¹ Kingobata tuguchu, kwo Jeiso bitet age ne bo Araraitab Galili, noto ko Araraitab Tiberia. ² Ak kirub inendet ne o amu kigeer kaborunoik che kiyochi che miandos. ³ Ak kilany Jeiso Tulwet kwo kotebi ng'weny ak alamalyennyi. ⁴ (Ak kigarik Paska, igorta ne bo Yahudik.) ⁵ King'onyal barak ak ko geer tuiyet ne o, konyonjini inendet, koleji Pilipu, "kiole ano makatinik che ome bichu?" ⁶ (Kimwoe kotieme inendet, amu king'et kito ne kimoche koyai). ⁷ Kowolji Pilipu inendet koleji, "mayome icheget tugul magatinik che bo denarisiek bogol aeng' si konyor agetugul kitigin." ⁸ Koleji inendet age nebo alamalieynyi, Andrea ne tupcho ak Simon Petero ne agenge eng' alamalieyenyi, ⁹ "Mi yu werit age ne tinye Magatinik mut che bo sairi ak injirenik aeng', ago tos eme nee anyun chuto eng' biko che tee chu?" ¹⁰ Kimwa Jeiso kole, "ochob biko kotebi ng'weny." Ak kimi suswek che chang' oloto. Kitebi ng'weny anyun ak ki olobo elfusiek mut murenjoto. ¹¹ Kinam anyun jeiso makatinik ak ye kingo kagogoito kongoi, kopchechi alamalyennyi ak kiropchi icheget che kitepyei ng'weny ak kou noto agiche injirenik che tee che kimoche. ¹² Ak ye kingo biyong'io, koleji alamalyennyi, "oyum katuganik che kang'et si mabet kiy." ¹³ Koyum anyun katuganichoto ak konyit kerebonik taman ak aeng', choto ko katuganikab makatinik mut che bo sairi che kang'etune icheget che kiomisie. ¹⁴ Ye kingogeer anyun bichoto kabarunet ne kiyai, kole "ni maotiot iman ne nyonjini ng'weny." ¹⁵ Kingonai Jeiso kole legit kobwa si konam inendet eng' kimnatet, koyai inendet koek Laitoriat, kwo kogeny tulwet inegei. ¹⁶ Ak ye kingoek koskoleng', kowol alamalyennyi koba araraita. ¹⁷ Ak kilany moingetab beko kolandae araraita koba Kapernaum ak kigagoimen ak kotom koit Jeiso ole kimi icheget. ¹⁸ Ak Kiwasege araraita amu kiuse usonet ne o. ¹⁹ Kingo kagoba anyun eng' araraita olo bo mailisiek somok nda somok ak kebeber, kogeer Jeiso kowendoti eng' araraita barak ak konyo korikyi moinget koyweis. ²⁰ Ago kileji icheget, "ane, amoiyweisie." ²¹ Kocham anyun kotaach inendet eng' moinget, ak kiit moinget ngunoto emet ole kibendi ²² Ki betut ne kirube noto kogeer tuiyet ne kimi eng' araraita bitonin; kole mami moinget age oloto kobate agenge noto kiga lany alamalyenyi ichegei ago kimalany Jeiso koboto alamalyenyi. ²³ Ago kibwa moingonik alak kobunu Tiberia ole legite koret ole kiame makatinik ye kingo kago koito Kiptaiyat kongoi. ²⁴ Ye kingogeer tuiyet anyun kole mami Jeiso oloto anan alamalyennyi, kolany iche moingonikab beko ak koba kapernaum kocheng'oti Jeiso. ²⁵ Ak ye king'onyor inendet eng' bitet age nebo araraita, koleji, "Rabbi, koinyoni au oli?" ²⁶ Kowolji Jeiso icheget koleji, "Amwawok Iman, iman, ale, ocheng'o ma amu kogeer kaborunoik ako amu koam makatinik ak obiyong'ie. ²⁷ Amogiljige oboisie agobo amitwokik che begu,ako ogiljige ocheng' amitwokik che tebyei agoi sobondab koigeny che konok weritab chi: amu kigong'och inendet Kwanda, ne inendet ko Jehovah." ²⁸ Kileji anyun icheget inendet, "kiyai nee si kobit keyai boisinikab Jehovah?" ²⁹ Kowolji Jeiso koleji, "ni boisietab Jehovah, ale oyan inendet ne kiiyogu Jehovah." ³⁰ Koleji icheget inendet, "ne kaborunet ne iyae si kegeer ak keyanin? Nee ne iyae? ³¹ Kiam kwanisiekyo Mana eng' ong'atet ko u ye kigisir kele 'kiigochi icheget Makatiat ne bunu Kipseng'wet koam."' ³² Koleji anyun Jeiso icheget, "amwowok Iman, iman, ale, kima ko Musa ne kigonok Magatiandanoto kibunu Kipseng'wet, ago konok Babanyu Makatiat ne bo iman ne bunu Kipseng'wet. ³³ Amu makatiat ne bo Jehovah ko noto wolu eng' Kipseng'wet ak kogochi ng'weny sobondo. ³⁴ Koleji anyun iche inendet, "Kiptayandani, konech makatiandani eng' kotugul." ³⁵ Koleji Jeiso icheget, "A i makatiat ne bo sobon, inendet ne nyonjino ko mogose rubet ago, ak inendet ne iyano ko maome melel agoi. ³⁶ Ago amwowok ale, koogero, amoyoni. ³⁷ Bwonjino tugul che kono Kwanda ak inendet ne nyonjino ko maone matiny. ³⁸ Amu kiawolu eng' Kipsengwet ma si ayai magenyu ago magetab inendet ne kiyokwo. ³⁹ Ak ni magetab inendet ne kiyokwo ale eng' tugul che kigono inendet ko mabeteno agot agenge ago tatun ang'eeti eng' betutab let. ⁴⁰ Amu ni magetab Babanyu, ale chi age tugul ne keere werit ak koyan inendet konyoru sobondab koigeny ak ang'eeti inendet eng' betutab let." ⁴¹ King'ung'ngung'so anyun Yahudik agobo inendet amu kimwa kole "A i makatiat ne kowolu eng' Kipseng'wet." ⁴² Ak kimwa kole, "tos ma Jeiso nito weritab Josep ne king'et Kwandanyi ak Kamet? Kotepto ano anyun si komwa kole 'kiachoruge eng' Kipseng'wet'?" ⁴³ Kowolji Jeiso anyun koleji "among'unyng'ung'se akwege eng' akwege. ⁴⁴ Maimuji chi konyonjo ama ichut Kwanda ne kiyokwo, ak ang'eeti inendet eng' betutab let. ⁴⁵ Kigisir eng' maotik ak king'eeti tugul eng' Jehovah, age tugul ne kagogas eng' Kwanda ak kagonetge konyonjino. ⁴⁶ Molen kigogeer chi age tugul Kwanda, kobate inendet ne bunu Jehovah, kigogeer inendet Kwanda. ⁴⁷ Amwowok Iman, iman, ale inendet ne iyani kotinye sobondab koigeny. ⁴⁸ A i makatiat ne bo sobon. ⁴⁹ Kiam kwanisiekwok mana eng' ong'atet ak kibek. ⁵⁰ Ni makatiat ne wolu eng' Kipseng'wet ne ng'oam chi ko mamee. ⁵¹ A i makatiat ne sobe ne kiwol eng' Kipseng'wet, ng'oam chi age tugul makatiandani kosobe koigeny, ee, ak bortonyu makatiat ne agoitoi agobo sobondo ne bo ng'weny. ⁵² Kiborio anyun Yahudik ichegei kole "imuktoi ano chichi kogonech bortanyi keam?" ⁵³ Koleji Jeiso anyun icheget, "amwowok Iman, iman ale, ng'oto moam bortab weritab chi ak oee korotikyi ko motinye sobondo eng' oring'wong'. ⁵⁴ Inendet ne amei bortanyu ak koe korotikyu kotinye sobondab koigeny ak ang'eeti inendet eng' betutab let. ⁵⁵ Amu omdit iman bortonyu, ak korotikyu ko che kiee iman. ⁵⁶ Inendet ne ome bortanyu ak koee korotikyu, komenyo ak amenye inendet. ⁵⁷ Kou ye kiyokwo Kwanda ne sobe, ak asobe amu Kwanda, kou noto inendet ne amo, ko sobe agine amu ane. ⁵⁸ Ni makatiandanato ne kiwol eng' Kipseng'wet, ma kou ye kiam Kwanisiek ak kobek, inendet ne ame makatiandani kosobe koigeny." ⁵⁹ Kimwa tuguchu eng' sunagogit kota konetisiei eng' Kapernaum. ⁶⁰ Ye kingogas ni che chang' eng' alamalyennyi, komwa kole, "wei ng'olyondoni, imuchi ng'o kogas?" ⁶¹ Ago kinai Jeiso eng' oritinyi kole ing'unyng'ung'jini alamalyennyi ng'olyondonito, koleji icheket, "tos kagonachak nito?" ⁶² Ara tos teptoi ano anyun ng'ot go tun ogeer weritab chi kotogostoi ole kimi atkinye? ⁶³ Tamirmiriet ne igoitoi sobondo, matile kiy borto, tamirmiriet ak sobondo ng'alek che kamwowok. ⁶⁴ Ago mito alak eng' akwe che maiyoni. Amu kinai Jeiso koboch taunet icheget che maiyoni ak inendet ne kimoche kong'wekta inendet. ⁶⁵ Ak kile, "amu nito anyun' kamwowok ale, magoi imuch chi konyonjo kobate ne igochini Kwanda." ⁶⁶ Kongete yoto, kochuchuchge che chang' che bo alamalyennyi amata kobendot ak inendet. ⁶⁷ Kileji anyun Jeiso choto taman ak aeng', "ara obendi ak akwe?" ⁶⁸ Kowolji anyun Simon Petero koleji, "Kiptaiyandani, kibendi ole mi ng'o? Itinye ng'alek chebo sobondab koigeny, ⁶⁹ ago kigiyan ak kenai kele i ne tilil ne bo Jehovah." ⁷⁰ Kowolji Jeiso icheget koleji, "kima alewenok taman ak aeng', ago oindet age eng' akwe?" ⁷¹ Kimwoe anyun agobo Judas ne bo kap Simon Iscariot, amu ine ne kimoche kong'wekta inendet ng'anda ki agenge eng' taman ak aeng'.