¹ "Kaamwowok tuguchu si ma kinachak. ² Onok eng' sunagogisiek. Ee nyoni sait ne ibwoti chi tugul ne barok kole yochini Jehovah boisiet. ³ Ak yaei tuguchu amu ma nai Kwanda nds ane. ⁴ Ago kamwowok tuguchu si ng'o nyo saing'wai, omuchi onan ole kiamwowok agobo chuto ago kima amwowok tuguchu eng' taunet amu kiami kobotok. ⁵ Ago kawe nguno ole mi inendet ne kiiyokwo ama mi chi age eng' akwe ni tebeeno kole iwendi ano? ⁶ Amu kaamwowok tuguchu ko kanyi mugullelwekwok cholet. ⁷ Ago amwowok ne bo iman, kararan eng' akwe ngawe amu ngo mawe, ko manyonjinok kagaigainatet, ago ngot awe, ayokwok inendet. ⁸ Ak ye kagonyo inendet, kogikyi ng'weny agobo tengekto ak imanda ak kiruoget. ⁹ Agobo tengekto ko amu ma iyana; ¹⁰ Agobo imanda ko amu awendi ole mi Kwanda, ama ogeero kogeny; ¹¹ Agobo kiruoget ko amu kigiruokyi ne o nebo ng'wenyuni. ¹² Ta atinye tuguk che chang' che kata ta amwowok ago ma omuchi omuite raa. ¹³ Ago ye tun kagonyo inendet tamirmiriet ne bo imanit, kondoiwok agoi oit imanda tugul, amu ma mwae inegei. Ago mwoe tuguk tugul che kase ak kong'ong'wok tuguk che bwoni. ¹⁴ Itororo amu name chechu ak kong'ang'wok. ¹⁵ Chechu tuguk tugul che tinyei Kwanda. Noto kamwowok ale name Tamirmiriet chechu ak koboruok. ¹⁶ Tomo ng'atigin si ma ogeero kogeny ak mi ng'atigin kogeny si ogeero." ¹⁷ Kong'ololjige anyun alak eng' alamalyenyi kole "nee ni kamwowech kole mi ng'atigin si ma ogeero ak mi ng'atigin kogeny si ogeero ak amu 'awendi ole mi Kwanda'?" ¹⁸ Kole anyun "nee ni kamwa kole, 'mi ng'atigin'? Ng'o maging'et kito ne mwoe." ¹⁹ Kinai anyun Jeiso kole mochi kotebe bichoto inendet, ak koleji, "tos otebege akwe agobo ng'olyondoni kaamwa ale, 'mi ng'atigin si maogeero ak mi ng'atigin kogeny si ogeero'? Amwowok Iman, iman, ale, ²⁰ orirsoti ak oteisoti, ago baibai ng'weny. Oimigee ak kewole kaimutikwok koek boiboiyet. ²¹ Chole tomonet ye moche kosigis amu kait sainyi, ago ye kagosich lekwet, ko ma kononi ng'wonindo kogeny eng' boiboiyet amu kagesikyi chi ng'weny. ²² Noto anyun otinye cholet raa, ago ta ageerok kogeny ak boiboien mugulelwekwok ama sarenok chi boiboiyeng'wong' . ²³ Ama otebeno kiy eng' betunoto. Amwowok Iman, iman, ale, ngot osom kwanda kiy age tugul eng' kainenyu, kogonok. ²⁴ Agoi raa ko tomo osom kiy eng' kainenyu. Osom si onyoru, si kobiit kosulda boiboiyeng'wong'. ²⁵ "Kaamwowok tuguchu eng' kalewenaik ago nyoni saitb ye ma angalalwok eng' kalewenoik ago aboruok komie agobo Kwanda. ²⁶ Osome betunoto eng' kainenyu ago mamwowok ale ateebe Kwanda kiy agobo akwe, ²⁷ Amu Kwanda inendet ko chomok amu kiochama ak kioyan ole kiabunu Kwanda. ²⁸ Kiabunu Kwanda, ak anyonji ng'weny. Abogoktoi ng'weny kogeny ak awektege ole mi Kwanda." ²⁹ Koleji alamalyennyi inendet, "keero, ingololi raa komie kotook, ama imwoe kalewenet. ³⁰ King'et nguno kele, ing'et tuguk tugul , amanyoljini chi kotebenen kiy, kiyoni eng' nito, kele kiibunu Jehovah." ³¹ Kowolji Jeiso koleji, " Ara oyani raa? ³² Ogeero, nyoni sait, ee, kagonyo raa, ye kiyestook kwo chi tugul oldonyi ak obagakta anege, ago momi anege amu mi Kwanda koboto. ³³ Kaamwowok tuguchu si kobiit onyoruneno kalyet. Eng' ng'weny onyoru nyalilda, ago onyiganitu amu kaaterter ng'weny."