko o i temenik. inendet ne menyo ak amenye inendet, ko noto ne siche logoek che chang' amu momuchi oyai kiy akwege ngo momi ane kobotok. ⁶ Ng'o mamenyo chi, kewirtoi inendet ko u temet si koyam ak koum biko ak kowirji ma ak kololyo. ⁷ Ng'ot omenyo, ak komenyok ng'alekyu, osom anyun kiy age tugul ne omeche si keyaiwok. ⁸ Kigonyiti Babanyu eng' nito ye oiyie logoek che chang' si oegu alamalyennyu. ⁹ Kou ye kichama Kwanda, ko u noto kiachamak agine. Otebi eng' chamnyenyu. ¹⁰ Ng'ot oribe ng'atutikyu, otebye anyun eng' chamnyenyu ko u ye kiarib ng'atutik che bo Babanyu ak atepche eng' chamnyenyi. ¹¹ Kaamwowok tuguchu si kotebi eng' akwe boiboiyenyu si kobiit kosulda boiboiyeng'wong'. ¹² Ng'atutienyu ni ale, ochomnye kou ye kiachamak. ¹³ Motinye chi chomnyet ne siire ni, ale kogoito chi sobondanyi agobo choronokyi ¹⁴ O i choronokyu ng'ot oyai tuguk che ang'atok. ¹⁵ Ma aguurenok otwogik amu manoe otwogindet kit ne yoe Kiptayandenyi, ago agurenok choronok, amu kang'ang'wok tugul che kiagase Babanyu. ¹⁶ Kima oleweno, ago kialewenok ak kiandeak ale obe ak oii logoek si kobiit kotebi logoekwok si kobiit kogonok Kwanda kito age tugul ne osome eng' kainenyu. ¹⁷ Ang'atwok tuguchu ale ochamnye akwe eng' akwe. ¹⁸ Ng'o sasaak ng'weny, onai ole kigosasa kotomo kosasaak. ¹⁹ Nda o bo ng'weny, nda ka chome ng'weny chechi, ago amu mobo ng'weny, ago kialewenok eng' ng'weny, kososok ng'weny anyun amu noto. ²⁰ Onan ng'olyot ne kiamwowok, 'masiire otwogindet kiptaiyandenyi.' Ng'ot ko kigonyalila ane, konyolilok ak akwe; ngot ko kinam ng'olyondenyu, koname neng'wong' agine. ²¹ Ago aiwok tuguchu tugul agobo kainenyu amu manai inendet ne kiiyokwo. ²² Nda kima anyo angololji icheket, nda motinye teng'ek, ago ng'uno komotinye kito ne itiogege agobo teng'ektong'wai. ²³ Inendet ne soso, ko kasas Babanyu agine. ²⁴ Nda kima yai eng' kwenung'wai boisionik che kima yai chito age, nda kima kotinye teng'ek, ago ng'uno ko kagonerech ak kogosasech ane ak Babanyu ²⁵ Ago si kosulda ng'olyot ne kigisir eng' ng'atutikwai kele, 'kigosasa buch.' ²⁶ Ago ye kagoit kagaigaiyanet ne tun ayokwok kobunu Kwanda, Tamirmiriet ne bo imanda ne bunu Kwanda konyo kobaoryanjo. ²⁷ Ak obaorioni ak akwe amu kiomi koboto kong'ete taunet.