¹ Koleji anyun Agripa Paulo, Kagichamun iwolu ng'aleguk. Kochuul anyun Paulo eunnyi, ak komwa ng'alek che sorunegei, kole. ² Abwati ale abaibai, ee laitoriat Agripa, amu amuchi asorge rani eng' taing'ung' agobo tuguk tugul che koitaamja Yahudik, ³ ne siirei ko amu ingen komie bitonwek tugul ak teebutik tugul che tinyei Yahudik: noto anyun, kasomin ale igasa eng' muitaet. ⁴ Ingen Yahudik tugul ateptab sobennyu, kong'ete ko a mining', ne kiatinye kong'ete ko kabiitu eng' bororiennyu, ak eng' Jerusalem. ⁵ Ak kongena ichek kong'ete eng' tai, nda chamei ichek kobaorian, ko u ye kia Parisaindet ne isubi biteet ne koroom ne bo kayanennyo. ⁶ Ak katonon nguno eng' yu si kiruokwa agobo kamang'unet ne bo arorutiet ne kichopchi Jehovah kwanisiekyo. ⁷ Noto ne imang'u ortinwekyo tamanu ak aeng' kole nyoru, koboisiechin Jehovah eng' kagiiletab ge bet ak kemoi. Kagogikya Yahudik agobo kamang'unonito, ee, laitoriandani!. ⁸ Amu nee si kibwat kele maiyanaksei eng' akwek kele, ing'eeti Jehovah che kigobek? ⁹ Kiabwati anendet iman ale kanyol ayai tuguk che chang' che kirindoi kainetab Jeiso ne bo Nasaret. ¹⁰ Ak kiayai nito agine eng' Jerusalem: ak atoorji korgorosiek bik che chang' eng' che tililen, ko kagogono kimnatet tisiik che eechen, ak kiachame ye kigibarei ichek. ¹¹ Ak kiabirote konyil che chang' eng' sunagogisiek tugul, abirjini kochubis ak ye kiga konyita ichek mising', ausote agoi nganasok che bo toek. ¹² Ak ye kingawendi Damasko atinye kimnatet ak kayokyoet ne bo tisiik che eechen, ¹³ ageer lapkeiyet ne kibunu kipsengwet, ne siirei kaluunetab asista, kolilja komoswek tugul koboto che kigibendi tugul, eng' oret bet kwen, ee, laitoriandani. ¹⁴ Ak kingo kagibutyi ng'weny tugul, agas kutit ne lejina eng' kutitab Hebranik, Saul, amu nee si iusa? bichii eng' inye itiar kiplitwet. ¹⁵ Ak kiale, I ng'o inye, Kiptaiyandani? Kole Kiptaiyat, Ai Jeiso ne iuse. ¹⁶ Ago ng'eet, tonon eng' kelyeguk: kang'ang'unge amu ni, ale andein iegu kiboitiot ak baoriatab tuguchu kaigeer agobo ane ak tuguk che tun ang'ang'unenenge; ¹⁷ asorun eng' bik ak eng' Bororiosiek, ole tun ayoktin iwe, ¹⁸ si kobiit ing'any konyekwai, ak koweek eng' mesundeito kobwanji lapkeiyet, ak eng' kimnatetab Setani kobwanji Jehovah, si konyor ichek nyoetab kaat ne bo tengekwogik ak borotet ne mi eng' ane. ¹⁹ Noto anyun, ee, laitoriandani Agripa, ma abistoe kaborunet ne bo kipsengwet; ²⁰ ago kiaborji che mi Damasko korok, ak eng' Jerusalem, ak eng' emet komugul ne bo Judea, ak eng' Bororiosiek agichek, si kosik ak koyan Jehovah, koyaei boisionik che nyoljin sigunet. ²¹ Kinama anyun Yahudik eng' hekalut amu nito, ak kotiem kobara. ²² Ye kinganyoru toretet ne bunu Jehovah, atonon agoi rani abaorianjini che mengech ak che eechen, amamwae kiy age kobate che kimwa maotik ak Musa,kole tun bwanei; ²³ kole kanyol konyalil Kristo, ak kole komwaita korok eng' ng'eetyetab che kibek, lapkeiyet, komwachi bik ak Bororiosiek. ²⁴ Ak ye kita kosorugei ko u noto, komwa Festo eng' kutit ne o, kole, Paulo, i kibiywa; kagogonin iywek kanetetab ge ne o. ²⁵ Ago kile Paulo, Ma ai kibiywa, ee Festo ne i toogunot: ago amwae ng'alek che bo iman ak che bo ng'omnatet. ²⁶ Amu ingen laitoriat ng'alechuto, inendet ne ang'alaljini eng' nyiganatet: amu angen komie ale ma ung'otin ng'alechu eng' inendet agot agenge amu mayaak ng'olyondonito eng' taban. ²⁷ Laitoriat Agripa, tos iyani inye maotik? Angen ale iyani. ²⁸ Ak kileji Agripa Paulo, ka legit igaigaa eng' ng'alek che ng'ering aek Kristianindet. ²⁹ Kole Paulo, Achame ko u noto eng' Jehovah, ale ngo eng' che ng'ering anan eng' che chang', ma inye kityo, ago tugul agichek che kasa rani, ale kotebi ko u ane, ago ama eng' ratutichu. ³⁰ Kong'eet anyun laitoriat, ak bounindet ak Bemike, koboto ichek che kimi tugul; ³¹ ak kingo kagoba, kong'alaljigei ichegei, kole, Ma yai chichi kiy ne nyoljin meet anan ratisiosiek. ³² Koleji anyun Agripa Festo, kota kitiachi chichi, nda kima rirji Kaisari.