¹ Ak kingo kagetil ng'alek kele kebun melit kebe Italia, Kigigochi Julia kiptaiyatab bogol, ne bo lugetab Augusto, Paulo ak kimonjororinik alak. ² Kelany anyun melit ne bo Adramutio, ne kimache kwo komoswek alak che mi ngengutab Asia, ak kebe nyanjet ak Aristarko Makedonianindet ne bo Tesalonike. ³ Ak eng' betut ne bo aeng' keit Sidon: ak kirire Julio Paulo, ak kochamji kwo ole mi choronokyi si konyor toretet. ⁴ Ak kigibun melit eng' oloto ak kigitektaege Kupro, amu kigirindaech usonet. ⁵ Ak ye kiga kebun melit kelande eng' nyanjet ne bo Kilikia ak Pampulia, keit Mura, nganaset ne bo Lukia. ⁶ Ak kinyorji oloto kiptaiyatab bogol melit ne bo Aleksandria, ne wendi Italia; kondeech melit anyun. ⁷ Ak ye kiga kebe mutyo eng' melit eng' betusiek che chang', agoi keit Kanido eng' bichiindo, koranyech usonet, kebe ketektaege Krete, ne itorjingei Salmone. ⁸ Ak kigibun tabanda eng' bichiindo agoi keit komosta age ne kiguure Luukwek che Miach; ole legite nganasetab Lasea. ⁹ Ak kingo kagosirto betusiek che chang', ak kobichiit bandab nyanjet, amu kiga kosiirto betusiekab Karugutetab ge, koteechi Paulo ichek, ¹⁰ koleji, Mureju, kaageer ale mitei ng'olyondit ak luset eng' banito bo nyanjet, ma ne bo melit kityo ak tuguk che mi orit, ago ne bo sobonwekyo agichek. ¹¹ Ago kigas kiptaiyatab bogol ng'alekab bounindet ak chitab kobo melit, kosiir ng'alek che kamwaei Paulo. ¹² Amu kima ko luita ne kararan ketebe eng' betusiekab kaititiet, komwa che chang' kole, Mie kota kinaakte eng' olito, tamangab keit Poinike, si ketebe oloto eng' betusiekab kaititiet; noto ko ki luitab Krete, ne kitokyigei murot ne bo katam kitigin ak murot ne bo tai kitigin. ¹³ Ak kingous mutyo usonet ne bunu komostab tai, kolen ichek kagonyor kit ne kamachei, konem nanget ak kobun tabandab Krete, ye legite nyanjet kut. ¹⁴ Ak ne matenit kous chebwibwichet, ne kiguure Eurakulo. ¹⁵ Ak ye kingenam melit, ak mata komuch kotab usonet, keistochige, ak koonech. ¹⁶ Ak kingeruai ketektaatege emet ne kiikwen beek ne kiguure Kauda, kimuch eng' bichiindo keganab moinget ne mining'. ¹⁷ Ak kingo kagotogosune moingonoto, koboisie tuguk che kitorete, koratune melit orit; ak kingoiywei ichek kole si magiwirji Surti, kochoor angok, ak kion usonet koba. ¹⁸ Ak ye kita koboisiei mising' eng' kagiiletab ge, ketabe usonoto o, ketau eng' betut ne bo aeng' kewirte tuguk che mi melit. ¹⁹ Ak eng' betutab somok kowirta icheget eng' eunekwai tuguk che kiboisie eng' melit. ²⁰ Ak ye kimata koluuchech asista anan kecheik eng' etusiek che chang', ak kogiichech usonet ne o, kogesgei anyun kamang'unet ne kigilen, tos kisoruech. ²¹ Ak ye kiga kotar betusiek che chang' ama amis, kotonon Paulo eng' kwenung'wai, ak kole, Mureju, kita mie nda kigogasa, ak kita mie nda kima obwa eng' Krete, ak onyoru nyalili ak lusoni. ²² Amwawok nguno ale onyiganitu amu mami chi ne meei eng' akwe, kobate melit. ²³ Amu kotonon malaikaiyatab Jehovah eng' ye legitena kemouni, ne ai nenyi, ak ne aote, ²⁴ Kole, Ameiyweisie, Paulo; kanyol itonon eng' taitab Kaisari: ak keero, kagogonin Jehovah tugul che obendi tugul eng' melit. ²⁵ Ara anyun, mureju, onyiganitu amu ayani Jehovah, ale yaaksei ko u ye kogomwawa. ²⁶ Ago kanyol kewirjech emet ne kiikwen beek. ²⁷ Ak ye kingoit kemoutab taman ak ang'wan, ye kita kowirjech usonet komosi ak komosi eng' nyanjet ne kiguure Adria, ko kiibwati bikab melit olo bo kemoi kwen kolen kagorikta emet age. ²⁸ Ak kiirooch beek kit ne kikwaise, ak konyor kakwautik artam: ak kita koba kitigin korooch beek kogeny kioto, konyor kakwautik sosom. ²⁹ Ak kingoiywei ichek kole abere togot kewirjech bitet ne mi ruandosiek, kounda nangasiek ang'wan eng' melit olo bo let kosom kole nda kaech. ³⁰ Ak ye kimachei bikab melit komwei kobagakta melit, ko kagochoorta moinget kwo nyanjet, kolen si kobwat bik kole wirtoi ichek nangasiek eng' olo bo melit tai. ³¹ Koleji Paulo kiptaiyatab bogol ak askarik, Ngot ko matebi bichu eng' melit, ko momuchi osopche. ³² Kotil anyun askarik rogoosiek che bo moinget, ak kobagakta kobut. ³³ Ak ye kimachei koech, kogaigai Paulo ichek tugul koamis, kolejini, Rani ko betutab taman ak ang'wan ogeni ak ko ta orugutige, ak tom oam kiy. ³⁴ Noto anyun asomok ale oamisie: amu nito sobeng'wong'; amu mabetei sumeiyot agot agenge eng' metitab chi age tugul eng' akwek. ³⁵ Ak ye kingo kagomwa ko u noto, ak konam makatiat, kogochi Jehovah kongoi eng' taitab tugul: ak kiton, ak kotoi koamis. ³⁶ Konyiganitu anyun ichek tugul, ak koamis. ³⁷ Ak achek tugul ko kigiite bik bogol aeng' ak tamanwogik tisab ak lo eng' melit. ³⁸ Ak kingo kagobiyong'so, kowirji nyanjet nganok si kowisisit melit. ³⁹ Ak kingo kagoeech, ko ma konai emonoto: kigeer luita age ne tinyei ng'aniek, ne kiibwati kole, ngomugak kokweri melit kwo oloto. ⁴⁰ Kotiach anyun nangaisiek, ak kobagakta eng nyanjet, ak kotiach rogoosiek che kigirate baonik che kindochine melit; ak ye kingo kagonamji barak anget ne mi olin bo tai kotokyi usonet, koba tabandab nyanjet. ⁴¹ Ago kingoit ye tuiyechin nyanjosiek aeng'u, kochunda ichek melit korieb ng'abiek; ak kinamak melit ole bo tai kot ko ma kotwau, ago kitoi melit kong'asur eng' ole bo let eng' kimnatetab mildaetab ge ne bo beek. ⁴² Ak ng'olyot ne kitinye askarik ko kobar kimonjoronik, kole si mabir beek alage eng' ichek, kochililyo. ⁴³ Ago amu kimache kiptaiyatab bogol kosor Paulo, koeete ichek si mayai kit ne kamachei; ak kong'at ichek che kiimuchi kobirot beek kole, kowirjigei nyanjet, si kosib koit tabandab nyanjet. ⁴⁴ Ak kibun alage baonik, kobun alage tuguk alak che bo melit. Kolong'ji anyun tugul emet kochamegei.