¹ Ak ye kingo kagesopche, kenai anyun kele kigiguure emonoto kiikwen beek Melita. ² Ak ye kiyaiywech ne mie mising' bikab emonoto: amu kiilaal mat, ak kotaachech achek tugul, amu kimi ropta ak kaititiet. ³ Ago ye kingo kagoyum Paulo ratutiet ne bo kwenik, ak konde ma, komong' anyun erenet amu mat, ak kotaachigei eunnyi. ⁴ Ak kingogeer bikab emonoto erenet kosoginini eng' eut, kolejigei, Rumin chichi iman, agot nga kagosorgei eng' nyanjet, ko machamjin inendet Imanda kosob. ⁵ Ago kilelekta tionyoto kwo ma, ama am kiy Paulo. ⁶ Ago kilen ichek abere tos ibwa, anan kobut ak kome ngunoto: ak ye kiga kogenis keny, ama kogeer kiy ne ya konyonji inendet, kowal kabwatutikwai ak komwa kole, inendet ko cheptalelit. ⁷ Kimi anyun eng' ole legite yoto, korotinwekab chito ne o ne bo emonoto kiikwen beek, ne kigiguure Publio; ne kitaachech eng' chamyet, ak koyaech keegu toekyi eng' betusiek somok. ⁸ Ak kimiani kwandab Publio koamei eset ak miandab moet ne bendi korotik: ak kiwa Paulo gotab chichoto, ak kosa, ak kogonoor eunekyi inendet ak kosoob. ⁹ Ak kingo kagoyaak nito kobwa agichek che kimiandos eng' kakwembeiyonoto, ak kigisoob. ¹⁰ ak kigonyitech eng' teegisto ne o; ak ye kingebe eng' melit, kondewech melit tuguk che te che kigimakyinige. ¹¹ Ak kingobata arawek somogu ketau banda eng' melit ne bo Aleksandria, ne kiga tebe kakwembeiyondonoto eng' betusiekab kaititiet, ne kaborunennyi ko ki Saramek che Muren. ¹² Ak kingeit Surakusa, ketebe yoto betusiek somok. ¹³ Ak keng'eetye eng' oloto kebe keiyiematege, kot keit Regio. Ak kingobata betut agenge kous usonetab murot ne bo tai, ak eng' betut ne bo aeng' keit Puteoli. ¹⁴ Ole kiginyorji tupchosiek, ak kiigaigaech ketebi ak icheget betusiek tisab: keit anyun Rom. ¹⁵ Ak kingogas tupchosiek agobo achek eng' oloto, kobwa kotorokwech kot koit Siret ne bo Apio, ak Gorik Somok che bo Toek: che kingogeer Paulo, komwachi Jehovah kongoi, ak konyiganit. ¹⁶ Ak kingeit Rom kechamji Paulo kotebi inegei koboto askarindet ne kiribei inendet. ¹⁷ Ak kingo kagosiirto betusiek somogu koguur bik che eechen che bo Yahudik kotuiyo: ak kingo kagoyumgei, koleji ichek, Che kitupche, agot ngo mayai ane kiy ne ya eng' bik, anan eng' bitonwekab kwanisiekyo, ko kigindea eunekab Romanik eng' Jerusalem, ko ai kimonjororio. ¹⁸ Ak kimache kotiacha ichek, ko kagogin ng'alekyu, amu kima komi kiy eng' ane ne nyoljin meet. ¹⁹ Ago ye kingogirinda Yahudik ng'olyondonoto, ageer ale kanyol arirji Kaisari; ma kele kiatinye kiy ne ang'andoe bororiennyu. Amu nito anyun kasomok obwa kegeerge ak keng'alal tugul: ²⁰ amu ai ratat eng' sirimi agobo kamang'unetab Israel. ²¹ Ak kileji inendet, Tomo kenyoru baronok che bunu Judea agobo inye, anan konyo oli age eng' tupchosiek ak koboruech anan komwa kiy ne ya agobo inye. ²² Ago kimache kegasenen kiy ne ibwati: amu kigonaak eng' achek kele kimwaoti ne ya agobo bitonito eng' komosta age tugul. ²³ Ak ye kingo kagochob betut, kobwanji inendet che chang' eng' got ne kimenyei; ak kiiborsechi komie, kobaoriani agobo bounatetab Jehovah, ak kogiiljigei koneti ichek agobo Jeiso eng' Ng'atutiet ne bo Musa, ak eng' maotik, konge'te karon agoi koimen. ²⁴ Ak kiiyan alak tuguk che kigimwaei, ko ma iyan alak. ²⁵ Ak ye kimata kogasyin ichegei, koba, ko kagomwa Paulo ng'olyot agenge, kole, Kimwachi komie Tamirmiriet ne Tilil kwanisiekyo eng' maotiot Isaia, ²⁶ Kole, Ui oldab bichu, ak imwa ile, Eng' kaset ogase, ago moguitosi agot kitigin; Ak eng' keeret ogeere, ago mobestosi agot kitigin: ²⁷ Amu kwolilenotin mugulelwekab bichu, Ak magastoi komie itikwai, Ak kiger icheget konyekwai; Si mageer eng' konyekwai, Anan kogas eng' itikwai, Anan koguiyo eng' mugulelwekwai, si koweek kogeny, Ak asoob ichek. ²⁸ Ingonaak anyun eng' akwek, ole kiyokyin yetunoni bo Jehovah Bororiosiek: kasei agichek. ²⁹ Ak ye kingo kagomwa ng'alechu, koba Yahudik, koteebategei ichegei mising'. ³⁰ Ak kimeny eng' kenyisiek aeng' gonnyi ne kialei meng'et, ak kitaach tugul che kibwanjin inendet. ³¹ Koamdoi agobo bounatetab Jehovah, ak koneti tuguk agobo Kiptaiyat Jeiso Kristo eng' nyiganatet tugul, ama ete chi.