¹ Ak kingobata bolatet, ko kagoyokto Paulo alamalyet kobwa ak kogimit ichek, koyomisge, si kwo Makedonia. ² Ak kingo kagobun komoswechoto, ko kagogimit ichek eng' ng'alek che cheng', koit emetab Yunanik. ³ Ak kingo kagotebe oloto arawek somok, kochob Yahudik ng'alek eng' ung'ot agobo inendet, ye kimachei kobun melit kwo Suria, komachei kole koweegegei oretab Makedonia. ⁴ Ak kiba koboto inendet agoi Asia Sopatro ne Berea, ne bo gab Puro; ak che bo Tesalonikek Aristarko ak Sekundo; ak Gaio ne bo Derbe, ak Timoteo; ak Tukiko ak Tropimo che bo Asia. ⁵ Ago kiga kondo chuto, ak kiigenech eng' Troa. ⁶ Ak kigibun melit eng' Pilipi ko kagobata betusiekab makatiat ne ma kinde mermerek, ak keit ole mi ichek eng' Troa eng' betusiek mut; ole kigitebe eng' betusiek tisab. ⁷ Ak eng' betutab tai ne bo wigit ye kiga kiyumge si kebutul makatiat, koamji Paulo ichek, ye kimachei kwo eng' betut nebo aeng'; kong'alal koek keny agoi kemoi kwen. ⁸ Ak kimi taisiek che chang' eng' got ne bo barak, ole kiga kiyumjige. ⁹ Ak kitebe tirisiet neranet age ne kigiguure Eutuko ak kibirto met eng' ruondo; ak kita koamji Paulo, koek keny, ak kingobirto met, kotururtogei kong'eete got ne bo somok, ak kigisut ko kagome, ¹⁰ Ak kichortagei Paulo, ak koitaegei inendet, ak kosuube eunekyi, komwa kole, Moiimge; amu ta kosobei. ¹¹ Ak kingotogosta, ak kobutul makatiat ak koam, ak kong'alal keny koboto ichek, agoi koech, kwo anyun. ¹² Ak kiimut nerananato ko kagosob, ak kinyor kagaigaet ne o. ¹³ Ago kigindoi achek kebe melit, kebe Asos, amu kigimache kimut Paulo eng' oloto: amu kiga kong'at inendet ko u noto, komach inendet kole kobun keldo. ¹⁴ Ak ye kingetuiye ak inendet eng' Asos, kimut inendet konyo melit, ak keit Mitulene. ¹⁵ Ak kigibe eng' oloto kebun melit, keit Kio eng' betut ne bo tai; ak betut ne bo aeng' keit Samo; ak betut ne bo somok keit Mileto. ¹⁶ Amu kiga kobegechi Paulo kwo kosiirtoe Epeso eng' melit, si maigagei eng' Asia; amu kiigirgiri, kole tamangab koit Jerusalem eng' betutab Pentekost. ¹⁷ Ak kiiyokto eng' Mileto keguur boisiekab kaniset eng' Epeso. ¹⁸ Ak ye kingobwa ole mi inendet, koleji, Ongen okweget kong'ete betut ne bo tai ye kingatau atiech Asia, ole kiateptoi kobotok tugul, ¹⁹ aboisiechini Kiptaiyat eng' kamining'etab ge tugul, ak eng' beekab kong', ak eng' tiemisiosiek che kibwanja eng' chobutik che bo ung'ot che bo Yahudik. ²⁰ Ko u ye kima ariny amwawok kiy age tugul ne imuchi kotoretok, ak anetak eng' taitab bik, ak ang'eete got age agoi got age, ²¹ abaorinjini Yahudik koboto Yunanik sigunet eng' taitab Jehovah ak kayanet eng' Kiptaiyandannyo Jeiso Kristo. ²² Ak ogeer anyun, nguno, awendi Jerusalem korata tamirmiriet, amangen tuguk che bwanjina eng' oloto: ²³ kobate kityo baorianjina Tamirmiriet ne Tilil eng' nganaset age tugul, kolen, igena ratisiosiek ak nyalilwogik. ²⁴ Ago maiiti sobondanyu ale kiy ne achame kot, si kobiit ages bandanyu, ak boisiet ne kiataach eng' Kiptaiyat Jeiso, abaorianji logoiywek che miach che bo mieindab Jehovah. ^{27 25} Ak nguno anyun, ogeero, angen ale akwek tugul che kiaamdate bounatetab Jehovah kwenung'wong', koma ogeere togennyu kogeny. ²⁶ Abaoriani anyun eng' taing'wong', betuni, ale, ai tilil eng' korotikab bik tugul. ²⁸ Oripge anyun akweget, koboto akwet tugul, ne kigonok Tamirmiriet ne Tilil oegu ribik, obai kanisetab Jehovah, ne kiale korotikyi. ²⁹ Angen ale ye kaawe komong'jok suik che koromen, ama rire akwet. ³⁰ Ak tun ng'eetos alage eng' kwenung'wong' komwaei ng'alek che imaasi bich, si kochuut alamalyet kosub ichek. ³¹ Oripse anyun ak obwat ole ma abagakte atigon chi age tugul eng' beekab kong' eng' kenyisiek somok kemoi ak bet. ³² Ara anyun, kabagakyok nguno eutab Jehovah, ak ng'olyotab mieindanyi, ne imuchi koteechak, ak kogonok borotet koboto ichek tugul che kitilili. ³³ Ma aamjo ng'et kong' feda anan tahabu anan ngoroik che bo chi age tugul. ³⁴ Ongen akwek ole kiabois eunechu agobo tuguk che kianyalili, ak agobo ichek che kimi kobota. ³⁵ Kiagonok kaborunet eng' tuguk tugul, ale ye oboisiei ko nyolu otoret che matinyei kimnatet, ak obwati ng'alekab Kiptaiyat Jeiso, ko u ye kimwa inendet kole, Tinyei boiboiyet kagoitoet kosir taaget. ³⁶ Ak kingo kagomwa ko u noto, kogutuny, kosa koboto ichek tugul. ³⁷ A kiririo ichek tugul mising' ak kosuub kaatitab Paulo, ak kong'utut inendet. ³⁸ Koarogendos kosiir agobo ng'olyot ne kiga komwa, kole matun kogeerei togennyi kogeny. Ak kiiyomis inendet kowendi kolanyei melit.