¹ Che kitupche ak kwanisiekyok, ogas ng'alek che amwae nguno eng' taing'wong' che asorunege. ² Ak kingogas kole ng'alaljin ichek eng' kutitab Hebranik, kosisyo mising'; ak kile, ³ Ai Yahudiot kigisikya Tarso ne bo Kilikia, ago kianerji nganasani, ak kiineta Gamaliel, ak kigineta komie ko u ole teptoi Ng'atutietab kwanisiekyo, ak kiatinye kagiletab ge eng' Jehovah, ko u ole oteptoi akwek tugul rani. ⁴ Ak kiausausi Orani agoi meet, ak arate ak atoorjini korgoret murenik ak chebiosok. ⁵ Ko u ye baorinjina tisiindet ne o, ak kapkiruoget tugul ne bo boisiek: che kianyorune baronok, che kiaibe koba oldab tupchosiek, ak kiawe Damasko, ale amut ichek che kimi oloto kobka Jerusalem ko ratotin, si kobiit kebir. ⁶ Ak ye kiawendi, ko karikyi Damasko, ko katonon asis, kokweny eng' sainoto lapkeiyet ne o ne kibunu kipsengwet kolilja komoswek tugul. ⁷ Ak kiabutyi ng'weny, ak agas kutit kolenja, Saul, amu nee si iusa? ⁸ Ak kiabutyi ng'weny, ak agas kutit kolenja, Saul, Saul, amu nee si iusa? Ak kiawolu ale, I ng'o inye, Kiptaiyandanni? Ak kilenja, Ai Jeiso ne bo Nasaret ne iuse. ⁹ Ak kigeer lapkeiyet iman che kimi kobota, ago kima kas kutitab inendet ne king'alalwa. ¹⁰ Ale, Ayai nee anyun, Kiptaiyandani? Kolenja Kiptaiyat, Ng'eet, ui Damasko; si kemwaun eng' oloto tuguk che kigeng'at iyai. ¹¹ Ak kima kota amuchi ageer kiy amu liletab lapkeiyonoto, ait Damasko, konamota eut ichek che kimi kobota. ¹² Ak kinyo ole ami, chito age ne keguure Anania, chito ne bo iman eng' ribetab Ng'atutiet, ne kibaorinjin Yahudik tugul che kimenyei oloto kole mie. ¹³ Ak ye kitononi eng' ye legitena, kolenja, Ne kitpche Saul, keerte. Ak eng' sainoto ageer inendet. ¹⁴ Ak kile, kogolewenin Jehovah ne bo kwanisiekyo si kobiit inai magennyi, ak igeer inendet ne bo imanda, ak igas ng'olyot ne bunu kutinnyi. ¹⁵ Amu iegu baoriandennyi eng' bik tugul agobo tugul che koigeer ak che koigas. ¹⁶ Ta igeni nee anyun nguno? ng'eet kibatisanin, ak kiundo tengekwogiguk iguure kainennyi. ¹⁷ Ak kingo kaaweektege Jerusalem, ak kingota asae eng' hakalut, kobutya kit ne u ruon. ¹⁸ Ageer inendet kolejina, Igirgir, chakte, mande eng' Jerusalem: amu mataachei baornatet eng' inye agobo ane. ¹⁹ Ak kiale, Kiptaiyandani, Ingen icheget kole kiarate ak abire eng' sunagogit age tugul ichek che kiiyanin. ²⁰ Ak ye kingetumdoi korotikab Stepano baoriandeng'ung', ko, kiatononi agane eng' yoto, ak achame, ak aribe ngoroikab icheget che kibarei inendet. ²¹ Ak kileja inendet, Ui: amu ayoktin iwe ole loo agoi oldab Bororiosiek. ²² Koepchi it anyun inendet agoi ng'olyondonito; yeityo komwa eng' kutit ne o, kole, Oiste chito ne u nito kwo eng' ng'weny: amu manyolu kosob. ²³ Ak kita koboldos, ak kowirtoi ngoroikwai, ak kowastoi temburek koba barak. ²⁴ Kong'at kiptaiyat ne o kole kimut inendet kwo irimet, kong'at kole, Ogine eng' biret ne bo kipcharitisiek, si konai inendet kit ne kabolji ichek ko u noto agobo inendet. ²⁵ Ak ye kingo kagorate inendet anok, koleji Paulo kiptaiyatab bogol ne kitononi eng' yoto, Tos chamdoi ng'atutik eng' akwek obir chi ne Romanindet, ama kiruokyi? ²⁶ Ak kingogas kiptaiyandanoto bo bogol noto, kwo ole mi kiptaiyat ne o, ak komwachi inendet koleji, Imache iyai nee nguno? amu Romanindet chichi. ²⁷ Konyo anyun kiptaiyat ne o, ak koleji inendet, Mwawa, tos i Romanin? Ak kile, Ee. ²⁸ Kowol kiptaiyat ne o kole,Kiaegu chitab bororioni eng' alyet ne o. Ak kile Paulo, Kigiskya bororionito. ²⁹ Koba anyun eng' sainoto ichek che kimachei kogine inendet: ak kiiywei agine kiptaiyat ne o, ye kingonai kole kaga Romanindet inendet, ak amu kiga korat inendet. ³⁰ Ago ye kimachei konai komie eng' betut ne bo aeng', kit ne koitaame Yahudik, kotiach inendet, ak kong'at tisiik che eechen ak kapkiruoget tugul kotuiyo, ak komut Paulo kochorgei, ak konde inendet taing'wai.