1 Ako kiwo Jeiso tulwetab emitik. 2 Ak kimus karon konyo hekalut, ak kibwa biko tugul ole mi inendet, kitebi ng'weny, ak konet iche. 3 Kiimut sirik ak Parisaik chepyoset ne kiginamji kesesnatet. Ak kinde inendet kwenut. 4 Koleji inendet, "Konetindoni, kaginam chepyosani koyae kesesnatet. 5 Kingatech Musa eng' ng'atutiet kole, kiwire koik neu nito, ara tos ilen ne inye?" 6 Kimwoe ng'olyoni si kosich kito ne itaame, Ago king'uruk Jeiso kosir ng'weny eng' mornenyi. 7 Ago kingo tese tai kotepe inendet, kotonon Jeiso ak koleji iche, "ngotoi nematinye tengek eng' akwe kowir eng' koita." 8 Ak king'uruk kogeny kosir ng'weny eng' mornenyi. 9 Ak ye kingogas ng'olyondonito, kotoi komanda ak koba agenge agenge kong'ete ne o. Ak king'et Jeiso inege ak chepyosonoto kotononi eng' kwen. 10 Kotonon anyun Jeiso anyun ak koleji" Chepyosani, mi ano iche che kaigikyin? Maigikyin chi?" 11 Ak kile "maikigyo chi Kamuktoindoni." Ak kilechi Jeiso, "makigchinin agine. Ui amatiteiyai tengek kogeny." 12 Kimwachi Jeiso anyun icheket koleji, " A lapkeiyet nebo ng'weny, inendet ne rubwo ko ma wendoti eng' tuindo ago nyoru lapkeiyetab sobondo." 13 koleji Parisaik inendet "ibaoryiajinige ama bo iman baornateng'ung';" 14 Kowolji Jeiso koleji, "agot ngabaoryanjinige ko bo iman baornatenyu amu ang'et ole abunu ak ole awendi, ago monget ole abunu nda ole awendi. 15 Oruochi kou magetab borto; Maruokyini chi ane. 16 Ee agot ngaruoch, kobo iman kiruogenyu amu mami anege, ago kimi ak Kwanda ne kiyokwo. 17 Ee, ak kigisir eng' ng'atutieng'wong' kele bo iman baornatetab biko aeng'. 18 A i inendet ne baorianjinige ak baoryanjina Kwanda ne kiyokwa." 19 Koleji anyun iche inendet, "mi ano Kwandang'ung'?" Kowolji Jeiso koleji, "mongeno among'et Babanyu; Nda kigonaa nda kionai Babanyu agine." 20 Kimwa inendet ng'alechu eng' ole kigonore silingisiek ye kinetisyei eng' hekalut ak ma nam chi inendet amu kitomo koit sainyi. 21 Kimwochi anyun icheget kogeny koleji, " awendi ak tun ochengo ak obegu eng' tengektanwong', ole awendi ko momuji obwa." 22 Kile anyun Yahudik, "tos baregei, amu mwoe kole ole awendi ko momuji obwa?" 23 Ak kileji iche "obo oli bo ng'weny abo barak, o bo ng'wenduni ma bo ane ng'wenduni. 24 Noto kamwowok ale obegu eng' tengekwogikwok. amu ng'o moyani ole A I inendet obegu eng' tengekwogikwok." 25 Kileji anyun iche inendet, "i ng'o?" Koleji Jeiso, "noto kiamwowok kong'ete taunet. 26 Atinye tuguk che chang' che amwoe ak che aruochi agobo akwe ago bo iman inendet ne kiyokwo ak amwochini ng'weny tuguk che kiagas eng' inendet." 27 Ago ma iguiyo kole mwochini agobo Kwanda. 28 Kileji Jeiso iche anyun, "ye kaouite weritab chi, onai anyun eng' betunoto ole A I inendet ama yae kiy anege ago amwae tuguchu kou ye kineta Kwanda. 29 Inendet ne kiyokwo kemi tuwai, ma bagakta anege amu ayae kotugul tuguchuto chomokse eng' inendet." 30 Ak kingo tokomwoe tuguchu, koyan inendet che chang'. 31 Kilechi Jeiso anyun Yahudichoto kiga koyan inendet, "ngot otebi akwe eng' ng'olyondenyu ko o i alamalyenyu iman; 32 Ak onai imanda ak kotiachak imanda." 33 Kowolji iche inendet koleji, ki keswek ab Abraham ak tomo keegu otwogikab chi age tugul; Ara imuktoi ano ile, 'Kitiochok'?" 34 Kowolji Jeiso koleji, "amwowok Iman, iman ale, age tugul ne yae tengek ko otwokindetab tengek. 35 Ak matebye otwokindet eng' got koigeny, tebyei werit koigeny. 36 Ng'otiachak anyun werit, ko otiogotin iman. 37 Anget ale o i keswekab Abraham ago ochenge obara amu motinye ng'olyondenyu oletebe eng' akwe. 38 Amwoe tuguk che kiageer eng' Babanyu ak oyae tuguchoto kiogas eng' kwandang'wong'." 39 Kowolji kolechi, "Kwandanyo ko Abraham." koleji Jeiso, "nda ki o i legukab Amraham nda kioyae boisionikab Abraham. 40 Ago nguno ochenge obara, chito ne kamwowok ng'alek che bo iman che kiagas eng' Jehovah. Kima yai kounoto Abraham. 41 Oyoe boisionik che bo kwandang'wong'." Kilechi anyun icheket inendet, "kimagisichech eng' sokset; kitinye Kwanda agenge noto ko Jehovah." 42 Komwochi Jeiso icheget koleji, "nda ka Kwandang'wong' Jehovah, nda kochama amu kianyo abunu Jehovah, kima nyo anege ago kiyokwo inendet. 43 Amu nee si monai choto amwoe? Amu momuchi ogas ng'olyondenyu. 44 O bo kwandang'wong' oindet ak ochome oyai magutigab kwandang'wong'. Ki rumindet kong'ete taunet ama tononi eng' imanda amu mami imanda eng' inendet. Ye mwoe lembech komwoe agobo tugukyi amu kiplembechwa inendet ak kwanda ne bo lembech. 45 Ago moyana amu amwoe imanda. 46 Ng'o eng' akwe ne igikyino kole atinye tengek? ngot amwoe imanda ko amu nee anyun si moyana? 47 Inendet ne bo Jehovah kogasei ng'alekab Jehovah; noto anyun mogose akwe amu mo bo Jehovah." 48 Kowolji anyun Yahudik koleji, "Tos makimwoe ache iman kele i samarindet ak itinye oindet?" 49 Kowol Jeiso kole, "Matinye oindet ogo agonyiti Babanyu, ak otewero. 50 Ago mocheng'e torornatenyu; Mito agenge ne cheng'e ak koruochi. 51 Amwowok Iman, iman ale, ng'orib chi ng'olyondenyu ko mageere meet agoi." 52 Koleji anyun Yahudik inendet, "king'et nguno kele itinye oindet. Kigome Abraham ago kigobek maotik; ak imwoe ile 'ngorib chi ng'olyondenyu ko machamchami meet agoi'. 53 Tos i o isiir kwandanyo Abraham ne kigome? Ak kigobek maotik. Iyaege inye iegu ng'o? 54 Kowol Jeiso kole, "ngot atororige ko buch torornatenyu; Kwandanyu ne itororo- ne omwoe ole inendet ko Jehovah neng'wong'. 55 Ak tomo onai inendet, ago ang'et ane inendet. Ak ngot amwa ale mang'et inendet, aegu kiplembechwa ko u akwe, ago ang'et ane inendet ak aribe ng'olyondenyi. 56 Kibaibai kwandang'wong' Abraham kogeer betunyu; ak kigeer ak kogasgei." 57 Koleji anyun Yahudik inendet, "tomo iit kenyisiek konom ako kiigeer Abraham?" 58 Koleji Jeiso, "amwowok Iman, iman ale, kingo tomo kobiit Abraham A MI. 59 "Kinem anyun bichoto koik komoche kowire inendet ago kiunyge Jeiso ak komanda eng' hekalut.