¹ Kingobata tuguchu kwo Paulo eng' Atene, ak koit Korinto. ² Ak kinyor Yahudiot age ne kiguure Akula, chito ne bo Ponto, ne kita kobunu Italia, koboto osotiondennyi Prisila, amu kiga ng'at Klaudio kole koba Yahudik tugul eng' Rom. Ak kinyo ole mi ichek; ³ amu kikergei boisiennyi ak neng'wai, kotebi anyun koboto ichek, ak kobois tugul, amu ki nabik che bo emaisiek icheget. ⁴ Ak king'alali eng' sunagogit sabato age tugul, ak kochuutu Yahudik ak Yunanik. ⁵ Ago ye kingochorgei Sila ak Timoteo kobunu Makedonia, konyonji Paulo kachirjiret ne bo ng'olyot, kobaorianjin Yahudik kole Jeiso ko Kristo. ⁶ Ak ye kingogirindagei ak inendet, ak komwa ng'alek kochubis, koleglekta ngoriennyi, ak koleji, Ingotebi korotikwok eng' merowekwok; ai tilil ane: kong'ete nguno ko kawe oldab Bororiosiek. ⁷ Ak kiwa eng' oloto, ak kwo gotab chito age ne kiguure Tito Justo, chito ne kiilosu Jehovah, ne kinamegei gonnyi ak sunagogit. ⁸ Ak kiiyan Krispo Kiptaiyat, ne ki bounindetab sunagogit, koboto gonnyi tugul; ak kingogas che chang' che bo Korintoek, koyan, ak kigibatisan. ⁹ Ak kileji Kiptaiyat Paulo kemoi eng' ng'ang'utiet, Ameiywei, ago ng'alal inye, amat isis. ¹⁰ Amu ami koboten, ama mi chi ne twain koyaun ne ya: amu atinye bik che chang' eng' nganasani. ¹¹ Ak kimeny oloto kenyit agenge ak arawek lo, koneti ng'olyotab Jehovah eng' kwenung'wai. ¹² Ago ye kingo kiruogindetab Akayo Gallo, kong'eetyi Yahudik Paulo eng' maget agenge, ak komut inendet kwo taitab ng'echeretab kiruoget, ¹³ kole, Ichuuti chichi bik kole kolos Jehovah eng' oret ne etei Ng'atutiet. ¹⁴ Ago ye kimache Pulo kotwek, koleji Galio Yahudik, Akwek Yahudichu, nda bo yaitio ng'alechu iman, anan ko bo chalwok ne ya, ta nyolu agaswok. ¹⁵ Ago nda teebutik agobo ng'alek ak kainaik ak ng'atutieng'wong' akweget, oyai akwege. mamache aek kiruogindetab ng'alechuto. ¹⁶ Ak kion ichek koba eng' oldab ng'echeretab kiruoget. ¹⁷ Ak kinam tugul Sostene, bounindetab sunagogit, ak kobir inendet eng' taitab ng'echeranoto bo kiruoget. Ak kima mage kiy Galio ng'alechoto tugul. ¹⁸ Ak kingobata ni, ak ko kagotebi Paulo betusiek che chang', kobagakta inendet tupchosiek kobun melit kwo Suria, koboto Prisila ak Akula; ye kiga kocher metit eng' Kenkrea: amu kiga koarorta kiy eng' kayosiet. ¹⁹ Ak kiit Epeso, ak kobagakta ichek eng' oloto: ago kiwa inendet sunagogit, ak kong'alal ak Yahudik. ²⁰ Ak kingomwachi kole, kota kotebi ak ichek, koma kocham. ²¹ Ago kingobagaktoi ichek, komwa kole, Aweekyinoge kogeny ngo cham Jehovah. Ak kibun melit kwo Epeso. ²² Ak ye kingo kagolanda Kaisaria, kotogosta kwo kogat kaniset, ak kochortagei kwo Antiokia. ²³ Ak kingo kagotebi eng' oloto betusiek alak, kwo kobunot koret ne bo Galatia ak ne bo Prugia, ko u ye rubegei, kogimitoti alamalaik tugul. ^{25 24} Ak kinyo Epeso Yahudiot age ne keguure Apolo, ne bo Aleksandria, chito ne ng'om; ak ki kim eng' sirutik. 25Kiga kinet chichito oretab Kiptaiyat; ak amu kitinye kagiiletab ge eng' tamirmiriennyi, kong'alal ak konet komie ng'alek agobo Jeiso, kongen kabatisanetab Johana kityo. ²⁶ Ak kitoi kong'alal eng' nyiganatet eng' sunagogit. Ago ye kingogas Prisila ak Akula, komut inendet kwo oldang'wai, ak koborji inendet oretab Jehovah komie kosiir. ²⁷ Ak ye kimache kolanda kwo Akaya, kogimit tupchosiek inendet, ak kosirji alamalyet kole kotaach inendet ichek mising' che kiga koyan eng' mieindo. ²⁸ Amu kiiguiyechi Yahudik komie eng' kimnatet, eng' taitab bik, koborjin eng' sirutik kole Jeiso ko Kristo.