¹ Kimwa Jeiso ngalechu ak konyal Kipseng'wet, ak kole, "Baba, kago nyo sait itoror wering'ung' so kotororin Werit ² kou ye kiigochi sobondab koigeny tugul che kiigochi inendet. ³ Ak ni sobondab koigeny: Ale konain, Jehovah ne inyendet inyege ne bo iman, ak Jeiso Kristo ne kiiyoku. ⁴ Kiatororin eng' ng'weny amu kaagesu boisiet ne kiigono ayai. ⁵ Ak nguno ee Baba, itororo eng' inyendet inyege eng' torornatet ne kiatinye kemi tuwai kotomo kelumda ng'weny. ⁶ Kiaborji kaineng'ung' biko che kiigono eng' ng'weny. Ki chechu ak kiigono ak kigorib ng'olyondeng'ung'. ⁷ Kagonai nguno kole bunun tuguk tugul che kiigono. ⁸ Amu kiigochi icheket ng'alek che kiigono ak kigotaach ak konai iman kole kiabunu ole imi ak koyan kole kiiyokwo. ⁹ Asoe akobo icheget. Mosoe agobo ng'weny agobo icheget che kiigono, amu cheguk. ¹⁰ Ak tuguk tugul cheguk ko chechu, ak chechu ko cheguk, ak kiitororo eng' icheket. ¹¹ Ak ma amite ng'weny, ako mito ng'weny chu, ak anyoni ole imi. Baba ne Tilil, rib eng' kaineng'ung' icheget che kiigono si kobiit koek agenge ko u ache. ¹² Kiarib eng' kaineng'ung' icheget che kiigono ye kota ami ak icheget. Kiarib icheget ama bet agot agenge eng' icheket, kobate weritab luset si kobiit kosulda sirutiet. ¹³ Ak kanyonjin nguno ak amwoe tuguchu eng' ng'weny si kobiit konyor icheget kasuldaet ab boiboiyenyu eng' icheket. ¹⁴ Kiagochi ng'olyondeng'ung', ak kasas ng'weny icheget amu ma bo ng'weny ko u ye mo bo ng'weny ane. ¹⁵ Mosoe ale imut icheget eng' ng'weny, ago ale irib icheget eng' inendet ne ya. ¹⁶ Ma bo ng'weny icheget, ko u ye ma bo ng'weny ane. ¹⁷ Itilil icheget eng' imanda. imanda ng'olyondeng'ung'. ¹⁸ Ko u ye kiiyokwo anyo ng'weny, ko u noto anyun, kokaayokte icheket koba ng'weny. ¹⁹ Ak atabanige agobo icheget si kobiit kotobon icheget eng' imanda. ²⁰ Amosoe agobo chu kityo, ago asoe agobo icheget che tun iyono amu ng'olyong'wai ²¹ Si kobiit koek icheget tugul agenge ko u ye imi inye Baba eng' ane ak ane eng' inye. si kobiit kotebi icheket eng' ache si kobiit koyan ng'weny kole kiiyokwo. ²² Ak kaagochi icheget torornatet ne kiigono si kobiit koek agenge ko u ye kii agenge ache: ²³ Ane eng' icheket ak inye eng' ane, si kobiit koek icheket che igesunotinge eng' agenge, si kobiit konai ng'weny kole, kiiyokwo ak ichome icheget ko u ye ichomo. ²⁴ Baba, amoche kotebi koboto eng' ole ami icheget che kiigono si kobiit kogeer torornatenyu ne kiigono amu kiichama kotomo kelumda ng'weny. ²⁵ Ee baba ne bo Tililindo, ki ma ingeti ng'weny ago kiang'etin ak kigonai chu kole kiiyokwo. ²⁶ Kiong'ong'ji icheket kaineng'ung' ako ta ang'ong'jini, si kobiit kotebe icheket chamnyet ne kiichamena ak ane eng' icheket."