¹ Ak eng' betusiechoto ye kitesoksei koitetab alamalyet, kong'eet kang'unyng'ung'et eng' Yahudik che ki kuting'wai ko Yunanik, ak kong'ung'ung'ji Hebranik ak kole kiginyasta mosogikwai eng tuguk che kicham kigochini kotugul. ² Koguur anyun tamanu ak aeng tuiyet ne bo alamalyet ak koleji, Ma mie kebagakte ng'olyotab Jehovah ak keboisie eng' Mesosiek. ³ Noto anyun che kitupche, Ocheng' bik tisab che togunotin eng' akwe kele miachen, che nyiitotin tamirmiriet ak ng'omnatet, ak che kimuchi kinde boisioni. ⁴ Ago si ketestai ache kigiiljigei saet, ak konetisietab ng'olyot. ⁵ Kicham anyun tuiyet komugul ng'olyondonoto, ak kilewen Stepano, chito ne nyiitat kayanet ak Tamirmiriet ne Tilil, ak Pilipu, ak Prokoro, ak Nikanor, ak Timon, ak Parmena, ak Nikola ne bo Antiokia ne kiwalak koek Yahudiot. ⁶ Kiinde icheget anyun taitab che kiyoktoi ak ye kingo kagosa kogonoor ichek eunekwai. ⁷ Kitesak anyun ng'olyotab Jehovah, ak kotesak mising' koitetab alamalyet eng' Jerusalem, ak kogas it kayanet tuiyet ne o ne bo tisiik. ⁸ Ak kinyiitat Stepano mieindo ak kamuget, koyai anyun kwong'utik che eechen ak kaborunoik eng' kwenutab bik. ⁹ Ago king'eetyo alak che bo sunagogit, ne kiguure Sunagogitab che Itiagotin ak ne bo Kurenik ak ne bo Aleksandrianik ak ne bo bikab Klikia ak Asia, ak kobelgei ak Stepano. ¹⁰ Ak kima imuch ichek kogirinda ng'omnatet ak tamirmiriet ne king'alale inendet. ¹¹ Kogaigai anyun bik komwa kole, kigegas komwae inendet ng'alek che bo chubisiet agobo Musa ak Jehovah. ¹² Ak kong'eet ng'eet bik konerekso, ak boisiek ak sirik, che kibwanji inendet ak konam ak komut kwo kapkiruok. ¹³ Ak konde baorinik che bo lembech, che kimwa kole, Mabagaktoi chichi komwa ng'alek che yaachen agobo yu tilil ak ng'atutiet. ¹⁴ Amu kigegas inendet komwae kolen, tatun kobute yuto Jeiso nito bo Nasaret ak kowal bitonwek che kigonech Musa. ¹⁵ Ak kiichiilji kong' anyun inendet bik che kitebche eng kapkiruok, ak kogeer togennyi ko u tagetab malaikaiyat.