¹ Ak ye kimi Ikonio, koba tuwai agoi sunagogitab Yahudik, ak kong'alal kot koyan tuiyet ne o ne bo Yahudik ak Yunanik. ² Ago kiim Yahudik che ki bistoik sobonwekab Bororiosiek kot kogochi kowech tupchosiek. ³ Kitebe oloto anyun betusiek che chang' ak kong'alali eng' nyiganatet agobo Kiptaiyat, ne kibaorianji ng'olyotab mieindanyi, ak kogochin koyaak kaborunoik ak kwong'utik eng' eunekwai. ⁴ Ago kipcheigei tuiyet ne bo nganaset; ak kinamgei alage ak Yahudik, konamgei alage ak che kiyoktoi. ⁵ Ak ye kimachei Bororiosiek ak Yahudik koboto bounikwai kobokyi ichek, kole koyachi ne ya, ak kolach eng' koik, ⁶ kosib konai, ak kimwechi Lustra ak Derbe, nganasok che bo Lukaonia, ak korotinwek che legiite oloto, ⁷ ak kiamda logoiywek che miach eng' oloto. ⁸ Ak kitepche chito age eng' Lustra, ne kima ko kimen kelyekyi, ne ki solomwo konge'te komi moetab kamet, ne kitomo kowendot. ⁹ Kigas chichoto Paulo kong'alali: ak kingochiilji kong' inendet chichoto, ak kogeer kole tinyei kayanet ne kimuchi kisoob. ¹⁰ Komwa eng' kutit ne o kole, Tonon komie eng' kelyeguk. Ak kitoromben ak kowendot. ¹¹ Ak kingogeer tuiyosiek kit ne kayai Paulo, kobolyo eng' ng'alekab Lukaonia, kole, Kachorjech ge cheptalelisiek eng' kergeindab bik. ¹² Ak kiguure Barnaba, Seu; koguure Paulo, Henne, amu ki ng'alalindet ne o inendet. ¹³ Ak kiget tisiindetab Seu ne kimi hekalunnyi taitab nganaset, tuga ak sinendoik kobwa kurgotik, ak kimachei inendet koboto tuiyosiek kogoito tiseiywot. ¹⁴ Ago kingogas agobo noto che kiyoktoi Barnaba ak Paulo, kogerer ngoroikwai, ak koruai koba kenutab tuiyet, koboldos, ¹⁵ kolen, Mureju, kalya si oyai tuguchu? Ki bik agachek, che kergei ak akwek, ak kagiibkwok logoiywek che miach, si kobiit oweige omete tuguchu matilei kiy ak obwanji Jehovah ne sobei, inendet ne kiyaei kipsengwet ak ng'weny ak nyanjet, ak tugul che mi oloto: ¹⁶ Kibagakyi inendet bororiosiek tugul eng' ibinwek che kigosiirto, kobendat eng' ortinwekwai. ¹⁷ Ago kima tebi buch inendet ama tinyei baoria, amu kiyai ne mie, ak kogonok ropta ne bunu kipsengwet ak betusiekab ruratet, kogochin kobiyong'so mugulelwekwok eng' amitwogik ak kagasetab ge. ¹⁸ Ak ki legit kotemene koger tuiyosiek eng' ng'alechu si mata kogochi tiseiywot. ¹⁹ Ago kibwa Yahudik che kibunu Antiokia ak Ikonia: ak kingo kagolom tuiyosiek, kolach Paulo eng' koik, ak kochuut komanda eng' nganaset, kolen kagome. ²⁰ Ago ye kitonondos alamalyet ko kaimut inendet, kong'eet, ak kwo nganaset: ak eng' betut ne kiisubi noto koba Derbe ak Barnaba. ²¹ Ak ye kingo kagoamji logoiywek che miach nganasanato, ak ko kagoyai che chang' koek alamalyet, koweektagei koba Lustra, ak Ikonia, agoi Antiokia. ²² Kogimitoti sobonwekab alamalyet, kogiili koba tai eng' kayanet, ak koleji, kanyol keit bounatetab Jehovah eng' nyalilwogik che chang'. ²³ Ak kingo kagolewenji ichek boisiek eng' kaniset age tugul, ak kosa eng' karugutetab ge, konde ichek eutab Kiptaiyat, ne kiga koyan. ²⁴ Ak kibun Pisida, koit Pampulia. ²⁵ Ak kingo kagoamda ng'olyot eng' Perga, kochortagei Attalia. ²⁶ Ak kibun melit eng' oloto agoi Antiokia, oloto ole kigindae mieindab Jehovah agobo boisiet ne kiga koyai kosulda. ²⁷ Ak kingo kagobwa, koyum kaniset komugul, komwachi tuguk tugul che kiga koyai Jehovah eng' ichek, ak ko u ye kiga koyatyi Bororiosiek kurget ne bo kayanet. ²⁸ Ak kitebi betusiek che chang' koboto alamalyet.