¹ Ak eng' betutab somok, ko kimi katunisiet eng' Kana ne bo Galili, ak kimi oloto akine kametab Jeiso. ² Ak kiga kigurji katunisiet Jeiso agine koboto alamalyennyi. ³ Ak kingoror divaik, koleji kametab Jeiso inendet, "makotinye biko divak". ⁴ Koleji Jeiso inendet , Chebiosoni kiting'ege nee ak inye? tomo koit sainyu". ⁵ Kimwochi kamet otwogik koleji, "kiy age tugul ne kamwowok, oyai". ⁶ Ak kimi yoto terenik lo che eechen che bo beko, ago bo koik kou bitetab katililetab yahudik, kiyamege age tugul ak debeisiek mut nta ko lo. ⁷ Koleji Jeiso iche, "onyit beko terenichoto," kiinyit anyun mising'. ⁸ Ak kileji Otwokik,"osilu ak oibchi ra bounintetab tumto, ak kiipchi anyun". ⁹ Ak ye kingochamcham bounintetab tumdo beko che kagoek divaik amanai ole kabunu (ago kinget otwogik che kisile beko) kogur anyun bounintet sandet. ¹⁰ Ak koleji, "igoitoi chi tugul divaik che onyinyen korok, ak ye kagoe biko mising', kogon che ma onyiny, ago kaigonor inye divaik che onyiny agoi nguno." ¹¹ Taunet nito ne bo kaborunoikyi ne kiyai Jeiso eng' Kana ne bo Galili; kiibortoi torornatenyi, ak kiyan inendet alamalyenyi. ¹² Kingobata nito kochortage kwo Kabernaum, koboto kamet ak che tupcho ak alamalyenyi agiche, ak kobeni oloto betusiek che matia. ¹³ Ak kigarik Paska ne bo yahudik, ak kitogosta Jeiso Jerusalem. ¹⁴ Ak kinyor kotebye eng' hekalut icheget che kialdoi eik, kechirek ak cheptugenik, koboto walik ab siling'isiek. ¹⁵ Ak kiyai kipcharitit ne bo o rogoonik che kisach, ak koon komanda eng' hekalut, koboto kechirek ak eik, ak koranda siling'isiek che bo walik ak koabuch mesosiekwai. ¹⁶ Ak kilechi icheget che kialdoi cheptugenik, "oib tuguchu koba eng' yu; amoyai gotab Babanyu koek ole oyae mungaret". ¹⁷ Ak kinyonji kabwatet alamalyenyi ne kigisir kele "ama ng'etkong'da agobo gong'ung'". ¹⁸ Ak kiwolji anyun Yahudik Jeiso koleji, "nee kabarunet ne iborwech ( iboru) amu iyae tuguchu?" ¹⁹ Kowolji Jeiso koleji "ong'em hekaluni si ang'eet kogeny eng' betusiek somok." ²⁰ Kile anyun Yahudik, kigiteech hekaluni eng' kenyisiek artam ak lo, tos ing'eet inye eng' betusiek somok?. ²¹ Ago king'alali inendet agobo hekalut ne noto ko bortanyi. ²² Ye king'ong'eet anyun inendet komong' eng' che kibek, kobwat alamalyenyi kole kiga komwachi iche ng'olyondonoto ak kiyan sirutiet ak ng'olyot ne kigamwa Jeiso. ²³ Ye kimi Jerusalem eng' igorta nebo betutab Paska, koyan biko che chang' eng' kainenyi kogere kaborunoik che kiyai. ²⁴ Ago kima chamdage Jeiso amu king'et biko tugul. ²⁵ Ak kima mage kiy kobaorian chi agobo chito age, amu king'et inendet kito ne mi chi orit.