¹ Ago kialda chito age ne kigiguure Anania, ak osotiondennyi Saphira, korennyi, ² ak kiituuch kebebertab che kigialdae, kongen agine osotiondennyi, ak kiib kebeberta age, konde kelyekab che kiyoktoi. ³ Ago kile Petero, Anania, kalya si konyi Setani muguleldang'ung' kot iberber Tamirmiriet ne Tilil, ak ituuch kebebertab che kigialdae koret? ⁴ Kingota komi, ko kima ko neng'ung'? ak kingo kagealda, ko kima ibou? Kalya si ichob kii eng' muguleldang'ung'? Ma iberber chi, ago Jehovah. ⁵ Ak kingogas Anania ng'alechu, kobut ak kome: ak kinyonji kaiyweisiet ne o tugul che kigas. ⁶ Ak king'eetyo murenik ak kotaae borto anget, ak kisut kwo sang' ak kotub. ⁷ Ak ye ki legit kogesgei saisiek somogu, koit osotiondennyi agine, ak kima kongen kiy ne kagoyaak. ⁸ Ak kiwolji Petero koleji, Mwawa ngo kioldae koret tuguk che te choto. Kole, Ee, te choto. ⁹ Ago kileji Petero inendet, Katepto ano kot ochamnyechi tuwai oyom Tamirmirietab Kiptaiyat? keer anyun, mi kurgat kelyekab icheget che katubei manong'otiondeng'ung', ak sutin aginye imande. ¹⁰ Ak kiibutyi kelyekyi ngunoto, ak kome: kopka go anyun murenik konyor ko kagome, ak kisut kwo sang' ak kotupchi ye legite manong'otiondennyi. ¹¹ Konyonji anyun kaiweiysiet ne o kaniset komugul, koboto tugul che kigas tuguchoto. ¹² Ak kiyaagis eng' eunekab che kiyoktoi kaborunoik ak kwong'utik che chang' eng' kwenutab bik; ak kimi tugul eng' kabwatet agenge eng' keterut ne bo Solomon. ¹³ Ago eng' bik alak ko kimata kobiit chi ne kita kogany konamgei ak icheget; ago kiitoror bik ichek. ¹⁴ Ak kitesak kayanik eng' Kiptaiyat kosiir, kichang'a murenik koboto chebiosok; ¹⁵ kot komut ichek che miandos koba ortinwek, ak komongji itogusiek ak kiplusisiek, kole, tamangab kokwer uruetab Petero alak eng' ichek, kosiirtoi. ¹⁶ Ak kiiyomogei tuiyet ne bunu nganasok che legite Jerusalem, komutu che miandos, koboto che kiinyalili tamirmirik che muruonen, ak kigisoob age tugul eng' ichek. ¹⁷ Ak kitononon tisiindet ne o, ak tugul che kimi koboto inendet (kasubikab Sadukaik choto), ak ki nyiitat ichek ng'et konda, ¹⁸ ak kinam che kiyoktoi, ak kotoorji korgoret ne bo bik tugul. ¹⁹ Ago kiyat malaikayatab Kiptaiyat kurgotikab korgoret kemoi, ak komut ichek komong' sang', ak koleji, ²⁰ Oba, ak otonon eng' hekalut ak omwachi bik ng'alek tugul che bo Soboni. ²¹ Ak kingogas ko u noto, koba hekalut ko kaech, ak konetis. Ago kinyo tisiindet ne o, ak che kimi koboto inendet, ak koguur kiruoget, ak boisiek tugul che bo lagogab Israel, ak koyokto kimut ichek kobwa eng' ole kigiratyi. ²² Ago kingoit askarik korgoret ko manyor ichek; ak kiweektagei, ak komwaita, ²³ kole, Kaginyoru ko kerat komie korgoret, ak kotonondos ribik eng' kurgotik: ak ye kangeyat, koma kenyorji chi orit. ²⁴ Ak kingogas ng'alechu kiptaiyatab hekalut ak tisiik che eechen, koiimgei mising' agobo ichek kole egu nee anyun ng'alechu. ²⁵ Ak kinyo chi ak koleji, ogeer anyun, bicho kogotoorji korgoret, kotonondos eng' hekalut ak koneti bik. ²⁶ Kwo anyun kiptaiyat koboto askarik, ak komut kobwa, ago ma eng' kimnatet; amu kiiywei bik kole si ma kilach ichek eng' koik. ²⁷ Ak kingo kagomut ichek kopka, konde taitab kapkiruok. Koteebe tisiindet ne o ichek, kole, ²⁸ Kigeetenak inne kele, amatata onet bik eng' kainani: ak ogeer anyun, kionyiit Jerusalem konetisieng'wong', ak omache oibwech korotikab chichito kobwanjech. ²⁹ Ago kiwol Petero ak che kiyoktoi kole, Kanyol kegas it Jehovah kosiir bik. ³⁰ King'eet Jehovah ne bo kwanisiekyok Jeiso, ne inendet ne kiobar ogartat eng' ketit. ³¹ Inendet ne kitoror Jehovah eng' eunyi ne bo tai koek ne o, ago yetindet, si kogochi Israel sigunet, ak nyoetab kaat ne bo tengekwogik. ³² Ak kii baorinik ache che bo tuguchu, ak tamirmiriet ne tilil agine, ne kigogochi Jehovah icheget che kase it inendet. ³³ Ak kingogas ichek nito, kong'wanit mising' eng' mugulelwekwai kot komach kole kobar ichek. ³⁴ Ak kitonon chito age eng' kapkiruok ne kigigure Gamaliel, ne ki konetindetab ng'atutik, ne kigonyiti bik tugul, ak kong'at kole kimut bichoto koba sang ne matia. ³⁵ Ak kolenji ichek (kapkiruok), Akwe bikab Israel, oripge eng' bichu ak eng' kit ne omache oyachi. ³⁶ Amu kingo tomo koit betusiechu kemi, koit Teudas ak kochoige kole inendet ko chito ne o, ak konamge ak inendet bik che itei olo bo bogol ang'wan, ak kingebar inendet koiyesta tugul che kigase it inendet ak kibetyo. ³⁷ Kingobata chichoto, kong'eet Judas ne bo Galili eng' betusiek che bo sirisietab kainaikab bik, ak kochuut bik alak kosub inendet, kime agine ak kiyesta tugul che kigase it inendet. ³⁸ Ara anyun amwawok nguno ale, oistoegei bichu ak obagakte ichek, amu ngo bo bik ng'alechu anan boisioni, kowong'ugei. ³⁹ Ago ngot kobo Jehovah ko momuchi owong'u, si ma kinyoruok obortosi aka Jehovah. ⁴⁰ Kocham anyun ng'alekyi, ak ye kingo kagogur che kiyoktoi kobwa ole mi ichek, Kobir ak kong'at koleji amatata kong'alale kainetab Jeiso, ak kounda koba. ⁴¹ Koba anyun eng' taitab kapkiruok koboiboi amu kogiit kele nyoljin konyor tewernatet agobo kainanato. ⁴² Ak kima sisyo eng betut age tugul konetis ak koamdoi eng' hekalut ak eng gorik, kole Jeiso ko Kristo.