¹ Kinam anyun Pilato Jeiso ak kobire kipcharitit. ² Ak kitaa askarik ng'atiet ne bo katok ak konde metit ak kolaakyi inendet ng'oriet ne arus ne birir. ³ Ak kobwa ole mi inendet kolen, "kigatin, Laitoriatab Yahudik!" Ak korabach inendet. ⁴ Ak kimanda Pilato kogeny ak koleji icheket, "ogeero, kamutwak inendet konyo taing'wong' si onai ole manyorji ane lelut inendet." ⁵ Komong' Jeiso anyun Konyo sang' ko kerat metit eng' ng'atiet ab katok ak kolaagonu ngorionoto arus ne birir. Ak koleji Pilato bichoto, "ogeero, chichi anyun o!" ⁶ Ye kingogeer anyun inendet tisiik che eechen ak kiptainik, kobolyo kole, "igartat, igartat," koleji Pilato icheget, omut akwe inendet ak igartat amu ma anyorji lelut." ⁷ Kowolji Yahudik koleji, "kitinye ng'atutiet ak kanyol kome amu ng'atutionoto, amu kiyaige koek weritab Jehovah." ⁸ Ye Kongo gas anyun Pilato mwaonoto, koiywei mising', ⁹ Ak kiwa Praitorium orit kogeny ak koleji Jeiso, "ibunu ano?" Ago ma wolji Jeiso inendet. ¹⁰ Koleji Pilato anyun inendet, "metwekwo?, menget ile atinye kimnatet ameten ak atinye kimnatet agartatin?" ¹¹ Kowolji Jeiso koleji, "kama tetinye kimnatet iyaiwa kiy nda kama kigonin eng' barak. Noto anyun, tinye inendet ne koindeno euneguk tengekto neo kosir." ¹² Kongetege yoto, kocheng' Pilato kotiach inended, ago kibolyo Yahudik kole, "ng'ot itiach chichi, ko ma i choruet ne bo Kaisari. Renye Kaisari chi age tugul ne yaege koek laitoriat." ¹³ Kingogas anyun PIlato ng'alechuto, komut Jeiso komong' sang' ak kotebi ng'weny eng' ng'echeretab kiruoget eng' ole kiguure "Tetetab koik ," ago kiguure eng' kutitab Hebranik "Gabata." ¹⁴ Ki chobetab Paska betunoto ak ki olo bo sait lo. Ak kileji Yahudik, "ogeero, Laitoriandeng'wong'!" ¹⁵ Kobolyo anyun bichoto kole, "iste inendet, iste inendet; Igartat inendet!" Koleji Pilato anyun icheget, "Agartat Laitorianteng'wong'? kowol tisiik che eechen kole, "makitinye laitoria kobate Kaisari." ¹⁶ Kogoito anyun Piilato inendet kigartat, konam anyun Jeiso icheget ak komut. ¹⁷ Ak kimut anyun icheget Jeiso komanda, ako kiibe inegei kimurtoiyot agoi koit ole kiguure, "koretab Terta, ne kiguure Golgota eng' kutitab Hebranik." ¹⁸ Ole kiigartate iche inendet koboto Alak aeng, age komosi, ak age komosi ak komi Jeiso Kwen. ¹⁹ Ak kisir anyun Pilato siret ak konde kimurtoiyot. Kosir kole: JEISO NE BO NASARET, LAITORIAT NE BO YAHUDIK. ²⁰ Kosoman anyun Yahudik che chang' sironito amu kilegite ng'anaset ole kigigartate Jeiso, ako kigisir eng' kutitab Hebranik, Romanik ak Yunanik. ²¹ Koleji anyun tisiik che eechen che bo Yahudik Pilato, "Amesir ile, 'Laitoriat ne bo Yahudik, ago kimwa kole, 'A i Laitoriat ne bo Yahudik." ²² Kowol Pilato kole, "kito ne kaasir ko kaasir." ²³ Ye kingo kagogartat anyun askarik Jeiso, konam ng'oroikyi kopchei koek kebeberwek ang'wan, koib askarindet age tugul kebeberta agenge; ko u no to sumet agine. Ak kima tinye sumet ole kigituiyo amu kigaginab koek agenge kong'eete barak agoi kapkelyen. ²⁴ Kolejige anyun ichegei, amatokany kegerer ago "ongeser barbarek, si kenai chito ne bunjini." Si kosulda sirutiet ne mwoe kole, "Kipchejige ingoroikyu ak koltjige ng'oryenyu." Kiyai anyun askarik tuguchuto. ²⁵ Ago kitononsot eng' ole lekite kimurtoiyotab Jeiso' kamet ak chepto ne tupcho ak kamet, Maria ne bo Klopa ak Maria Magdalena. ²⁶ kingo kagogeer Jeiso anyun kamet, ak alamalyet noto kichamei, kotononsot eng' yoto, koleji kamet, "keer wering'ung'!" ²⁷ Ak koleji kora alamalyanoto, "keer, komet!" Ak kong'etee sainoto, komut inendet chebiosonato kwo gonnyi. ²⁸ Kingobata choto, ko kagonai Jeiso kole kagogesgei tuguk tugul si kobiit kosulda sirutiet, komwa kole, "amo melel." ²⁹ Kiga kindeno yoto teret ne nyitat siki: konyiit *sibonjit anyun, an koyogochine *husop konde kutinyi. ³⁰ Ye kingo kagotaach Jeiso siki, komwa kole, "kagokesge:" Ak koabuch metinyi ak kogoito tamirmiryenyi. ³¹ Amu ki chobet ago kimakimakjini muswek kotebe kimurtoiyot eng' betutab Sabato, (amu ki o betunoto bo sabato), kosom Yahudik Pilato kole keiri kelyekwai ak keisto. ³² Kobga anyun asikarik ak koiri kelyekab chito ne bo tai ak chebo chito nebo aeng' ne kigagigartat koboto inendet. ³³ Ago kingobga ole mi Jeiso, ak kogeer kole kagome, komato koiri kelyekji. ³⁴ Kobate, kitor agenge eng' asikarik choto karastanyi koboisye ngotit, ak ng'unoto komong' korotik ak beko. ³⁵ Ak kibaorian inendet ne kigeer ak ko bo iman baornatenyi, akonget inendet kole mwaei iman so kobiit oyan ak akwe. ³⁶ Kiyaak tuguchu si kobiit kosulda sirutiet ne kile, "makiiriei kowenyi." ³⁷ Ak komwae kogeny sirutiet age kole, "tun keere iche inendet ne kitore." ³⁸ Ak kingobata tuguchu, kwo Josep ne bo Arimatea, ne ki age eng' alamalyetab Jeiso, (kwo eng' ungot amu kiiywei Yahudik kosom Pilato kole kosut mustab Jeiso. Konyo anyun Josep koib bortanyi kogachamji Pilato. ³⁹ Kinyo agine Nikodemo, ne kiganyonji Jeiso kemoi atkinye tai, koibu tuguk che u igomoik che kigingolda nyamdutik che ki olo bo ratilisiek bogol. ⁴⁰ Kisut anyun mustab Jeiso ak kotae ng'oroik che bo katanit koboto nyamdutik ko u biteetab Yahudik yo tubisiei. ⁴¹ Kimi mbaret ole kigagigartate inendet ago kimi mbaranoto, kererit ne leel ne kitomo ketupchi chi. ⁴² Kiinde anyun Jeiso oloto amu ki betutab chobetab Yahudik ago ki legit kererit.