¹ Ak ye kita konerechi Saul koboisie kamuiset ak barisiet agobo alamalyetab Kiptaiyat, kwo oldab tisiindet ne o, ² ak kosom inendet baronok che ibei koba Damasko agobo sunagogisiek, kole ngonyor alak tugul che bo Oranato, ngo murenik anan chebiosok, komuchi komut kobwa Jerusalem ko ratotin. ³ Ak ye kita kowendi, ko karikta Damasko: koluu ngunoto lapkeiyet ne kibunu kipsengwet koluuchi inendet komoswek tugul; ⁴ ak kiibutyi ng'weny, ak kogas kutit kolejin inendet, Saul, Saul, amu nee si iusa? ⁵ Ak kile, I ng'o Kiptaiyandani? Ak kile, Ai Jeiso ne iuse: ⁶ ago ng'eet, ui nganaset, si kemwaun kit ne kanyol iyai. ⁷ Ak kitononso konam kuy bik che kibendi koboto inendet, kogasei twegunet, ama keerei chi. ⁸ Kong'eet anyun Saul; ak kingo kagoyatogis konyekyi, ko ma kogeerei kiy; komut anyun ichek inendet konamoti eut, agoi Damasko. ⁹ Ak kitar betusiek somok ak magerei kiy, ama amisiei anan koeeiso. ¹⁰ Ak kimi alamalyet age Damasko, ne kigiguure Anania; ak kileji Kiptaiyat inendet eng' ng'ang'utiet, Anania. Kowol kole, Ami yu, Kiptaiyandani. ¹¹ Koleji Kiptaiyat, Ng'eet, ui oret ne kiguure Ne Litit, ak iteeb eng' gotab Judas chito ne kiguure Saul, chitab Tarso: keer anyun, saei. ¹² Ak kagogeer inendet chito ne kiguure Anania, konyonei agoi go, ak kogonoor inendet eunikyi, si kogeerto. ¹³ Ago kiwol Anania, kole, Kiptaiyandani, kiagas eng' bik che chang' agobo chichito, ole te yaitiet ne kigoyachi biguk che tililen eng' Jerusalem. ¹⁴ Ak tinyei eng' yuto kimnatet ne bunu tisiik che eechen si korat tugul che kuurei kaineng'ung'. ¹⁵ Ago kileji Kiptaiyat, Ui inye: amu kinnyu inendet ne aboisie, ne kialewen, si koib kainennyu taitab Bororosiek ak laitorinik, ak lagokab Israel; ¹⁶ amu aborjini inendet ole te chang'indab tuguk che kanyol konyorune nyalilda agobo kainennyu. ¹⁷ Kiwa anyun Anania, ak kiwa agoi go; ak ye kiigonor inendet eunekyi, koleji, Tupchennyu Saul, kagoyokwa Kiptaiyat, inendet Jeiso, ne kichumjin eng' oret ne kiibunu, kole igeerte, ak kinyiitun Tamirmiriet ne Tilil. ¹⁸ Ak eng' sainato, kobutyo eng' konyekyi tuguk che u berik, ak kigeerto; ak king'eet anyun ak kigibatisan. ¹⁹ Ak kiamis ak kinyor kimnatet. Ak kitebi betusiek alak koboto alamalyet che kimi Damasko. ²⁰ Ak ne matianit, koamda agobo Jeiso eng' sunagogisiek kole, Inendet ko Weritab Jehovah. ²¹ Ak kikwong'io tugul che kigas inendet, ak kole, Tos ma chichi ne kotar bik eng' Jerusalem, icheget che cham koguurei kainani? ak kagonyo oli agobo ng'oyondonito, ²² si kobiit komut ichek ko ratotin koba taitab tisiik che eechen. ²³ Ak ye kingogesgei betusiek che chang', kotuiyo Yahudik koruoch kole kobar inendet. ²⁴ Ago kinaak eng' Saul chobeng'wai ne bo ung'ot. Ak kirib ormarichok bet ak kemoi, kole kobar. ²⁵ Ago kiimut alamalyennyi kemoi ak kochoorta kosiir irimet, komitei mesendet orit. ²⁶ Ak ye kingonyo Jerusalem kotiem kole koyomogei ak alamalyet: ago kiiywei ichek tugul inendet, ama iyan kole alamalyet inendet. ²⁷ Ago kiimut Barnaba inendet kwo ole mi che kiyoktoi, ak kotetyi anyun ole kigeerto inendet Kiptaiyat eng' oret, ak kole kiga kong'alalji inendet, ak ko u ye kigoamda eng' nyiganatet eng' Damasko eng' kainetab Jeiso. ²⁸ Ak kimi koboto ichek eng' Jerusalem. Komandoi ak komong'u, ²⁹ koamdoi eng' nyiganatet eng' kainetab Kiptaiyat: ak kong'alal kobeligei koboto Yahudik che ki kuting'wai ko Yunanik; ago kicheng'e kotugul kole kobar inendet. ³⁰ Ak ye kingonai tupchosiek, komut inendet kochortagei kwo Kaisaria, ak koyokto kwo Tarso. ³¹ Konyor anyun kamung'et kaniset ne kimi Judea komugul ak Galili ak Samaria, koteegak; ak ye kibendoti eng' kaiyweisietab Kiptaiyat ak eng' kagaigaet ne bo Tamirmiriet ne Tilil, kotesak. ³² Ak ye kiwendote Petero komoswek tugul, kochortagei ole kimi che tililen che kimenyei Luda. ³³ Ak kinyorji oloto chito age ne kigigure Ainea, ne kiga korue itogunnyi kenyisiek sisit; amu ki meat borto. ³⁴ Koleji anyun Petero inendet, Ainea, isoobin Jeiso Kristo: ng'eet, ak iite itogung'ung'. Kong'eet anyun ngunoto. ³⁵ Ak kigeer inendet tugul che kimenyei Luda ak Saron, ak koyan Kiptaiyat. ³⁶ Ak kimi age ne bo alamalyet Jopa ne kigiguure Tabitha, ne ye kiweech kele Dorkas. Kitinyei chebiosoni boisionik che chang' che miach ak kagochinoik che kiigoitoi. ³⁷ Ak kimian eng' betusiechoto, ak kime; ak kingo kagoun, konde got age ne mi barak. ³⁸ Ak amu ki legityin Luda ak Jopa, ko ye kingogas alamalyet kole, mi Petero oloto, koyokyi bik aeng' inendet, kosom kole, Nyonjech, amegage. ³⁹ Kong'eet anyun Petero ak koba ak ichek. Ak kingo kagoit, komut inendet kwo got ne bo barak: ak kitonondos mosogik tugul korirtos eng' ye legit inendet, ak koborji sumotik ak ngoroik che kinabei Dorkas, ye kita komi koboto ichek. ⁴⁰ Komaanda Petero tugul koba sang', ak kogutuny, kosa; ak kingoweleljigei borto, koleji, Ng'eet, Tabita. Ak kiyat konyekyi: ak kingogeer inendet Petero, kong'eet koteb ng'weny. ⁴¹ Ak kogochi inendet eunyi, ak konam inendet kong'eet; ak ye kingo kagoguur che tililen ak mosogik, konde inendet taing'wai ko kagosob. ⁴² Ak kinaak eng' Jopa komugul: ak kiiyan che chang' Kiptaiyat. ⁴³ Ak kitebi eng' Jopa betusiek che chang' koboto chito age ne kigiguure Simon ne teiteindetab muiywek.