¹ Ak kigas anyun che kiyoktoi ak tupchosiek che kimi Judea kole kogotaach agichek Bororiosiek ng'olyotab Jehovah. ² Ak kingo kagonyo Petero Jerusalem, kobelgei ak inendet ichek che bo kamuratanet, ³ kolen, Kiiwe oldab bik che ma kimuratan ak iamisie koboto ichek, ⁴ Ago kitoi Petero kotetyi ichek komie ng'alechato, koleji, ⁵ Kiami nganasetab Jopa asae: ak kingobutya kiy ne u ruon ageer ng'ang'utiet, ne bo kiy ne kichorugei, ne u anget ne o kot, ne kigichor kobunu kipsengwet eng' kuinoik ang'wan; ak kinyo agoi ole ami. ⁶ Ak ye kingageer mising' abwat, ageer tiong'ikab ng'weny che bo kelyek ang'wan ak tiong'ik che bo timin ak tuguk che ichuutegei ak taritik che bo barak. ⁷ Ak kiagas kutit kolenja, Ng'eet, Petero; eny ak iam. ⁸ Ak kiamwa ale, Ma u noto, Kiptaiyandani: amu tom kochut kutinnyu kiy ne ma tilil anan ne ng'wan. ⁹ Ago kiwol kutinato ne bo aeng' kobunu kipsengwet kole, Amata ing'wanit kit ne kagotilil Jehovah. ¹⁰ Ak kiyaak kioto konyil somok, ak kigichuut kogeny tugul koba kipsengwet. ¹¹ Ak ogeer anyun, kitonondos eng' sainato bik somogu eng' taitab got ole kigimi, che kigiyok eng' Kaisaria kopka ole ami. ¹² Kong'ata anyun Tamirmiriet, kole, kebe tugul, amat isage. Ak kigibe tugul ak tupchosiechu lo agichek; kebe agoi gotab chichoto. ¹³ Ak kimwawech ko u ye kiga keer malaikaiyat kotononi eng' gonnyi, kole, Iyokte bik koba Jopa koguur Simon, ne kiguure kainennyi ne bo aeng' Petero. ¹⁴ konyo komwaun ng'alek, che kisorunenen, inye ak gong'ung' tugul. ¹⁵ Ak ye kingatau ang'alal, kochorjigei Tamirmiriet ne Tilil ichek, ko u ye kichorjech ge agachek eng' taunet. ¹⁶ Abwat anyun ng'olyotab Kiptaiyat, ko u ye kimwa, kole, Kiibatisanis Johana eng' beek; ago kibatisanok akwe eng' Tamirmiriet ne Tilil. ¹⁷ Ngo kiigochi anyun Jehovah ichek konunet ne kergei ak ne kigonech ye kingiyan Kiptaiyat Jeiso Kristo, ko tos, kia ng'o anyun, kot amuch agirinda Jehovah? ¹⁸ Ak kingogas ng'alechuto, kosisyo, kolos Jehovah, ak komwa kole, Kaga kagogochi Jehovah Bororiosiek agichek sigunet ne ibu sobondo. ¹⁹ Kiba anyun ichek che kiga yesta amu usisiet ne king'eet agobo Stepano agoi koit Poinike, ak Kupro, ak Antiokia, ko mang'alaljin chi age ng'olyot kobate Yahudik. ²⁰ Ago kimi alak eng' ichek bikab Kupro ak Kurene, che kingobwa Antiokia kong'alalji Yunanik agichek, koamdoi Kiptaiyat Jeiso. ²¹ Ak kimi eutab Kiptaiyat koboto ichek: ak kiiyan bik che chang' konam ng'alekab Kiptaiyat. ²² Ak kigas ng'alek agobo ichek kaniset ne kimi Jerusalem: ak kiiyokto Barnaba kwo kot koit Antiokia. ²³ Ak kingoit inendet, ak kogeer mieindab Jehovah, kobaibait; ak kogiil ichek tugul konamgei ak Kiptaiyat eng' mugulelwek che bekyinotin. ²⁴ Amu ki chi ne mie, ak ko nyiitat Tamirmiriet ne Tilil ak kayanet: ak kitesak bik che chang' kobunji Kiptaiyat. ²⁵ Ak kiwa Barnaba agoi Tarso kocheng' Saul. ²⁶ Ak kingo kagonyor, komut konyo Antiokia. Ak kiiyumgei eng' kenyit agenge koboto kaniset, ak konet bik che chang'; ak kigitoi keguure alamalyet Kristianik eng' Antiokia. ²⁷ Ak eng' betusiechoto kochorgei maotik eng' Jerusalem kopka Antiokia. ²⁸ Ak kitonon age eng' ichek ne kigiguure Agabo, ak kobor eng' Tamirmiriet kole tun biitu rubet ne o eng' ng'weny komugul: ne kiisulda eng' betusiekab Klaudio. ²⁹ Ak kichopgei komie alamalyet koyokchi toretet tupchosiek che kimenyei Judea, chi tugul ko u ye kiimuchi. ³⁰ Kiyai anyun ko u noto, kiiyokyi boisiek eng' eunekab Barnaba ak Saul.