¹ Ak kingogeer Paulo kapkiruogonoto komie, komwa kole, Che kitupche, kiatebe kotugul kabwatet ne mie eng' taitab Jehovah agoi rani. ² Kong'at Anania, tisiindet ne o, ichek che kitonondos eng' yoto kole, korabach kutinnyi. ³ Koleji anyun Paulo inendet, Tun birin Jehovah, inye inatut ne kigisal koleelit: itebye ak iruokwa ko u ye mwaei Ng'atutiet, ak ing'ate kebira ama chamdoi Ng'atutiet? ⁴ Komwa ichek che kitonondos eng' yoto kole, Ichube tisiindet ne o ne bo Jehovah? ⁵ Kole anyun Paulo, Kama anai, che kitupche, ale inendet ko tisiindet ne o: amu kigisir kele, Amemwa ne ya agobo bounindetab biguk. ⁶ Ago ye kingonai Paulo kole, Sadukaik alage, ko Parisaik alage, komwa eng' kutit ne o eng' kapkiruok kole, Che kitupche, ai Parisaindet, weritab Parisaik: kagiruokwa agobo kamang'unet ak ng'eetyet ne bo che kigobek. ⁷ Ak kingo kagomwa ko u noto, kong'eet anyun toiyet eng' Parisaik ak Sadukaik: ak kipcheak tuiyet. ⁸ Amu mwaei Sadukaik kole, mami ng'eetyet eng' che kibek, anan malaika, anan tamirmiriet: ago iyani tugul Parisaik. ⁹ Kong'eet anyun bolatet ne o: ak kitononso sirik alak che bo Parisaik, ak koborio kolen, Ma kinyoru yaitio eng' chichi: ak tos nee eng' akwek ngot ko kang'alal ak inendet tamirmiriet, anan malaika? ¹⁰ Ak ye kingong'eet toiyet ne o, koiywei kiptaiyat ne o kole, abere togot kotonaton bichu Paulo, kong'at anyun askarik kochortagei ak komut inendet eng' kimnatet eng' kwenung'wai, ak komut konyo irimet. ¹¹ Ak kemout ne kiisubi noto kotonon Kiptaiyat eng' ye legite inendet ak koleji, Nyiganitu Paulo: amu ko u ye kiibaoriania eng' Jerusalem, ko u noto kanyol ibaorian eng' Rom agine. ¹² Ak kingoech koyumgei Yahudik, ak korategei kayosiet, kole magiame kiy ama kiee agoi kebar Paulo. ¹³ Ak kiisirei artam icheget che kiiyosio. ¹⁴ Ak kibwa ole mi tisiik che eechen ak boisiek, ak koleji, Kageratge eng' kayosiet ne o kele, magichamjami kiy agoi kebar Paulo. ¹⁵ Obotji anyun akwek ak boisiek kiptaiyat ne o komut inendet kochorgei konyo ole omi, ko u ne omache ogin komie ng'alekyik: ak ki chobotin achek kebar inendet agot kotom korikyech. ¹⁶ Ago kigas weritab chepkametab Paulo agobo setyineng'wai, ak kinyo kwo irimet ak komwachi Paulo. ¹⁷ Koguur anyun Paulo age eng' kiptainikab bogolwogik, ak koleji, Imut murenoni kwo ole mi kiptaiyat ne o: amu tinyei ng'olyo ne machei komwachi inendet. ¹⁸ Komut anyun inendet kwo ole mi kiptaiyat ne o, ak koleji, kaguura Paulo, kimonjororiot, awa ole mi inendet, ak komwawa amutun murenoni konyo ole imi, tinyei ng'olyo ne machei komwaun. ¹⁹ Konam anyun kiptaiyat ne o eutab weroto, ak komut taban, ak koteebe eng' ung'ot kole, Nee noto imache imwawa? ²⁰ Kole, kagochamnyechi Yahudik kole, kosomin imutu Paulo kochorgei mutai konyo kapkiruok, ko u ne imache iteepse inendet komie. ²¹ Ameyanji anyun: amu mitei eng' ichek che siirei artam che setyin inendet, che kagoratgei eng murtoet, kole maamei kiy anan koee agoi kobar inendet: ak chobotin ichek nguno kogeni ng'atutiet ne bunun. ²² Kounda anyun kiptaiyat ne o murenonoto kwo, ak kong'at inendet koleji, Amemwachi chi agot agenge ileji, Kaimwa tuguchu. ²³ Ak kiguur kiptainik aeng' che bo bogolwogik koba ole mi inendet, ak koleji, Ochob askarik bogol aeng' koba agoi Kaisaria, ak askarik tamanwogik tisab che lanyei mbartanyisiek, ak murenikab ng'orwek bogol aeng', eng' sait somok ne bo kemoi: ²⁴ ak kimwachi kochob mbartanyisiek, si kobiit komute ichek Paulo, ak komut kot koit ole mi Peliki bounindet kochamegei. ²⁵ Ak kisir baruet ko u ni: ²⁶ Ane Klaudio Lusia, agatin inye bounindet Peliki, ne i toogunot. ²⁷ Kanam Yahudik chichi, ak ki legit kobar ichek inendet, awe anyun ak askarik ole mi ichek, ak asoru inendet, ko kaanai ale kaga Romanin inendet. ²⁸ Ak ye kiamache anai kit ne kiitaame ichek inendet, amutu anyun kochorgei kapkiruogeng'wai. ²⁹ Ageer ale, kigitaam inendet agobo ng'alekab ng'atutikwai, ago mami ng'olyo ne kigiityi inendet ne nyolji meet anan ratutik. ³⁰ Ak ye kongiborua kele kogechob ng'alek eng' ung'ot agobo inendet, ayogu inendet konyo olong'ung' achogune, ak ang'at che kataamikyi si komwa ng'alek eng' taing'ung', che itaame inendet. ³¹ Komut anyun askarik Paulo, ko u ye kaga king'at, ak komut kemoi kwo Antipatris. ³² Ago mutai kobagakta murenik che kilanyei mbartanyisiek koba koboto inendet, ak kowektagei koba irimet: ³³ ak kingo kagoit Kaisaria, ak kogochi bounindet baruet, konde Paulo agine tainnyi. ³⁴ Ak ye kiga kosoman baruet, koteebe ichek koleji, Ano emetab chichi? ak kingogas kele, bo inendet Kilikia, ³⁵ kole, Tun agasun ng'aleguk ko kait bik che kiitaamin: ak king'at kerib inendet eng' gotab kiruoget ne bo Herod.