¹ Kinyo Kererit Maria Magdalene Karon ko kairir emet, eng' betut ne bo tai ne bo wigit ak kogeer koita ko kageisto eng' kererit. ² Kolabat agoi ole mi Simon Petero ak nyoto age ne bo alamalyet ne kichame Jeiso ak koleji iche, "Kageib Kiptaiyat eng' kererit ama kingen ole kaginde." ³ Koba anyun Petero ak noto age ne bo alamalyet kotokyige kererit. ⁴ Kiruai tuwai kibagenge ak kilabat nyi age ne bo alamalyet kondoe Petero ak korub koit kererit. ⁵ Kinguruk kogeer orit, ak koro ng'oroik ab katanit ko iitootin, ago mawo orit. ⁶ Konyo anyun Simon Petero agine korubu inendet ak kwo kererit orit. Ak koro ng'oroik che bo katanit ko iitootin ⁷ ak ang'et ne kimi metinyi, ko kima komi koboto ng'oroik che bo katanit, ago kimamanat inege eng' olda age. ⁸ Kiwo orit agine noto age ne bo alamalyet ne kiga Sib koit kererit ak kigeer ak koyan. ⁹ Amu kitomo konai sirutiet ne kiile, "ng'eete kogeny eng' chegibek. ¹⁰ Kowektage Koba gaa anyun kogeny, choto bo alamalyet. ¹¹ Ago kitononi Maria eng' sang' ne bo kererit ako rirei. Ago kingotakorirei, kong'uruk koiit kererit. ¹² Ak kigeer Malaikaisiek aeng' che kilochi ngoroik che lelach, kotebyei ng'weny , age eng' ole bo metit ak age eng' ole bo kelyek eng' ole kimi bortab Jeiso. ¹³ Ak kileji, "chepyosoni, kalya si irir?" Koleji, "amu kageib Kiptaiyandenyu, amang'et ole kaginde inendet." ¹⁴ Ak Kongo kagomwa ko u noto, kowechge ak kogeer Jeiso kotononi, amanai kole Jeiso noto. ¹⁵ Koleji Jeiso, "chepyosoni, kalya si irir? ichenge ng'o?" Kiibwati kolen abere inendet ko ribindetab mbaret, ak kole, "Kiptaiyandani, ng'o keiib inendet, imwawo ole kende si aib." ¹⁶ Koguur Jeiso koleji, "Maria." Kowechge ak koleji eng' kutitab Hebranic, "Rabboni" nge weech kele, "konetindoni". ¹⁷ Koleji Jeiso, " ametinyoo, amu tomo atogosyi oldab Kwanda, ago ui ole mi tupchosiekyu ak ileji, atogosyini oldab Babanyu, ago Baba neng'wong, Jehovah nenyu ago Jehovah neng'wong'." ¹⁸ Konyo Maria Magdalene koleji alamalyet, "Kaageer Kiptaiyat" ak kagomwachi tuguchu inendet ¹⁹ Ak ye kingoek koskoleng', eng' betunoto bo tai ne bo wigit, ye kiga keger kurgotik eng' ole kimi alamalyet amu kiiywei Yahudik , Konyo Jeiso kotonone kwenung'wai ak koleji, "ng'otebi kalyet eng' akwe." ²⁰ Ak ye kingo kagomwa nito, koborji eunekyi ak karastanyi. Koboiboitu anyun alamalyet ye kingogeer Kiptaiyat. ²¹ Koleji Jeiso anyun kogeny, "ngotebi kalyet eng' akwe. Kou ye kiiyokwo Kwanda, ayoktook ak akwe ko u noto." ²² Ak ye kingo kagomwa nyoto, kobusyi ak koleji, "otaach Tamirmiriet ne Tilil. ²³ Biko alak tugul che onyojini kaat tengekwogikwai, kenyojini kaat; Ak alak tugul che oeisioi onyochi kaat, keesioi kenyochi kaat ." ²⁴ Ago kima komi Tomas ne kigiguure Didumo, ne ki age eng' taman ak aeng' koboto icheket ye kinyoni Jeiso. ²⁵ Koleji inendet anyun chun alak che bo alamalyet, Kageger Kiptaiyat." Ago koleji Tomas icheget, "ng'ot ko mageer eng' eunekyi berutik che bo kipchumarisiek, ak ande mornenyu berutik ab kipchumarisiek ak ande eunyu karastanyi, komayani." ²⁶ Ak kingo bata betusiek sisiitu, ko kimi go' alamalyet kogeny, ago kimi Tomas koboto icheget. Konyo anyun Jeiso ko kerotin kurgotik, ak kotonon eng' kwenungwai ak komwa kole, "ngotebi kalyet eng' akwe." ²⁷ Ak koleji Tomas, "iyogou morneng'ung' ak inde karastanyu. Ameegu ne matinye kayanet, ago iyan." ²⁸ Kowolji Tomas koleji, "Kiptaiyandenyu, ago Jehovah nenyu. ²⁹ Koleji Jeiso inendet, " kaiyan amu kaigeero, iberurotin iche che iyani ama geer." ³⁰ Kiyai Jeiso kaborunoik alak che Chang' eng' taitab alamalyet che ma sirotin eng' bukuini, ³¹ Ago kigisir chu so kobiit oyan ole Jeiso ko Kristo, weritab Jehovah, ak si kobiit ye oyani, onyoru sobondo eng' kainennyi.