¹ Ak kinyo agine Derbe ak Lustra: ak ogeer anyun, kimi age ne bo alamalyet oloto, ne kigiguure Timoteo, weritab chebyahudiot ne kiiyani; ago ki Yunanindet kwandanyi. ² Kibaorinjin inendet tupchosiek che kimi Lustra ak Ikonio kole mie. ³ Kimache Paulo chichito koba tuwai; ak kiimut inendet ak komuratan amu Yahudik che kimi komoswechoto: amu kiingen tugul kole Yunanindet kwandanyi. ⁴ Ak ye kibendi bandang'wai kobunoti nganasok kogochi ichek ng'atutik, che kiga ng'at che kiyoktoi ak boisiek che kimi Jerusalem, si korib. ⁵ Kigigimit anyun kanisosiek eng' kayanet, ak kotesak koiteng'wai betut age tugul. ⁶ Kiba anyun kobun koret ne bo Prugia ak Galatia, ko kagoete ichek Tamirmiriet ne Tilil komwaita ng'olyot eng' Asia. ⁷ Ak ye kingotorjigei Musia, kotiem koba Bitinia; ago machamji ichek Tamirmirietab Jeiso. ⁸ Ak kingosiir Musia kochortagei Troa. ⁹ Kinyonji anyun ng'atutiet Paulo kemoi; kimi chitab Makedonia ne kitononi, kogoigoi inendet, kolen, Long'u Makedonia, nyo toretech. ¹⁰ Ak ye kingo kagogeer ng'atutiet, eng' sainato kemach kebe Makedonia ko kagenai kele kogoguurech Jehovah si kobiit keamji ichek logoiywek che miach. ¹¹ Kigibun anyun melit kebunu Troa, kitorjige Samotrake, ak betut ne kiisubi noto keit Neapoli. ¹² Ak keng'eetye oloto kebe Pilipi, ne nganasetab Makedonia, ne ki toogunot eng' emonoto, ne kiuchi Romanik: ak kigitebe nganasanato betusiek alak. ¹³ Ak eng' betutab sabato kemandae ormarichet kebe ole legite ainet, ole kigilen oldab saet; ak kigiteb ng'weny ak kenga'lalji chebiosok che kiga tuiyo. ¹⁴ Ak kigasech chebioset age, ne kigiguure Ludia, aldaindetab ngoroik che arusen ne birir, ne bo nganaset ne kiguure Tuatera, ne kiilosu Jehovah: ne kiyat Kiptaiyat muguleldanyi, si koepchi it tuguk che kimwaei Paulo. ¹⁵ Ak ye kiga kibatisan inendet, ak bikab gonnyi, kogaigaech, kole, Ngo kaogeer ole ayani Kiptaiyat, obka gonnyu, ak otebi. Ak kibirjech kebe. ¹⁶ Ak ye kigibendi oldab saet, kotuiyenech chepto ne kitinyei tamirmiriet ne ng'orsei ne kiipchi kiptainikyi tuguk che chang' amu ng'orset. ¹⁷ Kiisubot Paulo kebendi tugul, ak komwaei eng' kutit ne o, kolen, Bichu ko otwogikab Jehovah ne Toror Mising', che mwawok oretab yetunet. ¹⁸ Ak kiyai inendet ko u noto eng' betusiek che chang'. Ago kiarogen Paulo mising', ak kowelelgei ak koleji tamirmirionoto, kang'atin eng' kainetab Jeiso Kristo ale, mong'u eng' inendet. Ak kimong'u eng' sainato. ¹⁹ Ago kingogeer kiptainikyi kole, kagobet kamang'unetab keljineng'wai, konam Paulo ak Sila, ak kochuut koba taitab bounik eng' oldab aldaisiet. ²⁰ Ak kingo kagomut ichek taitab kiruogik, komwa kole, Inyalili bichu nganasennyo mising', ago icheget ko Yahudik. ²¹ Ak ineti bitonwek che ma chamdaat eng' ng'atutik ketaach, anan kisub, amu achek ko ki Romanik. ²² Ak king'eet tuiyet kibagenge kobogokyi ichek: ak kogerer kiruogik ngoroikab bichoto, ak kong'at kebir eng' kirokwek. ²³ Ak kingo kagobir ichek mising' kotoorji korgoret, ak kong'at ribindetab korgoret korib komie. ²⁴ Ak kingo kagonyor ng'atutiet ne u noto, kotoorji ichek got ne bo orit, ak koratyi kelyekwai temeleiywek. ²⁵ Ago kisaei Paulo ak Sila ak kotienjin Jehovah tienwogik olo bo kemoi kwen, ak kiepchin it ichek kimonjoronik. ²⁶ Ak kibotan emet mising' eng' sainato, kot kotumdumgei lumeiywekab korgoret: ak eng' sainato koyatogis kurgotik tugul; ak kiitiagogis tuguk che kigirate chi tugul. ²⁷ Ak kingosiir eng' ruondo ribindetab korgoret, ak kogeer kurgotikab korgoret ko yatotin, kong'us rotwennyi bo chok, ak ki legit ko kobargei, kolen, kagochililyo kimonjorinik. ²⁸ Ago kimwa Paulo eng' kutit ne o, kole, Ameyachige kiy ne ya: amu kimi yu achek tugul. ²⁹ Ak kiguur keib taisiek, ak kotoromben kwo orit, ak kiibutyi kelyekab Paulo ak Sila kobotananu eng' kaiyweisiet, ³⁰ ak kiimut komong' sang', ak kole, Kiptainichu, ayai nee si kesorua? ³¹ Koleji, Iyan Kiptaiyat Jeiso si kesorun, inye ak gong'ung'. ³² Ak kimwachi inendet ng'olyotab Kiptaiyat, koboto tugul che kimi gonnyi. ³³ Ak kiimut ichek sainato bo kemoi, ak kounji birutikwai; ak kigibatisan inendet ak bikyi eng' sainato. ³⁴ Ak kiimut koba gonnyi ak kogochi amitwogik, ak kiboiboitu mising', koboto gonnyi tugul, amu kagoyan Jehovah. ³⁵ Ak ye kingoech, koyokto kiruogik kiptainikab askarik, kole, Ounde bicho koba. ³⁶ Ak kimwachi ribindetab korgoret Paulo ng'alechato, kole, Kagoyok kiruogik kole keundak obe: omong'u anyun, ak obe eng' kalyet. ³⁷ Ago kileji Paulo ichek, Kagobirech eng' taitab bik, ama kiruokwech, achek bik che ki Romanik, ak kogotoorjech korgoret; ak nguno komachei koonech eng' ung'ot? achicha, mau noto; ago ingobwa icheget komutech kemande. ³⁸ Ak kimwachi kiptainikab askarik ng'alechuto kiruogik: ak kiiywei, kingogas kole icheget ko Romanik. ³⁹ Ak kibwa kogaigai ichek; ak kngo kagomut ichek kobwa sang', kosom, koleji, Oba eng' nganaset. ⁴⁰ Ak kimanda eng' korgoret, ak kiba agoi gotab Ludia: ak kingo kagogeer tupchosiek, kogaigai ichek, ak koba.