¹ Ak ye kita komi Apolo Korinto, ko kagobun Paulo emet kwen, koit Epeso, ak konyor alamalyet. ² Ak kileji ichek, Tos kiotaach Tamirmiriet ne Tilil ye kingoyan? Koleji, Achicha, tomo agot kegas ngo mitei Tamirmiriet ne Tilil. ³ Ak kileji, Kigibatisanjok nee anyun? Ak kile, Kigibatisanjech kabatisanetab Johana. ⁴ Kole, Paulo, Kiibatisanis Johana eng' kabatisanetab sigunet, koleji bik kanyol koyan inendet ne isubu inendet, noto ko Jeiso. ⁵ Ak ye kingogas nito, kibatisan eng' kainetab Kiptaiyat Jeiso. ⁶ Ak ye kingo kagogonoor Paulo eunekyi icheget, konyonji anyun Tamirmiriet ne Tilil ichek; ak king'alal eng' kutuswek che terotin, ak koamda. ⁷ Ak ki olo bo taman ak aeng' bichoto tugul. ⁸ Ak kiwa eng' sunagogit orit ak kong'alal eng' nyiganatet eng' arawek somok, kong'alali ak kolomei agobo tuguk che bo bounatetab Jehovah. ⁹ Ago ye kingo uuegitu mugulelwekab alak ak kobistoe, ak komwaei ne ya agobo Oranato eng' taitab tuiyet, kwo eng' ole mi, ak kotaban alamalyet, kong'alaljin betut age tugul eng' skulitab Turano. ¹⁰ Kiyaak ko u noto eng' betusiek aeng'; kot kogas ng'olyotab Kiptaiyat tugul che kimenyei Asia, Yahudik koboto Yunanik. ¹¹ Ak kiyai Jehovah boisionikab kimnatet che ter eng' eunekab Paulo: ¹² kot keipchi che miandos kitambaok ak angok che kiga kotiiny bortanyi, ak kiistogei mianwek eng' bichoto, ak kimanda tamirmirik che yaachen eng' ichek. ¹³ Ak kitoi Yahudik alage che kiombenoti, che kilen koon oik, komwa kainetab Kiptaiyat Jeiso eng' icheget che kitinyei tamirmirik che yaachen, kolen, Ayosiewok eng' Jesu ne amdoi Paulo. ¹⁴ Ak kimi werik tisabu che bo Skeba, inendet Yahudiot, tisiindet ne o che kiyai ng'olyondonoto. ¹⁵ Ak kiwolji tamirmiriet ne ya ichek, koleji, Angen Jeiso, ak angen Paulo; ago akwek ko o ng'o? ¹⁶ Ak kitorombenji chichoto ne kitinyei tamirmiriet ne ya ichek, ak konenet ichek, ak koterter, kot komwei komanda eng' goyoto ach ngor ko kagiguoten. ¹⁷ Ak kinaak nito eng' tugul, Yahudik, che kimenyei Epeso; ak kinyor kaiyweisiet ichek tugul, ak kinyor teegisto kainetab Kiptaiyat Jeiso. ¹⁸ Kibka agichek che chang' che kiiyan, kong'anyei, ak kobortoi boisionikwai. ¹⁹ Ak kiib bukuisiekwai bik che chang eng' ichek che kiyaei ng'orset, ak kobeel eng' taitab bichoto tugul: ak kiit kamanutieng'wai, konyor kole kiitei fedaisiek elfusiek konam. ²⁰ Kotesak ko u noto anyun ng'olyotab Kiptaiyat eng' kimnatet ak koterter. ²¹ Kingobata anyun tuguchoto, komach Paulo eng' tamirmiriennyi kwo Jerusalem, ko kagobun Makedonia ak Akaya, kolen, Ye kaawe oloto, ko kanyol ageer Rom agine. ²² Ye kingo kagoyokto aeng' eng' ichek che kiboisiechin inendet koba Makedonia, Timoteo ak Erasto, kota kotebi inendet eng' Asia ne matia. ²³ Ak king'et bolatet ne o eng' betusiechoto agobo Oranoto. ²⁴ Amu chito age ne kiguure Demetrio, kitang'indet ne bo feda, ne kiitanyi kanamonik che bo feda che bo Artemi, ne kiipchin tuguk che chang' kitang'ik. ²⁵ Che kiiyum kibagenge koboto bik che kitinyei boisiet ne u noto, ak koleji, Mureju, ongen akwe ole, bunu magomatennyo boisioni. ²⁶ Ak ogeere ak ogase ole, ma eng' Epeso kityo, ago legit Asia tugul, kagochuut bik che chang' Paulo-inito, ak koweechi,kolejin, choto kagiyae eunek ko ma cheptalelisiek. ²⁷ Ak ma kele kityo biitu bichiindab sasisiet ne kisasei boisiennyo; ago kiiti kele makiy hekalutab cheptalelit ne o ne chebioset Artemi, ak keistoe inendet teegistannyi, ne koilosu Asia tugul koboto ng'weny. ²⁸ Ak ye kingogas nito, konerekso inne, ak kobolyo, kole, O Artemi ne bo Episoek. ²⁹ Ak konyi anyun nganaset bolatet: ak koruai kibagenge oldab ureriet, ko kagonam Gaio ak Aristarko, bikab Makedonia, che kibendoti ak Paulo. ³⁰ Ak ye kimachei kwo Paulo orit ole mi bik, ko ma kochamji alamalyet. ³¹ Ak kiiyokto ng'olyot bik alage che eechen che bo Asia, amu ki choronokyi, si mat kogoitogei kwo oldab ureriet orit. ³² Kiboldos anyun alage, komwaei ni, komwaei alage kit age: amu kibiit bolatet eng' tuiyet; ak kima kongen che chang' kit ne kiigochi kotuiyo. ³³ Ak kiimut Aleksandro komong' eng' tuiyet, kogoito Yahudik inendet. Ak kiiborji Aleksandro bichoto eng' eut, ak kimachei kosorgei eng' bichoto. ³⁴ Ago ye kingonai kole inendet ko Yahudiot, kobolyo tugul eng' kutit agenge, eng' olo bo saisiek aeng', kolen, O Artemi ne bo Epesoek. ³⁵ Ak kingo kagomwachi sirindetab nganaset tuiyet kosisyo, kole, Akwek bikab Epeso, tos mi ng'o ne maingen kole nganasetab Epesoek ko ribindetab hekalutab Artemi ne o, ak kanamwet ne kiibut kobunu barak? ³⁶ Ak ngo magimuchi ketiiyo agobo tuguchu, ko kanyol osisye, amat osartae ng'olyo. ³⁷ Amu kaomutu bichu, che ma rebikab hekalusiek ama chubei cheptalelinnyo ne kwondo. ³⁸ Ngo tinyei anyun Demetrio ak musogik che mi koboto inendet ng'olyo agobo chi, ko yatotin kapkiruogik, ak mitei bounik: ingoruokyin anyun ichegei. ³⁹ Ago ngocheng'e akwe ng'olyo agobo tuguk alak, ko tun kilititi eng' tuiyet ne cham komi. ⁴⁰ Amu mi bichiindo ne tos kiruokwech agobo bolatet ne bo rani, amu mami kito ne bo: ak magimuchi ketetu kiy agobo tuiyoni. Ak kingo kagomwa ko u noto, komwachi tuiyet koba.