¹ Kimi chi ne bo Parisaik, ne kigigure Nikodemo, ki bounindet nebo Yahudik. ² Kinyo chichoto ole kimi Jeiso kemoi ak koleji "Rabbi, king'et kele i konetindet ne bunu Jehovah, amu mami chi ne imuchi koyai kaborunaichu iyae inye ngo mami Jehovah koboto inendet." ³ Kowolji Jeiso koleji, "amwaun komie Iman, iman ale ng'ot ko ma kisich chi eng' siget ne leel ko magoi imuch kogeer bounadetab Jehovah." ⁴ koleji Nikodemu inendet, "kisiktoi ano chi ye kagoosit? imuchu kogetyige moetab kamenyi kogeny, ak kesich?" ⁵ Kowolji, Jeiso Iman iman koleji, " Amwaun ale ng'ot koma kisich chi eng' beko ak Tamirmiriet, ko makoi imuch komong'ji bounadetab Jehovah." ⁶ Ne kigisich eng' borto ko borto ak ne kigisich eng' Tamirmiriet ko Tamirmiriet. ⁷ Amekwong' amu kamwaun ale 'kanyol kesichok eng' siget ne leel.' ⁸ Usyin koristo ole mache; ak igase cheenyi ago meng'et ole bunu nda ko ole wendi. kou noto chi age tugul ne kigisich eng' Tamirmiriet." ⁹ Kowolji Nikodemu koleji, "imuchi kobitunda ano tuguchu?" ¹⁰ Kowolji Jeiso koleji, "i konetindet ab Israel ako meguitosi tuguchu? ¹¹ Amwaun Iman, iman ale, kimwae ne king'et ak kebaorianjini ne kigeg'eer, amotache baornadenyo. ¹² Ndamwawok tugul che bo ng'weny amoyani, omuktoi ano oyan ng'amwawok tuguk che bo kipseng'wet? ¹³ Mami chi ne kigotogosta Kipseng'wet, kobate inendet weritab chi ne kinyo kobun Kipseng'wet. ¹⁴ Ak kou ye kiigartat Musa erenet eng' ong'atet, kigartati kou noto weritab chi matiny, ¹⁵ Si konyor sobondab koigeny tugul che iyani eng' inendet. ¹⁶ Amu kicham Jehovah ng'weny mising,' kot kogoito werinyi ne kigisich inegei, si malus age tugul ne iyani inendet, ago si konyor sobondab koigeny. ¹⁷ Amu kima iyokyi Jehovah werit ng'weny koruokyi ng'weny, ako si kesor ng'weny eng' inendet. ¹⁸ Makiruokyini chi ne iyani inendet, ago inendet ne maiyani ko kageruokyi, amu ma iyan eng' kainetab Weritab Jehovah ne kigisich inege. ¹⁹ Ak ni kiruoget: amu kinyonji ng'weny labkeiyet ak kicham biko mesundeito kosiir labkeiyet, amu ki yachen boisionikwai. ²⁰ Amu sose lapkeiyet chi age tugul ne yae yaitio, ama nyoni ole mi lapkeiyet si mang'ong'og'is boisionikyi. ²¹ Ago nyoni ole mi lapkeiyet inendet ne yaei imanda, si kobiit kobarta boisinikyi, kele kigiyai eng' Jehovah. ²² Kingobata tuguchu konyo Jeiso ak alamalyennyi emet ne kiguure Judea; ak kibeni oloto koboto icheget, ak kobatisanis. ²³ Ak kibatisanisie Johana agine eng' Aenon ne legite Salim, amu kimi beko che chang' oloto, kibwa biko ak kigibatisan, ²⁴ Amu kitomo ketorchi Johana korgoret. ²⁵ Kibiit anyun tebutiet eng' alak che bo alamalyetab Joana ak Yahudik agobo katililet. ²⁶ Ak kibwanji Johana ak koleji, "Rabbi, ibatisanisiei inendet ne kimi koboten eng' Jordan komosin, kiigebaorian agobo inendet ak bwanjini inendet biko tugul." ²⁷ Kowolji Joana koleji, "Magoi imuch chi kotaach kiy ng'o ma kigochi eng' kipseng'wet. ²⁸ Kiobaorianjo akweget ole kiamwa ale, 'ma a i Kristo' ago 'kigiyokwa andoune inendet'. ²⁹ Sandet inendet ne tinye mureret, ago baibai mising' choruetab sandet ne tononi koepchini iit inendet amu kutitab sandet ; isuldaat anyun boiboiyenyu. ³⁰ Nyoljini inendet kolandae ne matiny, ago ajujuji ne matiny. ³¹ O inendet ne bunu barak kosiir tugul, inendet ne bo ng'weny kobo ng'weny, ako ngololi che bo ng'weny, inendet ne bunu barak ko O kosiir tugul. ³² Baorianjini inendet kito ne kigogeer ak ne kigogas, ama mi chi ne taache baornatenyi. ³³ Inendet ne kagotaach baornatenyi ko kagonde ng'oksenyi kole bo iman Jehovah. ³⁴ Amu ng'alali ng'alekab Jehovah inendet ne kiyogu Jehovah amu magonu inendet Tamirmiriet eng' karogendoet. ³⁵ Chame Kwanda Werit ak kigonde tuguk tugul eunyi. ³⁶ Tinye sobondab koigeny ne iyani Werit ama geere sobondo ne magose iit Werit, ago tebe nereg'ek ab Jehovah baragunyi."