¹ Ak ye kingoit Festo koronoto, kotogosta Jerusalem kobunei Kaisaria, ko kagobata betusiek somogu. ² Ak kimwachi tisiik che eechen ak bik che toogunotin che bo Yahudik ng'alek che kiting'e Paulo; ak kosaisai ichek inendet, ³ kosom chamdaet agobo inendet, kole koyokto inendet kimut konyo Jerusalem; si kobiit korat oret kobar inendet. ⁴ Ago kiwol Festo kole kerib Paulo eng' Kaisaria, ak kole, Legit si awa anendet oloto. ⁵ Ak kole inendet, Ongechortege ak che eechen eng' akwek, ngo mi ng'olyo age tugul ne ya eng' chichito, komwa ichek. ⁶ Ak kingo kagotebi eng' kwenung'wai koboto ichek eng' betusiek che masiirei sisiit anan ko taman, kochortagei Kaisaria; ak mutai kotebe ng'echeretab kiruoget, ak kong'at kole, kimut Paulo. ⁷ Ak kingo kagoit, komuut inendet Yahudik che kabunu Jerusalem, koibu ng'alek che chang' che koromen che kiitaame inendet, che kima imuch kobor komie kit ne inet. ⁸ Ago kimwa Paulo eng' ng'alek che kisorunegei, kole, Tom ayai tengek agot kitigin agobo Ng'atutietab Yahudik, anan agobo hekalut, anan agobo Kaisari. ⁹ Ago ye kimachei Festo kobaibai Yahudik, kowolji Paulo, koleji, Tos imache itogoste Jerusalem, si kiruogun eng' oloto agobo tuguchu eng' tainnyu? ¹⁰ Ago kile Paulo, Atononi eng' taitab ng'echeretab kiruoget ne bo Kaisari, ole kanyol kiruogena: tom ayachi kiy ne ya Yahudik, ko u ye ingen inye aginye komie. ¹¹ Ngo ai kiptengekyo, ak ngot ko koayai kiy ne nyoljin meet, ko maesioi ame: ago ngot ko ma bo iman tuguchuto, che itaamjina bichu, ko mami chi ne imuchi kondea eunekwai. Arirjini Kaisari. ¹² Ak kingo kagong'alal anyun Festo ak bikab kapkiruok, kowol kole, Kairirji Kaisari: ara anyun, iwendi gab Kaisari. ¹³ Ak kingo kagosiirto betusiek alage, koit laitoriat Agripa ak Bernike Kaisaria, si kogat Festo. ¹⁴ Ak ye kita kobeni betusiek che chang', koborji Festo laitoriat ng'alekab Paulo koleji, Mitei chi age ne kibagakta Peliki ko ratat. ¹⁵ Ne kimwawa ng'alekyi tisiik che eechen ak boisiekab Yahudik ye kiami Jerusalem, kisomei ng'alek che kigikyine inendet. ¹⁶ Ak kiawolji ichek aleji, ma biteetab Romanik kogoito chi kotomo kogeergei kimni chito ne kitaami ak che itaamsei, ak konyor boroindo ne sorunegei eng' ng'alek che kigitaamjine. ¹⁷ Ye kingoyumgei anyun eng' yu, ko mata agaege, ago eng' betut ne bo aeng' atebe ng'echeretab kiruoget, ak ang'at kimut chichoto. ¹⁸ Ak kingotononso icheget che kitaami inendet, ko ma koib ng'olyo ne ya ne bo kagikyino agobo inendet ko ye kiabwati. ¹⁹ Ago kiting'e inendet teebutik agobo kayaneng'wai, ak agobo chi ne kilen Jeiso, ne kigome, ne igiiljingei Paulo kole, sobei. ²⁰ Ago kialen agin ole teptoi ng'alechu kotemena, ateebe ngo machei kwo Jerusalem, si kiruokyi eng' olindo agobo ng'alechuto. ²¹ Ago kingorirji Paulo kotebi kole si kotil kiruoget bounindet ne o, ang'at ale kerib agoi tun ayokte kwo gab Kaisari. ²² Ak kileji Agripa Festo, Amache agas agane ng'alekab chichito. Koleji, Igase mutai. ²³ Ak mutai ko kagoit Agripa, koboto Bernike, eng' etunatet ne o, ak ko kagoba got ne kigase ng'alek, koboto kiptainik che eechen, ak bik che toogunotin che bo nganaset, kimut Paulo eng' ng'atutietab Festo. ²⁴ Komwa Festo anyun, kole, Laitoriat Agripa, ak bik tugul che kimi yu tugul, ogeere chichi, kigorirja tuiyet tugul ne bo Yahudik agobo inendet, eng' Jerusalem ak eng' olito, koboldos, kolen, manyol kota kosob. ²⁵ Ago kiageer ale ma yai kiy ne nyoljin meet: ak ko u ye kirirji inendet bounindet ne o, acham anyun ayokto inendet. ²⁶ Matinye ng'olyo ne bo iman ne asirjini kiptaiyandennyu agobo inendet. Noto anyun kamutu inendet konyo taing'wong', ak ne siirei, ko konyo taing'ung', inye, laitoriat Agripa, si ye kageteepse, asich ng'olyot ne asire. ²⁷ Amu ageere ale, ma nyolu kiyokto kimonjororio, ama kibor tuguk che kigitaamjin.