¹ Ak kichamnyechin agine Saul meenyi. Ak king'eet betunoto usisiet ne o agobo kaniset ne kimi Jerusalem; ak kiyesta ichek tugul koyom emotinwekab Judea ak Samaria, kobate che kiyoktoi. ² Kotub anyun Stepano bik che kigonyiti Jehovah, ak koteiyo mising' agobo inendet. ³ Ago kiinyal mising' Saul kaniset, ak kowendi got age tugul, kochuutu murenik ak chebiosok ak kotoorjin korgoret. ⁴ Kiba anyun che kiga koyesta, koamdaat ng'olyot. ⁵ Ak kichortagei Pilipu nganaset ne bo Samaria, ak koamji ichek Kristo. ⁶ Ak kiepchi it tuiyosiek eng' yamdaet agenge ng'alek che kimwae Pilipu, ye kingogas ak kogeer kaborunoik che kiyai. ⁷ Amu kimanda tamirmirik che muruonen, eng' che chang' che kitinyei, kowaaktos eng' kutit ne o: ak kigisoob che chang' che meiyotin borwek, ak che kiing'waldos. ⁸ Ak kibiit boiboiyet ne o eng' nganasanato. ⁹ Ak kimi chito age ne kigiguure Simon, ne kicham kong'orsei eng' betusiek alak eng' nganasanato, ak kiigochi bororietab Samaria kokwong'io, komwae inendet kole, Ai chito ne o. ¹⁰ Kiephin it tugul inendet, kong'ete ne mining' agoi ne o, kolen, Kimnatetab Jehovah chichi, ne kiguure ne O. ¹¹ A kiepchin it inendet, amu kicham kogochin kokwong'io eng' betusiek che chang' eng' ng'orsosiekyi. ¹² Ago ye kingoyan ng'alekab Pilipu ye kiamdoi logoiywek che miach agobo bounatetab Jehovah ak kainetab Jeiso Kristo, kibatisan anyun murenik koboto chebiosok. ¹³ Ak kiiyan Simon agine: ak kingo kagibatisan kotebi koboto Pilipu: ak kingogeer koyaagis kaborunoik ak boisionikab kimnatet kokwong'. ¹⁴ Kingogas anyun che kiyoktoi che kimi Jerusalem kole, kogotaach Samaria ng'olyotab Jehovah, koyokyi Petero ak Johana. ¹⁵ Ak ye kingo kagochorgei ichek, kosa agobo ichek, kole, kotaach Tamirmiriet ne Tilil. ¹⁶ Amu kitom kochorjigei agot agenge eng' bichoto: kiga kibatisan ichek eng' kainetab Kiptaiyat Jeiso kityo. ¹⁷ Yeityo kogonoor ichek eunekwai, ak kitaach Tamirmiriet ne Tilil. ¹⁸ Ye kingogeer anyun Simon kole kaga ngo konoor alamalyet chi eunekwai, kigochi Tamirmiriet ne Tilil, kogochi ichek silingisiek. ¹⁹ Kole, Ogono agane kimnatoni, si ngagonoor chi age tugul eunekyu, kotaach Tamirmiriet ne Tilil. ²⁰ Ago kileji Petero inendet, Ingobetyo siling'isieguk koboten, amu kelen inyoru konunetab Jehovah eng' siling'isiek. ²¹ Metinye kebeberta anan motwet eng' ng'olyondoni: amu ma mie muguleldang'ung' eng' taitab Jehovah. ²² Sigu anyun eng' tengeging'ung', ak isa Kiptaiyat, tamangab kenyoun kaat amu kabwatetab muguleldang'ung'. ²³ Amu ageere ale imi eng' ng'wanindo ak eng' ratutietab tengekto. ²⁴ Ak kiwol Simon kole, Osaiywa Kiptaiyat, si mabwanja agot agenge tuguk che kaomwawa. ²⁵ Ye kingo kagobaorian anyun ak komwa ng'olyotab Kiptaiyat, koweektagei Jerusalem, ak koamji logoiywek che miach nganasok che chang' che bo Samarik. ²⁶ Ago kimwachi Pilipu malaikaiyatab Kiptaiyat, koleji, Ng'eet ak iwe murot ne bo tai ak oret ne chortagei ne wendi Gasa kong'eete Jerusalem: ne surkwen. ²⁷ Ak king'eet anyun kwo: ak keero, chitab Etiopia, ne kigimoch, ne kitinyei bounatet ne o eng' eutab Kandake, laitoriat kwondo ne bo Etiopik, ne kiribei tugukyi tugul che bo kamanutiet ne o, ne kiga nyo Jerusalem kosa. ²⁸ Kiweeksei anyun, kotebe karinnyi, ak kosomani bukuitab maotiot Isaia. ²⁹ Ak kileji Tamirmiriet Pilipu anyun, Ui rikte, onamge ak karina. ³⁰ Ak kilabat Pilipu ak kogas inendet kosomani bukuitab maotiot Isaia, ak kileji, Iguitosi ki ne isomani? ³¹ Ak kile, Amuktoi ano, ngo maiborua chi? Ak kiigaigai Pilipu kole, kolany karit ak kotebi tuwai. ³² Ak chu sirutik che kisomanoti, Kigimut ko u kechiriet ne kikwerie kwo eng'set; Ak ko u aruetab kechiriet ne sisei eng' taitab chito ne tilei kororokyi, U noto agine mang'any kutinyi: ³³ Kigiisto kiruogennyi eng' kaming'inennyi bo ge: Ng'o ne tun mwaitoi ibindanyi? Amu kinemu sobondonyi eng' ng'weny. ³⁴ Ak kiwolji chichoto kigimoch Pilipu koleji, Asomin ale, mwae maotiot ng'olyondoni agobo ng'o? agobo inendet, anan agobo chito age? ³⁵ Kong'any anyun Pilipu kutinyi, ak kotoi eng' sirutioni koamji inendet agobo Jeiso. ³⁶ Ak ye kingota kobendi eng' oret, koit ye mi beek, kole chichoto, Keer beechu-o, nee ne kera si ma kibatisana? ³⁷ Ak kile Pilipu, Ngiyan eng' muguleldang'ung' tugul, kimuchi kibatisanin. Ak kiwol kole, Ayani ale Jeiso Kristo ko Weritab Jehovah. ³⁸ Kong'at anyun kotonon karit: ak kichortagei tuwai koba beek, Pilipu; ak chichoto; ak kiibatisan inendet. ³⁹ Ak ye kingolong' eng' beek, komut Tamirmirietab Kiptaiyat Pilipu; ak mata kogeer anyun chichoto kigimoch Pilipu, amu kiwa chichoto eng' boiboindo. ⁴⁰ Ak kitook Pilipu eng' Asoto: ak kosiirto, koamjinoti logoiywek che miach nganasok tugul, agoi koit Kaisaria.