¹ Ak ye kingo kagebesie ak icheget, ak ketau kebe eng' melit, kilitit banda ak kitorjige Kos, ak betut ne kiisubi noto keit Rodo, kebe eng' oloto agoi keit Patara: ² ak ye kingenyoru melit ne landoi kowendi Poinike, kelany, ak kebe. ³ A ye kiga kegeer Kupro, kesiirtoe komi eut ne bo katam, kebe agoi Suria, ak kechoruge eng' melit eng' Turo: amu yoto ye kinemune tugukab melit. ⁴ Ak ye kiga kenyoru alamalyet, ketebi eng' oloto betusiek tisab: ak kimwachi ichek Paulo eng' Tamirmiriet koleji, amat kotiech Jerusalem. ⁵ Ak ye kingo kagigesu betusiechoto, kebe bandanyo; ak kiiyomisech ichek tugul koboto osotik ak lagok, agoi kemande eng' nganaset: ak kegutung'se eng' tabandab araraita, kesa, ⁶ ak kigochige saisere; kelany anyun melit, koweek ichek koba ga. ⁷ Ak ye kiga kigesu banda ne bo melit kebunu Turo, keit Ptolemai; ak kigat tupchosiek, ak ketebi koboto ichek betut agenge. ⁸ Ak eng' betut ne bo aeng' kebe, agoi keit Kaisaria: ak kebe gotab Pilipu amdoindet ne bo logoiywek che miach, inendet ko agenge eng' bik tisab, ak kigitebi ak inendet. ⁹ Kitinyei chichoto tibik ang'wan, bergeinik, che kimaoteni. ¹⁰ Ak ye kingo kagetebe oloto betusiek che chang', kochorgei maotiot age ne kigiguure Agabo kobunu Judea. ¹¹ Ak kingo kagoit ole kimi, konam birenetab Paulo, ak korate kelyekyi ak eunekyi, ak kole, Mwaei Tamirmiriet ne Tilil u ni kole, Ratei ko u nito Yahudik che mi Jerusalem chitab koba birenoni, ak tun indoi inendet eunekab Bororiosiek. ¹² Ak kingegas ng'alechuto, kesaisai anyun inendet acheget koboto bikab oloto si matogosta Jerusalem. ¹³ Ago kiwol Paulo kole, Amu nee si orirtosi ak onyarati muguleldanyu? amu ane achobot ma kerata kityo ago ame eng' Jerusalem agobo kainetab Kiptaiyat Jeiso. ¹⁴ Ak ye kimatagocham kogasech kesisye ak kemwa kele ng'oyaak magetab Kiptaiyat. ¹⁵ Ak kingobata betusiechoto kenam tugukyok ketogoste Jerusalem. ¹⁶ Ak kigibe koboto alamalyet che kibunu Kaisaria, komutu Mnason ne bo Kupro, ne agenge ne bo alamalyet ne bo keny, ne kigibendi ketebe gonnyi. ¹⁷ Ak kingeit Jerusalem, kotaachech tupchosiek eng' boiboiyet. ¹⁸ Ak betut ne kiisubi betunoto kebe achek ak Paulo gab Jakobo; ak kimi boisiek tugul. ¹⁹ Ak kingo kagogat ichek, kotetyi tuguk tugul agenge agenge che kiga koyai Jehovah eng' boisiennyi eng' Bororiosiek. ²⁰ Ak kingogas ichek ng'olyondonoto, kogonyit Jehovah; ak koleji ichek inendet, Igeere anyun, ne kitupche, ole te elfusiek ng'isiat eng' kwenutab Yahudik che kigoyan; ak tinyei tugul kagiiletab ge agobo Ng'atutiet. ²¹ Ak kigiborji ichek agobo inye, kele, ineti Yahudik tugul che mi oldab Bororiosiek kobagakta Musa, ilejini amat komuratan, anan kosub bitonwek. ²² Nee anyun nguno? magogas ichek iman kole kaiitu. ²³ Yai anyun ni kimwaun: Kitinye bik ang'wan che kigoarorta kiy eng' kayosiet. ²⁴ Imut anyun bichu, ak ianyinyge koboto ichek, ak igamanji feda, si kobiit kicherji metonwek: si konai tugul kole mami imanit eng' ruguchoto kigiborji agobo inye; ago inye iwendoti komie, iribe Ng'atutiet. ²⁵ Ago eng' Bororiosiek che kigoyan, ko kigesir ketil kiruoget kele, kotabanegei tuguk che kieng'jin kanamonik, ak korotik, ak banyek che bo che kagiget, ak sokset. ²⁶ Komut anyun Paulo murenjoto, ak eng' betut ne bo aeng' koanyinygei koboto icheget ak kwo hekalut orit, kobortoi kasuldaetab betusiek che bo kaanyinyet, agoi kigoito kagochinet ne bo age tugul eng' ichek. ²⁷ Ak ye kimachei kogesgei betusiek tisabu, kowas tuiyet Yahudik che kibunu Asia, ye kingogeer inendet komi hekalut, ak konam inendet. ²⁸ Koboldos, kolen, Akwek Israel, otoretech! Chichito ne ineti bik tugul eng' komosta age tugul kowech bik, ak Ng'atutiet, ak yuto: ak koboto noto koimut Yunanik agichek kobwa hekalut, ak kagong'wanit yuto tilil. ²⁹ Amu kiga kogeer Tropimo Epesoindet komi koboto inendet eng' nganaset, ne kilen kiimutu Paulo konyo hekalut. ³⁰ Kowasgei anyun nganaset komugul, ak kiruai bik kibagenge: ak konam Paulo, ak kochuut komong' eng' hekalut: ak kigiger kurgotik eng' sainato. ³¹ Ak ye kicheng'ei kobar inendet, koityi ng'alek kiptaiyat ne o ne bo murenikab luget kole, mitei chemarget Jerusalem komugul. ³² Komut ngunoto askarik ak kiptainikab bogolwogik koruai kochortagei ole mi ichek; ak kingogeer ichek kiptaiyat ne o ak askarik, kobagakta biret ne kibirei Paulo. ³³ Konyo anyun kiptaiyat ne o korik, ak konam inendet, ak kong'at kole, kerat inendet eng' sirimwek aeng'; ak koteebe kole, ng'o nito? ak kayai nee? ³⁴ Ak kobolyo alak eng' tuiyet komwaei kit age, komwaei alage kit age: ak ye kimaimuch konai komie kit ne bo bolatet, kong'at kole kimut inendet kwo irimet. ³⁵ Ak kingoit long'eiywot, koganab askarik inendet amu koromnatetab tuiyet. ³⁶ Amu kiisubi tuiyet ne bo bik, koboldos, kolen, Oiste inendet. ³⁷ Ak ye kigimachei kimut Paulo kwo irimet, koleji kiptaiyat ne o, Ichamwa amwaun Koleji, Tos ingen kutitab Yunanik? ³⁸ Tos ma i Misrindet ne kiing'et lomset yaginye ak komut bik elfusiek ang'wan koba ong'atet, bik che kiguure Rumik? ng'olyo? ³⁹ Ago kile Paulo, A Yahudiot, ne bo Tarso eng' Kilikia, a bo nganaset ne ma nyerat: ak asomin ale, chamwa ang'alalji bik. ⁴⁰ Ak kingo kagochamji, kotonon Paulo long'eiywot, ak koborji bik eng' eut kosisyo, ak ye kingo kagosisyo inne, kong'alalji ichek eng' kutitab Hebranik, kole.