¹ Ak kingo kagobun Ampipoli ak Apolonia, koit Tesalonike, ole kimi sunagogitab Yahudik: ² Ak kiwa Paulo ole mi ichek, ko u ye kicham koyaei, ak kong'alal koboto bichoto eng' sabatosiek somok eng' sirutik. ³ Kong'ang'jin ak koborjin komie kole kiga nyolji Kristo konyalil, ak kong'eet kogeny eng' che kibek; ak kole Jeiso nito aamwok, ko Kristo. ⁴ Kiiyan anyun alage eng' ichek, ak konamgei ak Paulo ak Sila; ak tuiyet ne o ne bo Yunanik che kigonyiti Jehovah, ak che chang' eng' chebiosok che toogunotin. ⁵ Ago ye kingoam ng'etkonda Yahudik, konamgei ak bik che yaachen che matilei kiy, ak kiiyum tuiyet, ak kong'eet ichek bolatet eng' nganaset; ak kibut gotab Jason, komachei kole komut ichek sang' koba ole mi bik. ⁶ Ak ye kimata konyor, kochuut Jason ak tupchosiek alak koba taitab kiruogikab nganaset, koboldos, kolen, Kagobwa oli kogeny bichu kogowal ng'weny. ⁷ Bik che kagotaach Jason: ak yaei bichuto tugul, tuguk che etei ng'atutikab Kaisari, komwaei kolen mitei laitoriat age, ne inendet Jeiso. ⁸ Ak ye kingogas tuguchuto, koiim tuiyet ak kiruogikab nganaset. ⁹ Ak kingo kagoname Jason ak bik alak, tuguk, kounda koba. ¹⁰ Ak ne matianit koyokto tupchosiek Paulo ak Sila kemoi koba Berea: ak kingoit oloto, koba sunagogitab Yahudik. ¹¹ Ak ki miachen bichu kosiir choto bo Tesalonike, amu kitaach ng'olyot ak kocham mising', kosiachi sirutik betut age tugul, si kobiit konai ngo iman tuguchu. ¹² Kiiyan anyun che chang' eng' icheget; ak chebiosok che bo Yunanik che toogunotin, ak murenik che chang'. ¹³ Ago kingonai Yahudik che bo Tesalonike kole, amdoi Paulo ng'olyotab Jehovah eng' Berea agine, koba oloto agine, ak kowas ak konyalil tuiyosiek. ¹⁴ Koyokto anyun ngunoto tupchosiek Paulo kot koit nyanjet: ak kita kotebi eng' oloto Sila ak Timoteo. ¹⁵ Ago icheget che kiimuti Paulo ko kiimut agoi Atene: ak kingotaach ng'atutiet koipchi Sila ak Timoteo kole kobwa ole mi inendet kochok, koba anyun. ¹⁶ Ak kingota kogenyi Paulo ichek eng' Atene, koiimak tamirmiriennyi eng' orinnyi, ye kingogeer nganaset ko nyiitat kanamonik. ¹⁷ Kong'alal anyun eng' sunagogit koboto Yahudik ak bik che konyiti Jehovah, ak eng' oldab aldaisiet eng' betut age tugul koboto che kituitos ak inendet. ¹⁸ Ak kituiyo koboto inendet alak che bo ng'omotikab Epikurio ak Stoiko. Ak kole alak, Mwaei nee kipchang'alaini ne bo cheptalelisiek che ter: amu kiamdoi Jeiso ak ng'eetyet. ¹⁹ Ak konam inendet, ak komut kwo Areopago, kole, Tos kimuchi kenai kele nee konetisioni leel, imwae? ²⁰ Amu keipchi itikyok tuguk alak che leelach: noto anyun kimache kenai kit ne iboru tuguchoto. ²¹ Ak kima kotinyei bik tugul che bo Atene, ak toek che kimi oloto, boroindo ne bo kiy age kobate komwa anan kogas ng'al che too. ²² Ak kitonon Paulo eng' kwenutab Areopago, ak kole, Akwek bikab Atene, kaageer ale eng' tuguk tugul ogiilige mising' eng' sautik. ²³ Amu ye kiasiirtoi, ak ageer tuguk che osae, anyoru agine kapkorosut ne tinyei sirutichu, BO CHEPTALELIT NE MANAEI CHI. Noto anyun ne osae amongen, aboruok anyun nito. ²⁴ Mamenyei hekalusiek che kigiyae eunek Jehovah ne kiyai ng'weny ak tuguk tugul che mitei oloto, amu inendet ko Kiptaiyatab kipsengwet ak ng'weny. ²⁵ Ama kiboisiechin eng' eunekab bik, ko u ne banani kiy, amu inendet ne igochin tugul sobondo, ak kabuset, ak tuguk tugul; ²⁶ Ak kiyai eng' chito agenge bororiet age tugul ne bo bik si komeny ng'weny komugul, ko kagoborji kenyisiek che kiging'at, ak kiwotosiekab meng'oteng'wai; ²⁷ si kobiit kocheng' Jehovah, komang'u kole tamangab kotamdamat, ak konyor inendet, nganda ma loo eng' age tugul eng' achek: ²⁸ Amu kisoptosi eng' inendet, ak kebendoti, ak kemi; ko u ye kigomwa alage eng' sirikwok che bo ng'alek che kergei ak tienwogikab kalosunet, kole, Amu ki lagokyik ak achek. ²⁹ Ngo ki lagokab Jehovah anyun, ko manyoljech kibwat kele kergei Jehovah ak tahabu, anan feda, anan koita, che kigiyai eng' musoknatet ak eng' ng'omnatetab bik. ³⁰ Kima mage kiy anyun Jehovah betusiek che kima komi naet; ago kang'at nguno kole kosik bik tugul eng' komosta age tugul: ³¹ Amu kigochob betut, ne tun iruokyine ng'weny eng' imanda eng' chichoto kigonde; ak kigoborji komie bik tugul agobo noto, amu kiing'et inendet komong' eng' che kibek. ³² Ye kingogas anyun agobo ng'etyeetab che kibek, kochombil alage; ago kile alak, Ta kegasun nito betut age. ³³ Kimanda anyun Paulo eng' kwenung'wai. ³⁴ Ago kinamgei bik alak ak inendet, ak koyan; ki age eng' icheget Dionusio Areopagindet, ak chebioset ne kiguure Damaris, ak alak che kimi koboto icheget.