¹ Ak kingobata tuguchu kowendot Jeiso eng' Galili, amu macham kowendot eng' Judea amu kichenge Yahudik kobar inendet. ² Ak kiga rik igortab Yahudik ne bo keriosiek. ³ Kileji anyun tupchosiekyi inendet "ui eng' oli agoi Judea, si kogeer alamalyeng'ung' agiche boisioniguk che iyoe. ⁴ Amu mami chi ne yae kiy eng' ungot ak kocheng' kobartage ak kotok, ng'iyai tuguchu ibartege eng' ing'weny." ⁵ Amu agot tupchosiekyi agiche ko kima iyan inendet. ⁶ Koleji anyun Jeiso icheget, "tomo koit betunyu ago mi betung'wong' kotugul. ⁷ Maimuchi ng'weny kosasaak, ago soso ane amu abaoriani agobo ng'weny ale yachen boisionikyi. ⁸ Olangte akwe oba igorta; ma longti ane awendi igorta amu tomo kosulda betunyu." ⁹ Ak kingo kagomwa tuguchu, kota kotebi eng' Galili. ¹⁰ Ago ye king'okagolng'ta tupchosiekyi kopa igorta, kolang'ta agine ago ma ibartage ago kiwo ku yo ung'otege. ¹¹ Kichenge anyun Yahudik inendet eng' igorta, ak koteeb kole "mi ano inendet?" ¹² Ak kimi kang'unyng'unyet ne o eng' tuiyosiek agobo inendet amu kile alak "kararan chichi." kole alak, "achicha imaasi biko koba taban." ¹³ Ago ma mwa chi ng'olyo kotook agobo inendet amu kiiywei Yahudik. ¹⁴ Ago ye kingo kagoit kwenutab igorta, kolang'ta Jeiso kwo hekalut ak konetis. ¹⁵ Kokwong'io anyun Yahudik kole "kinaita ano chichi sirutik? Ago tomo konetge." ¹⁶ Kowolji Jeiso anyun koleji, "konetisienyu ko ma nenyu ago bo inendet ne kiyokwo. ¹⁷ Ng'o moche chi age tugul koyai magetab Jehovah, konai konetisioni ng'o bo Jehovah nda amwoe anege. ¹⁸ Inendet ne mwoe chechi inegei kochenge torornatenyi, ago ne chenge torornatetab ne kiiyoku ko bo iman, ama mi kiy ne ma bo imanda eng' inendet ¹⁹ Tos kima konok Musa ng'atutiet? Nga mami chi eng' akwe ne yoe ng'atutiet. Amu ne si ochenge obara?" ²⁰ Kowol tuiyet kole, "itinye oindet. Ng'o ne chenge kobarin?" ²¹ Kowolji Jeiso koleji, kiayai boisiet agenge okwongie akwe tugul. ²² Kigonok Musa kamuratanet (amu noto ko mabun Musa kamuratanet ago bo kwanisiek), ak omuratani chi eng' sabato.' ²³ Ng'eyotitoi chi eng' betutab sabato si mabutok ng'atutietab Musa, kotos onerekyina amu kasoob chi komie eng' betutab sabato? ²⁴ Amoruoch ko u ye ogeere ago oruoch kiruoget ne bo imanda." ²⁵ Kimwa alak eng' bichoto bo Jerusalem kole, "ma inendet ni ne kochenge iche kobar? ²⁶ Ogeero, mwaitoti kotook, ama mwoji kiy iche inendet. Tos ing'et bunik komie kole nito ko Kristo? ²⁷ King'et ole bunu chichi, ago ngo nyo Jeiso Kristo ko manae chi ole bunu." ²⁸ Kingalal anyun Jeiso eng' kutit ne o konetisyei eng' hegalut ak komwae kolen, "ong'eto ak ong'et ole abunu, ako kima nyo anegei ago bo iman inendet ne kiiyokwo ne monget akwe. ²⁹ Anget inendet amu abunu ole mi inendet, amu kiiyokwo." ³⁰ Kicheng' anyun bichoto konam inendet ago manam chi amu kitomo koit betunyi. ³¹ Ak kiiyan inendet che chang' che bo tuiyet ak kole, "ngo nyo Kristo kotos yai kaborunaik che siirei chu yae chichi?" ³² Kigas Parisaik kong'ung'ung'jini tuiyet tuguchuto agobo inendet, kiiyok tiisik che eechen, Parisaik ak Kiptainik kobwa konam inendet. ³³ Koleji Jeiso icheket anyun, "ta ami kobotok ne matia, si awa ole mi inendet ne kiiyokwa. ³⁴ Tun ochengo amonyorwo, ak ole ami ko momuji obwa." ³⁵ Komwachige anyun Yahudik kole, "tos wendi ano chichi ole makinyoru? Tos wendi ole mi iche che kigoyestochi Yunanik konet icheket? ³⁶ Nee anyun ng'olyondoni kamwa kole ochengo amonyoruo ak ole ami komomuchi obga?" ³⁷ Eng' betut ne o ne kibo let eng' igorta, kotonon Jeiso ak komwa eng' kutit ne o kole ngo ame chi melel ko ngo nyonjo ak koee. ³⁸ "Inendet ne iyana, ko u olemwoitoi sirutiet, ko bunu moenyi ainosiekab beko che saptos." ³⁹ Kimwoe nito agobo tamirmiriet ne tun taache icheget che iyani inendet, amu kitomo kegon tamirmiriet, amu kitomo ketoror Jeiso. ⁴⁰ Kingogas alak che bo tuiyet ng'alechuto, komwa kole, "nito anyun maotiot iman." ⁴¹ Ako kimwa alak kole, "nito ko Kristo." kole alage, tos bunu Kristo Galili?" ⁴² "Ma mwoe sirutiet kole mong'une Kristo oretab keswek ab Daudi ak kobun nganasetab Betlehem ole kimi Daudi?" ⁴³ Kibiit anyun toiyet eng' tuiyet agobo inendet. ⁴⁴ Ak kimache alak konam inendet ago ma nam chi inendet. ⁴⁵ Kiwechge anyun kiptainik kobwa ole mi tisiik che eechen ak Parisaik, kotebe koleji, kalya si momutu inendet?" ⁴⁶ Kowol kiptainichoto kole, "kitomo kongololi chi age tugul ko u ni." ⁴⁷ Kowolji anyun Parisaik iche koleji, "kagibeetok ak akwe? ⁴⁸ Kiioyan inendet akwe tugul eng' bounik ak Parisaik? ⁴⁹ Ago chubotin bichu manaei ng'atutiet. ⁵⁰ Kileji Nikodemo (agenge eng' parisaik, ne kigakwo kemoi atkinye eng' tai ole mi Jeiso, ⁵¹ "Tos iruokyini chi ng'atutienyo kotomo kogas ng'alekyi ak kenai kito ne yae?" ⁵² Kowolji anyun inendet koleji, "ibunu akinye Galili? Cheng' ak igeer ile mamangune Galili maotiondo." ⁵³ Kiwechige anyun chi tugul gonyi.