¹ Ak kichorgei bik alak che kibunu Judea ak konet tupchosiek, kole, Ngot ko magimuratanak ko u biteetab Musa, ko momuchi onyoru sorunet. ² Ak ye kingo kagotiiyo Paulo ak Barnaba mising' ak koteebegei mising' koboto ichek, kolewen tupchosiek Paulo ak Barnaba, ak alak eng' ichek, kotogosta koba Jerusalem ole mi che kiyoktoi ak boisiek agobo ng'olyondonito. ³ Ak kingo kagoyomis anyun ichek kaniset eng' bandang'wai, kobun Poinike ak Samaria, komwaitaati agobo che kigowalogis koyan Jehovah eng' Bororiosiek: ak kiigochi ng'olyondonoto tupchosiek tugul boiboiyet ne o. ⁴ Ak kingo kagoit Jerusalem, kotaach ichek kaniset ak che kiyoktoi ak boisiek, ak komwachi ichek tuguk tugul che kiga koyai Jehovah koboto icheget. ⁵ Ago kitononso alak eng' kasubikab Parisaik che iyanotin, kole, Kanyol kimuratan ichek, ak keng'at ichek korib Ng'atutietab Musa. ⁶ Ak kiiyumgei che kiyoktoi ak boisiek si kobiit kogeer ole teptoi ng'olyondonito. ⁷ 7Ak kingo kagoteebegei mising', kotonon Petero ak komwachi ichek, kole, ⁸ Che kitupche, ongen akwek ole kigolewen Jehovah eng' kwenung'wong' kong'ete ye bo ui, kole, kogas. ⁹ Bororiosiek ng'olyot ne bo logoiywek che miach eng' kutinnyu, ak koyan; ak kima ibesiech ak icheget, ye kiitilili mugulelwekwai eng' kayanet. ¹⁰ Kalya nguno anyun si otiem Jehovah kot onde chogit kaatitab alamalyet, ne kima imuch koib kwanisiekyo anan achek? ¹¹ Ago kiyani kele kisoruech eng' mieindab Kiptaiyat Jeiso, ko u ye kisoru agichek. ¹² Kosisyo anyun tuiyet komugul; ak koepchi it Barnaba ak Paulo kotetyin ichek kaborunoik ak kwong'utik che kiga koyai Jehovah eng' ichek eng' kwenutab Bororiosiek. ¹³ Ak kingo kagosisyo, kowol Jakobo, kole, Che kitupche, Ogaso. ¹⁴ Kagomwa Simion ko u ye kirutochi Jehovah Bororiosiek eng' tai, si kobiit kolewenji kainennyi bik eng' ichek. ¹⁵ Ak kanamge nito ak ng'alekab maotik; ko ye sirat, kole, ¹⁶ Ye ibata tuguchu aweege, Ak ateech kogeny gotab Daudi, ne kigolul; Ak ateech kogeny komoswek che kigolulyo, Ak alum kotonon, ¹⁷ Si kocheng' Kiptaiyat bik che ng'etunotin, Ak Bororiosiek tugul che kiguurtoe kainennyu. ¹⁸ Mwaei Kiptaiyat, ne yaei tuguchu si konaak kong'ete taunetab ng'weny. ¹⁹ Noto anyun, atile kiruoget ko u ni ale, amata kinyalil achek che bo Bororiosiek che bwanjin Jehovah. ²⁰ Ago ongesirji ichek, keleji kotabanegei muruonindab kanamonik, ak sokset, ak ne bo tuguk che kagiget, ak korotik. ²¹ Amu kitinyei Musa kong'ete ibinwek che bo keny eng' nganasok tugul, icheget che amdoi agobo inendet, che kisomani eng' sunagogisiek eng' sabato age tugul. ²² Kogeer anyun che kiyoktoi ak boisiek, koboto kaniset komugul, kole mie kolewen bik alak eng' ichek, ak koyokto koba Antiokia koboto Paulo ak Barnaba, ak Sila, bik che eechen eng' tupchosiek. ²³ Ak kisir ko u ni ak koyoktoe ichek, Kisirjini achek che kiyoktoi ak tupchosiek che boisiek, tupchosiek che bo Bororiosiek che mi Antiokia ak Suria ak Kilikia, kigatok: ²⁴ Amu kigegas kele, inyalilok eng' ng'alek bik alak che kibunei kwenunnyo, kong'emei sobonwekwok; bik che kima king'at ko u noto. ²⁵ Kagigeer kele mie eng' achek, che kagechamyechi, kelewen bik ak kiyokwok koboto chamanikyo Barnaba ak Paulo, ²⁶ bik che kigogoito sobonwekwai amu kainetab Kiptaiyandennyo Jeiso Kristo. ²⁷ Kagiyogu anyun Juda ak Sila, si komwawok icheget agichek tuguchuto eng' kutuswekwai. ²⁸ Amu kigeere kele mie eng' Tamirmiriet ne Tilil, ak eng' achek kele, magigesenjok milet ne nyigis kosiir tuguchu nyolu: ²⁹ kele otabenege tuguk che kieng'jin kanamonik, ak korotik, ak banyekab che kagiget, ak sokset; ngotabanege choto, komietu eng' akwek. Saisere. ³⁰ Ye kingo kagiyokto koba anyun, kochortagei koba Antiokia; ak kingo kagoyum tuiyet, kogochi baruet. ³¹ Ak kingo kagosoman koboiboitu agobo kagaigaet. ³² Ak kiigiil Juda ak Sila, tupchosiek eng' ng'alek che chang', ak kogimit amu ki maotik agichek. ³³ Ak kingo kagotebe oloto betusiek alak, kounda tupchosiek ichek eng' kalyet koba ole mi ichek che kiiyogu. ³⁴ Ago kicham Sila kota kotebe oloto. ³⁵ Ago kitebe Paulo ak sila Antiokia, koneti ak koamdoi ng'olyotab Kiptaiyat, koboto bik alak che chang' agichek. ³⁶ Ak kingobata betusiek alak koleji Paulo Barnaba, ingeweege nguno kerutochi tupchosiek eng' nganaset age tugul ole kigeamdae ng'olyotab Kiptaiyat, ak kegeer ole teptoi. ³⁷ Ak kimachei Barnaba mising' komut Johana, ne kigiguure Mariko, koba tugul. ³⁸ Ago kiibwat Paulo kole, ma mie kimut inendet ne kiga kobagkta ichek eng' Pampulia, ama cham koba boisiet koboto ichek. ³⁹ Ak king'etyo ng'alek che koromen, kot kopcheigei ichegei, ak kiimut Barnaba Mariko, ak kobun melit agoi Kupro; ago kilewen Paulo Sila. ⁴⁰ Ak koba, ko kagonde tupchosiek ichek mieindab Kiptaiyat. ⁴¹ Ak kobun Suria ak Kilikia, kogimitoi kanisosiek.