¹ Kimi chito age Kaisaria ne kigiguure kainennyi Kornelio, ne ki kiptaiyatab bogol ne bo luget ne kigiguure luget ne bo Italia. ² Chito ne kigonyiti Jehovah ak koiywei inendet koboto gonnyi tugul, ne kiigochin bik kagochinoik che chang', ak kosaei Jehovah kotugul. ³ Ak kigeer eng' ng'ang'utiet kimni, olo bo sogol ne bo bet, malaikaiyatab Jehovah konyonjin inendet, ak koleji, Kornelio. ⁴ Ak kingogeer inendet mising' eng' kaiyweisiet, kole, Tos nee, Kiptaiyandani? Koleji, Kigoit barak sautiguk ak kagochinoiguk koek kabwatet eng' taitab Jehovah. ⁵ Iyokte anyun bik koba Jopa, koguur chi ne kiguure Simon, ne kainennyi ne bo aeng' ko Petero: ⁶ Inendet ko toondetab Simon ne teiteindetab muiywek, ne mi gonnyi tabandab araraita. ⁷ Ak ye kingo kakwa malaikaiyat ne king'alalji inendet, koguur otwogik aeng' che bo gonnyi, ak askarindet ne kigonyiti Jehovah ne ki age eng' che kiboisiechin inendet kotugul. ⁸ Ak kingo kagomwachi ichek ng'alek tugul, koyokto koba Jopa. ⁹ Ak eng' betut ne kiisubi betunoto ye kita kobendi, ko karikta nganaset, kotogosta Petero got barak, eng' olo bo sait lo, kwo kosa. ¹⁰ Ak kiam rubet, ak kimach koamis: ak ye kigichobei amitwogik, kobutyi kiy ne u ruon; ¹¹ ak kigeer kipsengwet koyatak, ak kochurugei kit ne u anget ne o kot, kechooru eng' kuinoik ang'wan agoi ng'weny. ¹² Kimi orit tiong'ik alak tugul che bo kelyek ang'wan ak tuguk che ichuutegei che bo ng'weny ak taritik che bo barak. ¹³ Kinyonji anyun kutit, ak koleji, Ng'eet, Petero; eny ak iam. ¹⁴ Ago kile Petero, Ma u noto, Kiptaiyandani; amu tom aam kiy ne ma tilil anan ne ng'wan kong'ete atkinye kora. ¹⁵ Kinyonji anyun kutit kogeny ne bo aeng' koleji, Kit ne kagotilil Jehovah, ko mata ile ng'wan. ¹⁶ Ak kiyaak kiito konyil somok: ak ngunoto ketaach kioto eng' kipsengwet. ¹⁷ Ak ye kita koiimegei Petero mising' eng' muguleldanyi kole, iboru nee ng'ang'utioni kagogeer, geer anyun, kotononso eng' kurgat bik che kiga koyok Kornelio, ko kagoteeb ole mi gotab Simon. ¹⁸ Ak koguurso ak koteeb ngo mi Simon oloto, ne kainennyi ne bo aeng' ko Petero. ¹⁹ Ak ye kita kobwati Petero agobo ng'ang'utionoto, koleji Tamirmiriet inendet, Keer anyun, cheng'in bik somogu. ²⁰ Ago ng'eet, ak ichortege, ak obe tugul, amesage kiy: amu kaayogu ichek. ²¹ Ak kichortagei anyun Petero kwo ole mi bichoto, ak kole, Ogeer anyun, ai anendet ne ocheng'e: nee ne kagonok obwa? ²² Ak kile anyun ichek, Kornelio ne kiptaiyatab bogol, chito ne bo imanda ak koiywei Jehovah ak kobaorianjin bororiet tugul ne bo Yahudik, ko kiiborji Jehovah komie eng' malaikaiyat ne tilil koyok bik kobwa kole si kogasenen ng'alek. ²³ Kogur anyun kopka go ak kochopchi ichek ole ruitos. Ak king'eet karon koba koboto bichoto ak tupchosiek alak che kibunu Jopa. ²⁴ Ak betut ne kiisubi betunoto koit Kaisaria. Ak kiigeni ichek Kornelio, ko kagoguur tupchosiek ak choronokyi che kiingengei komie. ²⁵ Ak ye kingwo go Petero, kotoroch Kornelio inendet, ak kobutyi kelyekyi, kogutung'ji. ²⁶ Ago kiing'eet Petero inendet, koleji, Tonon, anendet ko a chito agane. ²⁷ Ak kingota kong'alaljindos tuwai, kwo go ak konyor bik che chang' che kagoyumgei. ²⁸ Koleji anyun ichek, Ongen akwe ole kiy ne etan eng' ngatutik eng' chi ne Yahudio konamgei ak chi ne bo boror age anan konyo ole mi; ago kagoborua ane Jehovah kole, si mata aguure chi age ne ma tilil anan ne ng'wan. ²⁹ Noto anyun kaanyo amata asich kiy ne amwae, ye kingo kageguura. Noto anyun ateebe ale nee ne koguurja. ³⁰ Kole anyun Kornelio, Betusiek ang'wan rani kong'ete yoto agoi saini, ye kiasae eng' sait sogol eng' gonnyu; ak keer anyun, kitonon eng' tainnyu mureno ne ilaachi ngoroik che lilei bich. ³¹ Ak kole, Kornelio, kigegas saeng'ung', ak kogoek kabwatet eng' taitab Jehovah kagochinoiguk. ³² Iyokte anyun bik koba Jopa, koguurun Simon ne kainet ne bo aeng' ko Petero; mitei inendet ko toondet eng' gotab Simon teiteindetab muiywek. ³³ ye legite tabandab nyanjet. Kiayogu anyun bik eng' sainato kopka ole imi; ak kaiyai ne mie amu kainyo. Kimi anyun yu nguno achek tugul eng' taitab Jehovah, si kegas tuguk tugul che king'atin Kiptaiyat. ³⁴ Ak king'any anyun Petero kutinnyi, kole, Iman ageere ale machamei Jehovah bik alak kosiir alak: ³⁵ Ago taachaksei eng' inendet chito ne iywei inendet, ak koyaei iman eng' bororiet age tugul. ³⁶ Ng'olyot ne kiiyokyi inendet lagokab Israel, ko koamda ng'alek che miach che bo kalyet eng' Jeiso Kristo (inendet ko Kiptaiyat ne bo tugul) ³⁷ ongen akwe ng'olyondonoto, ne kigiamda eng' Judea komugul, ketaune Galili, kingobata kabatisanet ne kiamdoi Johana; ³⁸ ko ye kiil Jehovah Jesu ne bo Nasaret, eng' Tamirmiriet ne Tilil ak eng' kamuktaet: ne kiwendot ak koyaei ne mie, ak kosoobi tugul che kiinyalili oindet; amu kimi Jehovah koboto inendet. ³⁹ Ak ki baorinik achek che bo tuguk tugul che kiyai eng' emetab Yahudik, ak eng' Jerusalem; ne kibar ichek inendet kogartat eng' ketit. ⁴⁰ Kiing'et Jehovah inendet eng' betutab somok, ak kogoito kotook, ⁴¹ ma eng' bik tugul, ago eng' baorinik che kiga sib kolewen Jehovah, acheget choto che kigiamisiei ak keeisiei koboto inendet ko kagong'eet komong' eng' che kibek. ⁴² Ak king'atech keamji bik, ak kebaorian kele nito ko inendet ne kiinde Jehovah koek Kiruogindet ne bo che soptos ak che kigobek. ⁴³ Baoriani maotik tugul agobo inendet, kole, nyoru nyoetab kaat amu tengekwogikyi eng' kainennyi age tugul ne iyani inendet. ⁴⁴ Ye kita komwaei Petero ng'alechu, kochorjigei Tamirmiriet ne Tilil tugul che kigase ng'olyot. ⁴⁵ Ak kikwong'io ichek che bo kamuratanet che kiiyani, tugul che kipkoni koboto Petero, amu kagerong'ji Bororiosiek agichek konunetab Tamirmiret ne Tilil. ⁴⁶ Amu kigase ichek kong'alali eng' kutuswek che terotin, ak kotorori Jehovah. Kowol anyun Petero kole, ⁴⁷ Imuchi chi koete beek si ma kibatisan bichu, che kagotaach Tamirmiriet ne Tilil ko u achek? ⁴⁸ Ak king'at kole kibatisan ichek eng' kainetab Jeiso Kristo. Kosom anyun ichek inendet kole kota kobeni betusiek alak.