¹ Ak kingobata betusiek mutu, kochorgei Anania tisiindet ne o ak boisiek alak, ak ng'alalindet age, ne kiguure Tertulo; ak koborji bounindet ng'alek che kogitaame Paulo. ² Ak kingo kageguur, kotoi Tertulo kotaam inendet kole, Amu kiboiboitune kalyet ne o eng' inye, ak kiistoi yaitwogik eng' bororioni amu ng'omnateng'ung', ³ kitaache anyun eng' ortinwek tugul ak eng' komoswek tugul, koboto kongoi tugul, ee inye ne i toogunot, Peliki. ⁴ Ago si mata again mising', asomin ale igasech eng' ng'alek che ng'ering' eng' mieindangung'. ⁵ Amu kigegeer chichi kele inendet ko chine itoitos bich, ne ing'eeti chemereret eng' Yahudik tugul eng' ng'weny tugul, ak kandoindet ne bo kasubikab Nasaretik. ⁶ Ak kogeny ko kigotiem kong'wanit hekalut: ak kiginam inendet; ak kigimache kiruokyi inendet ko u ng'atutikyo. ⁷ Ago kinyo ole kimi Lusia kiptaiyat ne o ne bo askarik, ak korebenech inendet eng' eunekyo eng' kimnatet ne o. ⁸ Imuchi inai tuguchu tugul eng' inendet ye igine inyendet agobo tuguchoto kogitaame. ⁹ Ak kiiyomechegei Yahudik kataamsonoto, kogimit kole, u noto ng'alechuto. ¹⁰ Ak kingo kagoborjine bounindet Paulo eut, kole kong'alal, kowol Paulo kole, Angen ale, i kiruogindet ne bo bororioni eng' kenyisiek che chang', amu noto asoruge eng' boiboindo: ¹¹ Amu imuchi inai ile, tom kosiir betusiek taman ak aeng' kong'ete ngab atogoste Jerusalem awe asa: ¹² Ama nyorua ichek eng', hekalut kibelige ak chi age tugul, anan awase tuiyet, anan eng' sunagogisiek, anan eng' nganaset. ¹³ Amaimuchi ichek koborun komie tuguk che itaamena. ¹⁴ Ago kang'ang'un nito, eng' Oranoto kuure ichek biteet age, aote Jehovah ne bo kwanisiekyo ak ayani tuguk ko u ye mwaei Ng'atutiet, ak che kigisir eng' maotik. ¹⁵ Atinye kamang'unet eng' Jehovah, ne cheng'ei bichu agichek, ale, tatun komi ng'eetyetab che bo imanda ak che ma bo imanda. ¹⁶ Ak achobege anyun agane eng' ngolyondoni atebe kotugul kabwatet ne matinyei kanagut eng' taitab Jehovah ak bik. ¹⁷ Ak kingobata kenyisiek che chang' anyo aipchi bikab bororiennyu kagochinoik ak tuguk che kigoitoi. ¹⁸ Ak kinyorua kitilila eng' hekalut, ama mi tuiyet anan bolatet: ago kimi Yahudik alak che kibunu Asia. ¹⁹ Mie nda kami yu ichek eng' taing'ung' si komwaitaa ngo ting'ena ichek ng'olyo. ²⁰ Anan ingomwa bichu icheget boisiet ne ya ne kinyor, ye kingatonon eng' taitab kapkiruoget, ²¹ Kobate twegunet agenge ne kiarirji atononi eng' kwenung'wai, ale, Kagiruokwa rani eng' taing'wong' agobo ng'etyeetab che kigobek. ²² Amu kiingen Peliki komie agobo Oranoto, koleji, Ogen, ye tun kochortagei kiptaiyat ne o Lusia, atil anyun ng'alekwok. ²³ Ak kong'at kiptaiyatab bogol kole kerib inendet, ak kigochin boroindo; amat koete age tugul eng' choronokyi koboisiechi inendet. ²⁴ Ago kingobata betusiek alage, koit Peliki, koboto Drusila osotiondennyi, ne ki Chebyahudio, ak koyokto Paulo konyo, ak kigas eng' inendet agobo kayanet eng' Kristo Jeiso. ²⁵ Ak ye kita kong'alali agobo imanda, ak ribetab ge, ak kiruoget ne nyonei, koiyweis Peliki, ak kowol kole, Ui korok; ak ye tun anyoru boroindo ne mie, aguurin. ²⁶ Kiimang'u kole, togot kogochi Paulo siling'isiek: kiguur anyun inendet konyil che chang', ak kong'alal koboto inendet. ²⁷ Ago kingogesgei kenyisiek aeng'u, konam Porkio Pesto boisietab Peliki; ak amu kimachei Peliki kobaibai Yahudik, kobagakta Paulo ko ratat.