^{3 1} Kingobata tuguchu kobiit igorta ne bo Yahudik ak kolang'ta Jeiso Jerusalem. ² Ak kimi Jerusalem tamboiyot ne kainenyi ko Betesta eng' kutitab Hebranik, ole legite ormarichetab kechirek ne kitinye keterusiek mut. ⁴ Amu kichorchige Malaikayat ne bo Kiptaiyat tamboiyot betusiek alak kowendi kowase beko eng' miondo age tugul ne kitinye. ⁵ Ak kimi yoto chito age ne kiga komian kenyisiek sosom ak sisit. ⁶ Ako kingogeer Jeiso chichoto korue, ak konai kole kiu noto eng' betusiek che chang', koleji "imache kesoobin?" ⁷ Kowolji chichoto kimiani koleji, "Kiptaiyandani, matinye chi ne indea Tamboiyot ko kawasge beko amu ng'otanyoni kosib kowolu age." ⁸ Koleji Jeiso anyun, "ng'et ib kitokung'ung' ak iwechige." ⁹ Ak kisob chichoto ng'unoto ak koib kitogunyi ak kwo ak ki sabato betunoto. ¹⁰ Kileji anyun Yahudik inendet ne ki kisob, "betutab Sabato rani, ma chamdaat eng' ng'atutik iib kitog'ung'ung'." ¹¹ Ago kiwolji icheget koleji, "inendet ne kagosobo, ko kamwaiywo kolecho 'ib kitog'ung'ung ak iwe."' ¹² Kotebe anyun bichoto inendet kole, "ng'o chichoto kamwaun kole 'ib kitog'ung'ung' ak iwe'?" ¹³ Ago inendet ne kigagisoob ko kima nai kole ng'o inendet ne kisoobi, amu kiga kwo Jeiso ago kimi biko che chang' oloto. ¹⁴ Kingobata noto, konyorji Jeiso inendet Hekalut, ak koleji, "keer, kagisobin, amata ta iyai teng'ek si manyonjin kito age ne ya ne sirei ni." ¹⁵ Kiwo anyun chichoto ak komwachi Yahudik kole Jeiso ne kigaisoob inendet. ¹⁶ Kigius anyun Jeiso Yahudik amu ng'olyondonoto amu kiyai tuguchu eng' betutab sabato. ¹⁷ Ak kiwolji Jeiso icheget koleji, "boisie Babanyu agoi kora, ak aboisiei agane." ¹⁸ Kicheng' anyun Yahudik mising kole kobar inendet amu ma kele kityo kibistoe ng'atutik, ago kimwachi kole Jehovah ko Kwandanyi, koyaege kogergeit ak Jehovah. ¹⁹ Kiwolji anyun Jeiso iche koleji, "amwowok Iman, iman ale mayae kiy werit inege, ago ne keere koyaei Kwanda, amu tuguk che yae inendet koyae agine werit ko u nyoto" ²⁰ Amu chame Kwanda werit ak koborjini tuguk tugul che yae inendet, ak ta koborjini boisionik che eechen che sire chu, si kobiit okwong'ie. ²¹ Amu kou ye ing'eeti kwanda che kigobek ak kosoobi, isoobi werit kou noto agine che mache. ²² Amu mairuokyini Kwanda chi age tugul, ago kigogochi werit kiruoget tugul. ²³ Si kobit koteegis tugul werit ko u ye teegisi Kwanda. inendet ne ma teegisi Werit ko ma teegisi Kwanda ne kiyok inendet. ²⁴ Amwowok Iman, iman ale, inendet ne kase ng'olyondenyu ak koyani inendet ne kiyokwo, kotinye sobondab koigeny, ama wendi ole mi kiruoget, ago kagomong' eng' meet komong'ji sobondab koigeny. ²⁵ Amwowok Iman, iman ale, nyonei sait, ak kagoit sait ne kase che kigobek kutitab weritab Jehovah ak sabtos icheget che kase. ²⁶ Amu kou ye tinye Kwanda sobondo inege, ko u noto kigogochi Werit konom sobondo, ²⁷ Ak kigochi kimnatet koyai kiruoget amu inendet ko weritab chi. ²⁸ Amokwong'e nito, amu nyoni sait ne tun kase kutinyi tugul che mi kererisiek, ²⁹ Ak komong': ng'eetyini sobondo che kiyai ne kararan, ak kongeetyi kiruoget icheget che kiyai ne ya. ³⁰ Mamuchi ayai kiy anegei, aruochi kou ye agase, ako bo iman kiruogenyu amu machenge ayai magenyu ago magetab inendet, inendet ne kiyokwo. ³¹ Ng'otgabaorionjige ko ma bo iman baornatenyu. ³² Mi age ne baorianjina ak ang'et ale bo iman baornatet ne baorinjina. ³³ Kiyokyi ng'olyot Joana ak kibaoryanji imanda. ³⁴ Ago motooche baornatet kobun chi, ago amwae tuguchu si kobit kesoruok. ³⁵ Ki tait inendet ne kilole kokwengisie ak kiocham oboiboitune lapkeiyenyi eng' betusiek che matia. ³⁶ Ago baornatet ne atinye ko O kosir ne bo Joana, amu boisionik che kigona Kwanda ages, ko choto che ayae, ako choto che baorianjina kole kiiyokwo kwanda. ³⁷ Ak kibaorianja Kwanda inendet ne kiyokwa, tomo ogas kutinyi kong'ete ole kiigoi nda ogeer itondanyi. ³⁸ Ama tebye eng' akwe ng'olyondenyi amu maoyan inendet ne kiiyogu Jehovah. ³⁹ Osiachi sirutik olen otinye sobondab koigeny eng' choto kobate choto che baorianjino. ⁴⁰ Ago mochame obwanjo si kobit onyoru sobondo. ⁴¹ Matooche kalosunet nebunu biko ⁴² Ago ang'enok ale motinye chamyetab Jehovah eng' oriting'wong'. ⁴³ Kianyo eng' kainetab Babanyu, ama otacha, ng'onyo age eng' kainenyi otoche inendet. ⁴⁴ Omuktai ano oyan che otaagege kalosunet ne bunwok akweget, amochenge kalosunet ne bunu Jehovah ne inegei? ⁴⁵ Amobwat ole ang'angtok eng' Kwanda, mi age ne ng'ongtok, noto ko Musa ne omong'u. ⁴⁶ Amu nda kigoyan Musa ko nda ko yono, amu kisir agobo ane. ⁴⁷ Ago ng'o moyani sirutikyi, omuktoi ano oyan ng'alekyu?"